'
Motto: "I thu chhiarin a siam che"

Friday, December 27, 2013

Martin Luther (1483 – 1546)

By: Josephsaia 

A chanchin tlangpui: 

Protestant Reformation hun laia kohhran hnarkaitu ber chu German puithiam Martin Luther-a a ni. Roman Catholic pope leh bishop-ten sual ngaihdamna chu pawisa nena lei theih tia kum tam tak an lo zirtir chu dodalin kum 1517 khan Ninety-Five Theses chu Wittenberg biak in kawngkharah tarin Pope leh bishop-te chu nasa takin a do va. Kum 1520 khan Pope Leo X chuan a thuziahte sut tura a ngenna chu Luther-an a sut theih loh avangin Holy Roman Emperor Charles V chuan kum 1521-ah Diet of Worm thuchhuah siamin thiam loh a chantir a, kohhran atanga hnawhchhuah nghal a ni. 

Luther-a chuan, “Chhandamna hi thiltha tih avanga hlawhchhuah theih a ni lova, khawngaihna avanga rinnaa chhandam kan ni a, chu chu Pathian thilthlawnpek a ni,” tiin a zirtir a. A zirtirna chuan Pope thuneihna a dahhniam tia ngaiin Roman Catholic kohhran chuan zirtirna dik lo leh him tawk lo niin a ngai a, Pope in a lehkha sut tura a vauna pawh Luther-a chuan, “Bible chauh hi kan rinna innghahna leh Pathian inpuanna a nih avangin Bible kalh zawng zirtirna reng reng chu huai takin ka do zel dawn a ni. Lehkha Thianghlimin (Bible) emaw, ka chhia leh tha hriatna rilru fîmin emaw min hneh a nih ngawt loh chuan ka thute kha ka sût thei lo. Ka chhia leh tha hriatna hi Pathian Thuin a phuar tlat a, chumi kalh zawnga chêt chu a dik lo va, a him bawk hek lo. Engdangmah ka tithei tawh lo! Aw Lalpa, hetah hian nghet takin ka ding a, mi tanpui ang che,” tiin a chhang mai a ni. Roman Catholic atanga hnawhchhuah a nih hnuin kohhran thar a din a, mi tam zawkten awlsam zawka Bible an chhiartheih nan Greek Thuthlung Thar chu German tawngin a letling a, Pathian fakna hla tam tak a phuah bawk a, hnungzui tam tak a nei bawk a ni.

Tahan Times Journal- Vol. 2- No. 22, November 2012

Wednesday, October 16, 2013

The Rich Man & The Cobbler

By: Josephsaia

Khaw pakhatah hian mi hausa tak a awm a, a building ropui tak kawtah chuan pheikhawk thui mi rethei tak a awm bawk a. Pheikhawk thui pa chu mi rethei tak a nih avangin zing atanga Ni thlak thlengin a hna chu taima takin a thawk a, hah hle thin mah se a hlim em em mai a, nitin hian a zai a, a faifuk hlerh hlerh thin a. A thenawmte leh veng hnaiten an hmuhin mak an ti a, a nun an awt em em mai a, a pheikhawk thuinaah chuan naupang puilting leh pitar pitarte pawh rawn kalin a thil siamte en in leh a hlasakte ngaithla turin an rawn kal thin a, a hmingah “Pu Hlima” an phuahsak nghe nghe a.

Pu Hlima pheikhawk thuina hmuna lo kalte chuan, “Pu Hlim, engmah nei der si lo, engtin nge maw nitin mai hlim taka hna i thawh a, i zai reng theih bik ni?” tiin an zawt a, mahse Pu Hlima chuan nui chungin, “Zaite chu a nuam alawm zai ve rawh u!” tiin awlsam deuh chuan a chhang mai zel a, faifuk hlerh hlerh chuan a hlate chu a han sa leh a.

Friday, October 4, 2013

U.S. President Richard Milhous Nixon (1913 – 1994)


“A man is not finished when he is defeated. He is finished when he quits.”
   
