'
Motto: "I thu chhiarin a siam che"

Wednesday, April 24, 2013

Mother Teresa Chanchin (Chhunzawmna)



Rawngbawl tura kohna



Naupang te a nihin Roman Catholic sikulah a kal a, tichuan sawrkar sikulah a kal leh a. An sikulah chuan naupang zai pawlah a tel ve a, “Sacred Heart” tih hla mawi an rem tumin naupang zaithiam tak a nih hriat tan a ni a, solo tura sawmna pawh a dawn nasa hle thin. Kum 12 anihin a chenna Skopje-a kumtin tawngtai tura hmun thianghlim a tlawh thin Black Madonna of Letnice-a a tawngtai lai chuan Pathian kohna mak tak a chang a, chumi tum chuan a nun hlana Pathian rawngbawl turin thu a intiam ta a. August 15, 1928 chuan kum 18 lai a lo ni ve ta a, mahni in leh lo chhuahsanin Ireland khawpui, Dublin-a The Institute of the Blessed Virgin Mary zirna hmunpuia Sisters of Loreto an tih hmeichhe puithiam sikulah a lut a. Kum 1928 October 12 khan mi thianghlim Therese de Lisieux hming chawiin Sister Teresa tiin a hming thlak a ni a. Chumi hnu chuan a nu leh a unau dang tumah a hmu leh tawh ngai reng reng lo.


Sisters of Loreto hmeichhe puithiam sikulah chuan English tawng nasa takin a zir a, a tum ber chu India rama mi rethei sikul naupangte lehkha zirtir a ni. Thlaruk a zir hnuin kum 1929, January 6 khan India ram a thleng a, Himalayan tlang bul lawka Darjeeling atangin a rawngbawlna chu a han tan phawt a. Bengali tawngte pawh zawi zawiin a zir chho zel a, hun rei lo te chhungin Bengali tawng chu a thiam ta em em mai a. Chutianga a rawngbawlna a lo hlawhtlin zel avang chuan sakhuana avanga hmeichhe inserh hrang mi thiamhlim nih duhna lian tak mai a rilruah a lo awm a, May 25, 1931 khan mi thianghlim ni turin pathian hmaah thuthlunna hmasa zawk a nei a. Hei hi Sisters of Loreto dana thuthlunna hmasa ber ‘First Professional of Vows’ an tih kha a ni a, hemi hnu hian thuthlunna/intiamkamna nghet an tih ‘Final Professional of Vow/Solemn Vows’ a awm leh a ni. He thutlunnaah hian intiamkamna pali siam thin a ni a, chungte chu: 

1. Retheih ka inhuam tur a ni. (Retheihna)
2. Ka Thianghlim tur a ni. (Thianghlimna)
3. Thu ka awih tur a ni. (Thuawihna)
4. Mi rethei berte tan kan theihna zawng zawngin rawng ka bawl ang a, ka inpumpek tur a ni. (Inpumpekna/inhlanna)

Chumi hnu chuan Calcutta khawchhak, Entally an tih hmuna Loreto Sisters-ten hmeichhe tana a bika an din St. Mary’s Bengali Medium Sikulah chuan zirtir hna thawk chhunzawm tura tih a ni a. He sikul-ah hian Geography leh History a zirtir ber a, a zirtir mai ni lovin amah ngein Bengali leh Hindi tawngte a zir belh zel bawk a, hun rei lo te chhungin Beagali leh Hindi tawngte chu a thiam nal ta em em a.

St. Mary’s Bengali Medium Sikula kum 12 chuang zet zirtir hna a thawh hnu kum 1944 khan headmistress/principal nihna a vuan ta a. Kum 1948 thleng khan St. Mary’s Bengali Medium Sikulah hian zirtir hna a thawk a ni. Chumi hnu chuan rawngbawl tura thuthlun vawihnihna (Solemn Vows/Final Professional Vows) an tih chu May 24, 1937 khan a nei leh a, hemi tum hian ‘Mother” tih hming a pu leh a, thu thleng hian Mother Teresa tih hming a pu hlen ta a ni. 

Zirtir hna chu a nuam tih ber a ni a, a zirtirnaah pawh a hlim em em mai a. Hetianga hun rei tak zirtirna a thawk chung hian Calcutta khawpui chhehvela mi retheite chu a theih ang angin a tanpui zel a, chu chu a nun tihlimtu ber a ni. Kum 1943 khan The Bengal-ah tam na sa tak a tla a, thihna leh natna mak tak takin khawvel a tibuai zo va, chumi rual rual chuan kum 1946 August khan Hindu leh Muslim-te inkarah buaina nasa tak a chhuak bawk a, chu boruak inlumlet chuan retheihna a tizual zel a, Teresa pawh awm hle hle thei lovin rawngbawlna zau zawk valh zel chu a thupui berah a neih ta a. A tawngtai ziakna bu-ah, “Aw Lalpa, heng mite hi I hnena ka rawn hruai theih nan chakna min pe la, an tan eng min nihtir ang che,” tiin a ziak nghe nghe a ni.
Print this post