'
Motto: "I thu chhiarin a siam che"

Friday, April 19, 2013

Mother Teresa chanchin


Pian leh murna
Catholic hmeichhe missionary zianga mi ropui ber leh khawvel mi zawng zawngtena an ngaihsan ber “Fahrahte Nu” tia an koh thin chu Mother Teresa-i hi a ni. Kum 1910, August 26 khan Macedonia ram (tun hma chuan Ottoman Empire tia koh a ni a, tunah chuan Republic of Macedonia tia koh a ni.) Skopje-ah a piang a, a nu leh pate chu Albanian hnam thlah zianga mi an ni. Unau pathum zinga a naupang ber a ni a, a u hmeichhia chu Aga-i a ni a, a u mipa zawk chuu Lazar-a a ni. August 27, 1910-khan batisma a chang a, a hming Agnes Gonxha Bojaxhiu tia koh a ni a, Agnes tih hming hi kum 18 anih thlengin a pu a. Catholic chhungkaw rinawm tak an ni a, kohhran leh khawtlang thilah pawh theihtawpa hnathawh thin an ni. A pa Nikola Bojaxhiu chu damdawi leh thil dang danga sumdawng thin a ni a, insakna lama contractor hna thawk thin a ni bawk. A nu Drane Bojaxhiu erawh sakhaw rawngbawlna kawnga mi thahnemngaih tak a ni thung. A pa Nikola -a phei chu sumdawnna lam mai abakah politic lamah nasa takin a tlan a, Albanian zalenna sualtute zinga a phusa ber a ni hial a. 

Kum 1919 khan a pa in a boral san thut a, Teresa pawh kum 8 chauh a la ni. Teresa pa Nikola hi engvanga thi ta thut nge  anih tih Teresa chanchin chhuitute pawhin an hre thei lova. Mi thenkhat chuan politic lama a inhnamhnawih avangin a hmelmaten turin an hrai hlum a ni ang an ti. Chutianga a pa in rin loh taka a thihsan thut avang chuan Teresa chuan a nu chauh chu rinchhan tur a neih chhun a lo ni ta a, a tan chuan a pa ang tluka a rinchhan tur awmchhun a lo ni ta a ni. Teresa nu hi sakhaw mi tak a nih mai abakah mahni invawng fel leh mi khawngaih thei tak, thilpek lama thahnemngai em em mi a ni a, a fanu Teresa pawh amah ang bawka mite tana a nun hlan a, thilpek leh mite tanpuia rawngbawl zel turin a beisei em em a, chutiang tithei tura enkawl leh kaihhruai zel chu a tum lian ber a ni. 

Chhuangkaw hausa tak ni lo mah se a nu hi mi rilru zau tak leh mi rethei khawngaih thei tak a nih avangin an khua mi rethei zawng zawngte chu chaw ei turin a sawm vek a. Chumi tum chuan a nu in Teresa hnenah, “Ka fanu, mite nena in ei lova, I ei tur I sem ve loh a nih chuan chaw barkhat pawh I bar tur a ni lo”, tiin fuihna thu tha tak mai a hrilh a, Teresa pawh chuan, “Anih leh ka nu, heng mite hi tute nge an nih?” tiin a zawt ta phawng mai a, a nu chuan, “Mi thenkhat chu kan chhungkhat lainate an ni a, a then erawh chu an ni lem lo, amaherawhchu kan mite vek an ni,” tiin a chhang a.

Chhunzawm zel tur>>>>
Print this post