By: Josephsaia
 
A chanchin tlangpui:
 
Richard Nixon  hi America President nihna atanga mahnia inhnukdawk awm chhun a nih avangin America President-te zingah mite hriat a hlawh bik hle a. Watergate Scandal avangin kum 1974 khan hmingchhe takin a Office a chhuahsan a, he a thiltih sual lian tak hi America history-a thil mak tak a tling reng a ni.
 
Nixon-a hi Yorba Linda, California-a piang a ni a, kum 1934 khan Whittier College-ah a graduate a, kum 1937 khan Duke University School of Law atangin Dan lam degree a la bawk a. Degree a lak fel hnu chuan Dan lam practice turin California-ah a haw leh ta a.
 
Kum 1942 khan a nupui Pat Nixon nen Washington-ah Federal Government hna thawk turin an insawn a, Khawvel Indopui II (1939-45)-a Japanin Philippine thlirkara US lawng chawlhna hmunpui Pearl Harbours a rawn boom lai khan U.S. Navy-ah a lut a, Pacific Indonaah Operation officer hna a chelh a, indo a zawh fel meuh chuan U.S. Marine sipai Commander (Leutenant Commander) a kai hman daih a ni. Indopui a zawh fel hnu chuan political lamah a zuanglut nghal a, politic lama a zuanluh dan pawh hi mak danglam tak a ni. California district Republican chuan Congress member ni tura candidate tur chanchinbuah advertisement an chhuah a. Nixon chuan a dil a, sipai a tan laia a record-te an han en chuan Nixon chu an mi duhzawng leh lungdum zawng tak a ni a. Chutichuan kum 1946 atang khan U.S. House of Representatives a lo ni ta a. Kum 1948 khan Congress member atan thlan a ni leh a, kum 1950 khan U.S. Senator-a thlantlin a ni bawk a, heti lai hian Nixson-a chu kum 37 mi chauh a la ni.
 
Communist sawrkarna a do nasat em avangin America politic khawvelah mite hriat a hlawh hle a, kum 1952 US inthlanpui khan President Dwight D. Eisenhower-an Vice Presidential running mate atan a thlang hial a ni. Kum 8 zet mai Vice President hna a chelh hnuin kum 1960 khan Democratic Party candidate John F. Kennedy-a khingin President nih a chuh a, vote tlemte in John F. Kennedy chu a hneh ta lova. Kum 1962 khan California Governor atan a in candidate leh a, chutah pawh chuan a tling leh ta lova, mi tam tak chuan politic khawvelah Nixon-a hun a liam ta niin an ngai hial a ni. Amaherawhchu kum 1968 khan President nih a chuh leh a, chutah zet chuan US President 37-na atana thlan tlin a ni ta a, politics khawvelah Nixon hming chu a rawn lar chho ta hle a. President nihna a chelh chhung (1969-1974)-a a thiltih ropui ber chu China nena indawrtawnna (diplomatic) tha tak a siam kha a ni a, Soviet Union nena Anti-Ballistic Missile Treaty an siam leh kum 1973-a Vietnam Indona atanga US sipaite a hruaikir leh kha a thiltih ropui berte zinga chhiar tel a ni bawk.

Monday, August 19, 2013

U.S President Thomas Jefferson

                          U.S. President Thomas Jefferson
                           (April 13, 1743-July 4, 1826)
 By: Josephsaia
   
“I have sworn upon the altar of God, eternal hostility against every form of tyranny over the mind of man.”  (Thomas Jefferson)

A chanchin tlangpui:
 
U.S. President zinga mi fing leh ropui, mite fak leh chawimawi hlawh nasa ber chu President Thomas Jefferson-a hi a ni. U.S. President zinga President pathumna a ni a, kum (1801-1809) thleng khan U.S. President nihna a chelh bawk a.
 
