'
Motto: "I thu chhiarin a siam che"

Tuesday, May 21, 2013

A Lalpa hnenah a chawl ta

Kum 1983 khan Rome khawpuiah Pope John Paul II thlawh turin a zin a, chutah chuan lung natna a vei tan tih hriat a ni a, chumi hnu kum 1989 khan a natna ngai bawk chu a rawn chhuak leh a. Kum 1991-a Mexico a zin laiin chuap natna in a belhchhah leh a, a lung na pawhin a tawrh phah hle a ni. Hetianga a hriselna a that tawk loh avang hian a nihna bansan turin dilna a theh lut hial a, mahse a hnuaia thawktu tam zawkten secret vote hmanga thutlukna an siam tumah amah bawkin hruaitu nihna thawk chhunzawm leh tura tih a ni.


Kum 1996, April khan Teresa chu chak lohna avangin a tlu thut mai a, chumi tum chuan a nghawngruh a titliak a, a dinhmun chuan hniam lam a pan ta zel chu a ni. 1996 August pawh khan malaria natna in a tlakbuak leh a, chubakah a lung na a rawn chhuak reng bawk a, a lung pawh zai hial a lo tul ta a ni. Damdawiina a mut lai chuan Calcutta Archbishop Henry Sebastian D'Souza-a chuan a va tlawh a, Mother Teresa awm dan hi ramhuai thiltihtheihnain a chimbuai anih ringin ramhuai umchhuak thei puithiam pakhat chu ruaiin Mother Teresa-i tibuaitu ramhuai chu umchhuak turin thu nghe nghe  a ni. 

A hriselna in hmasawn lam a pan theih loh avangin March 13, 1997 khan Missionaries of Charity hruaitu nihna chu a bansan ta a. Amaherawhchu a rawngbawlna a ngaih pawimawh em avangin Rome, New York leh Washington khawpuiahte a zuk zin leh hram a, nimahsela a taksa chak lohna avangin July thla khan a rawngbawlna hmun Calcutta panin a rawn haw leh ta zawk a, zan dar 9:30 PM ah Calcutta khawpui chu a rawn thleng thei hram a.

Chutichuan September 5, 1997 khan kum 87 mi niin a rawng a bawl thin a Lalpa hnenah thlamuang takin a chawl ta a. A ruang pawh Calcutta biakin ropui tak St. Thomas Church-ah karkhat zet dah a ni a, India sawrkarin vui a dil avangin India sawrkar chuan an hruaitu ropui Mohandas K. Gandhi leh Jawaharlal Nehru-te ang bawkin silaite hmetpuaka chawimawiin Calcutta khawpui a fanchhuahpui a, ram tina hruaituten a ruang chu zuiin September 13, 1997 khan ropui takin a vui liam ta a ni. Mother Teresa thih thu khawvela puanzar a nih chuan khawvel ram tinin an sun a, an tawrhzia entirna pawh hmun tinah tarlan nghal a ni. Pakistan Prime Minister Nawaz Sharif-a meuh pawhin, “Mother Teresa ang beiseina sang tak nei hi khawvelah mi tlem te chauh an awm a, mi danglam bik tak a ni. Mirethei chanhaite hmangaih taka a enkawlna hi a ropui em avangin khawvel mi zawng zawngten kan entawn tur ‘Nu’ a ni,” tih a sawi a. U.N. Secretary-General Javier Pérez de Cuéllar-a pawhin, “Mother Teresa hi United Nations a ni a, amah hi khawvel remna chu a ni e,” tih a sawi bawk.
Print this post