America-in zalenna a puan khan zalenna dan fel taka siam a ni a, chu dan chu Declaration of Independence tia koh a ni. He dan hi kum 1776-a siam a ni a, Declaration of Independence dan siamtute zingah Thomas Jefferson-a chu Principal Author of the Declaration of Indepedence tia koh a ni bawk. Declaration of Independence dan siamtute leh America hmasawnna leh ram dinhmun siamthatute chu Founding Fathers tia koh an ni a, heng Founding Fathers-te zingah pawh hian Thomas Jefferson-a chu ‘pa ber’ tia koh a ni bawk. Politic lama mi thiam filawr a nih avang te leh khawvel thil leh sakhuana lama mi fing leh hming thang tak a nih avangin Britain leh France mi ropui leh mi fing thian tam tak a nei a, mi tam tak chuan ‘political philosopher’ tiin an ko va, President Abraham Lincoln-a meuh pawhin, “Jefferson-a hi America history siamtute zinga mi danglam leh langsar ber politician a ni e,” tiin a sawi nghe nghe a ni.

President Jefferson-a hian khawpuia thiltih dante leh khawpui inkaihruai dante a duh lova, a bik takin sum leh pai puktirtute chungah rinhlelhna lian tak a neih avangin Republican Government dan khauh tak siama sawrkar din chu a tum lian ber a ni. Kohhran leh Politic thiltih inchawhpawlh/ inhnamhnawih duh lo mi a ni a, America Revolution reh hnua Church of England-in Viginia State-a Anglican kohhran din a tum pawh khan a do nasa bertu a ni nghe nghe a, kum (1779-1786) khan Virginia Statute for Religious Freedom tih lehkha ropui tak a ziak a ni. President Jefferson-a hian a ngaihtuahna zau tak atangin sawrkar inkaihhruai dan leh ram inawp dante a dinchhuak a, chu a sawrkar dinchhuah chu mi tam takin Jeffersonian Democracy tiin an ko a ni. Kum zabi 18-a English pasal Francis Bacon-a Isaac Newton-a leh John Locke-a lehkha ziakte chuan a nun an hneh hle a, an thuziah atangin sawrkar inkaihhruai dan tam tak a zirchhuak a, heng mite hian mi ropui dinhmunah an hlangkai a ni. President Jefferson-a hi Democratic- Republican Party dintute zinga mi pawimawh tak mai a ni a, Republican party hian kum 25 zet America politics a fanchhuak a, mi tam zawkte innghahna party pawh a ni bawk.  American Revolution tantirh khan Virginia atanga Continental Congress member a ni a, indo lai tak khan Virginia Governor nihna a chelh bawk a, kum (1779 June 1- 1781 June 3) thleng khan chu nihna chu a chelh a. Indo a reh hnu kum 1784 khan Paris khawpui, France-ah sawrkar palai hna (diplomat) a thawk bawk a, 1785 atang khan United States Minister to France nihna a chelh nghal bawk.

Tuesday, July 2, 2013

Mother Teresa-i chanchin

By: Joseph Saia

“I know God will not give me anything I can’t handle. I do not pray for success, I ask for faithfulness.” (Mother Teresa)

PIAN LEH MÛRNA:

Catholic hmeichhe missionary ropui ber leh khawvêl mi zawng zawngtena an ngaihsan ber, ‘Riangvai leh Fahrahte Nu’ tia an koh ṭhîn Mother Teresa-i hi kum 1910, August ni 26 khân Macedonia ram Skopje-ah a lo piang a, a pian a tûk maiah baptisma a chang nghâl a ni. (Macedonia hi tûn hma chuan Ottoman Empire tia koh a ni ṭhîn a, tûnah chuan Republic of Macedonia tia koh a ni tawh.) Teresa-i hian pianpui unau pahnih a nei a, ani hi an unau zînga a naupang ber a ni a, a û hmeichhia chu Aga-i a ni a, a û mipa zâwk chu Lazar-a a ni. August ni 27, 1910-ah baptisma a chang a. A naupan lai chuan Agnes Gonxha Bojaxhiu tiin an ko ṭhîn a, kum 18 a nih thlengin a hming lam tawi ‘Agnes’ tia koh a ni. Catholic chhûngkua aṭanga lo zi chhuak niin kohhran leh khawtlângah pawh mi ṭangkai tak a ni. 

A nu leh pate chu Albanian thlah an ni a. A pa Nikola Bojaxhiu-a chu damdawi leh thil dang dang zuara sumdâwng ṭhîn leh in sakna (construction) lama contractor hna thawk ṭhîn a ni a. Sumdâwnna bâkah politics lamah pawh a inhnamhnawih thûk hle a, Albanian zalênna sualtute zîngah pawh a phusa ber pâwl a ni nghe nghe. A nu Drana Bojaxhiu-i erawh chu sakhaw rawngbâwlna kawnga mi inpe zo tak a ni a, ṭawngṭai leh thilpêk lamah pawh mi ṭhahnemngai leh entawn tlâk tak a ni bawk. 

Sunday, June 30, 2013

William Carey (1761-1834)

By: Josephsaia 
Thuhmahruai:

Modern Missionary Enterprise sualchhuaktute zinga an puipa ber chu India rama Missionary ropui tak William Carey-a a ni. A hun hma hian mission rawngbawlna mi tam takin lo bei tawh thin mah se Carey-a hmasialna hian nakin hnu zel atan mission rawngbawlna zau zawk a vawrhchhuah tlat avangin chhinchhiah a hlawh bik a, Baptist Missionary Society dintute zingah chuan, “Father of Modern Mission” tia hriat lar a ni. Indian tawng chi hrang hrang 40 hmangin Baibul a letling a, a hun laia missionary zawng zawngte zingah sulhnu ngah ber a tling a ni.
 
Pian leh murna:

August 17, 1761 khan Paulerspury, Northamtonshire, England-ah a piang a. Naupang kum ruk mi a nihin a pa zirtir thawhna sikulah lehkha a zir ve a, naupang rilru chak tak a nih avangin hnim hming te, thingkung hming te, pangpar leh thlai hming te chu a hre bel em em a. Amaherawhchu a hriselna a that tawk loh avangin a nu leh paten pheikhawk thuia ei zawng turin Piddington khuaa an thian Clarke Nicholas-a hnenah an dah ta daih a. Tleirawl kum 16 mi a lo ni ve ta a, pheikhawk thui a zir lai chuan thian tha tak John Warr-a a char hlauh mai a. Pheikhawkthui a zir kum 2-na ah a thian Warr-a nen chuan tawngtaina hmun an kal a, chutah Warr-a chuan piantharna a chang ta hlauh mai a. A thian Carey-a pawh Pathian hriatna lama tuihal tak a nih avangin February 10, 1779 khan Pathian hnenah a inhlan ve ta a, Congregational kohhranah a lawi nghal bawk a ni. Baptisma a chan tak chu a nupui neih hnu kum hnih October 5, 1783 khan a ni.

Friday, June 21, 2013

Polycarp (AD 69-156)

By: Josephsaia

Kum zabi 2 atang tawh khan Roman Empire-ah leh Asia Minor-ah te, Europe-ah te, North Africa hmar lamah te, Palestine-ah te leh Mesopotamia thlengin Kristianna a lo darh tawh a. Chu chu Tirkohte Thiltih bung 13-23 ah chiang takin kan hmu. Asia Minor-a Chanchin Tha lo luh dan hi zir tur a tam hle a, a bul takah chuan Tirhkoh Paula rawngbawlna atanga lo intan a ni. Pisidia ram Antiokei-a Judaten Pathian an hnawl avangin Tirhkoh Paula chuan Jentailte lam a lo hawi ta a, Asia Minor lamah Chanchin Tha a lo darh zau ta a ni.
 
Kum zabi 1-na tawp lam khan Tirhkoh Johana, Jakoba unaupa chuan nasa takin Pathian Thu a hril a, Ephesi kohhran pawh a hmangaih hle tih kan hmu. Tihduhdahna a nasa em avangin Johanan chu Ephesus-a man a ni a, Rom khawpuiah tihhlum tura thawn a ni. Rome sipaite chuan thir bel lian tak chhunga tel so bawrh bawrhah an thlak a, mahse a taksa chu engtin mah a awm lo. Tihngaihna an hriat loh avangin Emperor Domitian chuan Patmos thliarkara thawn bo turin thu a pe ta a. Patmos thliarkara thihna a hmachhawn mek lai chuan Asia Minor-a kohhran pasarih; Smyrna, Pergamos, Sardis, Philadelphia, Laodicea, Thyatira leh Ephesi kohhrante hnenah lehkha a thawn a, chu chu Thupuan bu kan tih hi a ni.

Thursday, June 20, 2013

World Refugee Day

By: Josephsaia

Khawvel indopui II lai khan European ram thenkhatah ram buai vanga ral tlan tam tak an awm tawh a, chung mite chu a theih ang anga tanpui turin December 14, 1950 khan United Nations General Assembly chuan United Nations High Commissioner for Refugees (UNHCR) tih chu a lo din a. A tir takah chuan ral tlante tanpui nan kum3 chhung chauh project siam a ni a, chumi hnua khar leh mai tur tih a ni. July 28, 1951 khan United Nations Convention-ah Refugee-te dinhmun, refugee atana pawm tur chin leh tanpui dan tur kal hmang sawiho a ni a, UNHCR inkaihhruaina dan zam tan a ni. United Nations Convention Article 1A- ah chuan Refugee chu: politic chungchanga ngaihdan hrang a neih avang te, sakhuana avang te, a chi leh kuang avang te, ram khua leh tui anihna avang te, pawl pakhat khata member anihna avangtea hrem tawk thei, hrehna pumpelh tuma a sahimna tur zawng thei tawh lo emaw zawng duh tawh lo emaw, chu hremna chu a hlauh avanga ram pawna thlan chu a ni. (A refugee is a person who, owing to a well-founded fear of being persecuted for reasons of race, religion, nationality, membership of a particular social group, or political opinion, is outside the country of their nationality, and is unable to or, owing to such fear, is unwilling to avail him/herself of the protection of that country. - Article 1A of the United Nations Convention in 1951)

Thursday, June 6, 2013

Charles Haddon Spurgeon (1834-1892)

By: Josephsaia

Thuhmahruai:

Kum zabi 19-a thuhriltu ropui berte zinga mi lar tak chu British Baptist kohhran thuhriltu Charles Haddon Spurgeon-a a ni. Reformed Baptist pachal zinga Liberal zirtirna leh pragmatism dodal nasa ber a ni a, kum 1689 London Baptist Confession of Faith (Baptist Kohhran Thurin) kaltlanga kohhran humhalhtu ber a nih avangin leh thusawi thiam tak a nih avangin ‘Prince of Preachers’ tiin an ko nghe nghe a. 

Spurgeon-a hian a thih hmain sermons 3,600 meuh a hmang a, karkhat chhungin sermon 12 vel a hmang thin. London khawpui hmun hrang hrangah thu a sawi a, kum 1852 khan Waterbeach, Cambridgeshire-ah pastor hna a thawk tan a, kum 1854 April khan New Park Street Chapel pastor atan lakluh leh a ni. Mi sangtel lawina New Park Street Baptist kohhranah kum 40 zet rawng a bawl a, a kohhran pawh a thangchak hle a ni. (He kohhran hi tunah chuan The Metropolitan Tabernacle tia koh a ni.)


Spurgeon-a hi lehkha ziak mi tak a ni a, kum 1861-a a kohhran din Metropolitan Tabernacle-ah pawh thla tin Magazine-te chhuahin sermon leh Pathian thu tawi a ziahte pawh a thehdarh nasa hle a. John Calvin-a ziritirna pawm a nih avangin Pathian thu pawh a duh fir hle a, kum 40 zet rawng a bawlna The Baptist Union of Great Britain hruaitute nen thurin chunghchanga an inhnial fo avangin October, 1887 khan he kohhran hi a chhuahsan nghe nghe a ni. Rawngbawlna a chhuahsan hnu pawhin a rinna nghet tak chu vuanin thu a hril zel a, a hnuah fahrah chawmna sikul te, zirna sang College te, Sunday sikulte pawh dinin lehkhabu, sermon, tawngtai bu, mimal chanchin, Baibul hrilhfiahna, magazine leh hla thute ziakin a hun a hmang a, a lehkhabu ziahte chu tawng chi hrang hranga lehlingin khawvel pumpuia thehdarh a ni.

Tuesday, June 4, 2013

Tuivar khawtlang Seminar

Thupui: Tunlai kan hun tawn leh thalaite hriat makmawh

Buatsaihtu: Rev. B. Zosangliana
A hun: May 11, 2013
A hmun: MYA Chapel, Tuivar

1. Thuhmahruai

Tunlaia thil danglam chakzia hi mak tak a ni. Hmuh theih khawvel pakhata cheng si hian kan khawvel (kan nun) tak tak chu a inang lo hlawm hle thung. Hmanlai ata tawh a hunlai mila che tlak thiam a piang an nihlawh a, an hlawhtling bawk a, mi chak leh hnehtu an ni deuh zel thin. Doctor ten tun hmaa la awm ngai lo, natna (hri) lo awm tharte enkawl dam thei tura an hriatna leh thiamna tuai thar reng an mamawh ang leh computer hrik (Virus) laka computer venghimtu anti-virus software siam thar (update) a ngai zel angin tunlai thalaite hian khawvel hmasawnna danglam chak tak mar phu dek thiam tur hian tan kan lak hle angai a. Zir chhuak thar te pawh an hnaa an luh lawk loh chuan Board Exam an chhan that tir leh thin. Inhremna hmanga invawnna dan kalsanin a thawk tha falte chawimawia intihhmasawn kan duh ta zawk bawk.

Khawvelah mihring mtd 7000 (billion 7) kan awm mek a, hemi zingah hian thalai kum 15 atanga kum 24 chauh pawh billion 1.2 kan ni. Khawtlang thalai member kum bithliah dan tlangpui anga kum 40 thleng phei chu huam dawn ila, thalaite kan chak lai a nih tlat avangin thalaite thlekna lamah khawvel pawh a thle lo thei lo. Kan zir ho tur thu thenkhat chu kan khawtlangah a la thleng dik chiah lo thei a; inven lawk nan erawh a tangkai hle thei ang.

Kimchang zawka chhiar duhte tan a hnuaia Link-ah hian PDF-in Download theih a ni e...

Tuivar Khawtlang Seminar- Tunlai kan hun tawn leh Thalaite Hirat makmawh 


Wednesday, May 22, 2013

Mother Teresa-i Hriangrengna (Commemoration)

1. Mother Teresa pianna Albania khawpui Tirana chuan Mother Teresa hming chawiin kum 2002 khan Tirana International Airport (Nënë Tereza) a siam.
 
2. Albania ram chuan October 19 chu Mother Teresa Day ((Dita e Nënë Terezës) atan a puang a, hei hi Albania ramin tun thlengin public holiday atan a la hmang zel.
 
3. Albania rama Civil hospital lian ber chu Mother Teresa Civil Hopital tia koh a ni.
 
4. Germany ram chuan kum 2010 khan Mother Teresa pianchampha 100 chu ropui tak a lawm a,  chumi tum chuan Mother Teresa sawi fo thin, “Retheihna hi Pathian siam a ni lova, kan duhamna leh tanghmasialna avanga lo awm zawk a ni,” tih thu ropui tak chu lehkha pheka chhuin sang tak tak an chhuah.