'
Motto: "I thu chhiarin a siam che"

Monday, May 13, 2013

Chawimawina leh lawmman a dawnte (Chhunzawmna V)


Mother Teresa-in mite tana thil tha tam tak a tih avangin leh khawvela remna leh muanna chawisanga rawng a bawl nasat em avangin chawimawina tam tak a dawng a. Chawimawina leh lawmman a dawn zawng zawng hi 124 zet a ni a, a vaia tarlan sen a nih dawn loh avangin a pawimawh zual chauh tarlang ila. 


Kum 1962, August khan President of India chuan Padma Shri (Padma Shree Award) chawimawina lawmman a hlan a, hei hi khawvel tana a hnathawh ropui tak avanga a lawmman vawikhat dawnna a ni. Kum 1969-ah the Jawaharlal Nehru Award for International Understanding a dawng a, kum 1971, January khan Roaman Catholic Pope hmasa ber Pope John XXIII hming chawiin Pope John Paul VI chuan Pope John XXIII Peace Prize a hlan a, hemi kum vek 1971, September khan John F. Kennedy International Award leh Boston atanga The Good Samaritan Award te hlan a ni bawk. Kum 1973, April khan Templeton Prize for "Progress in Religion" leh President of India hnen atangin Koruna Dut, angel of charity hlan a ni a. Kum 1974 khan Mater et Magistra chawimawina a dawng a, kum 1975 khan Albert Schweitzer International Prize a dawng bawk a, kum 1976 khan Pacem in Terris Award a dawng bawk a ni. Kum 1977 khan University of Cambridge, England chuan Honorary Ph.D in Theology ( Doctor Honoris Causa in Theology)  a hlan a. Kum 1978-ah The Balzan Prize a dawng a, a kum leh 1979, December khan The Nobel Peace Prize te a dawng bawk a. India ramin civil servant a hlante zinga chawimawina ropui ber Bharat Ratna (Jewel of India) chu kum 1980, March khan a dawng bawk a, Kum 1982 khan Australia ram chuan An honorary Companion of the Order of Australia chawimawina a hlan a, hemi kum vek hian The Catholic University Brussels, Belgium chuan Honorary Ph.D (Doctor Honoris Causa) a hlan bawk a ni. Kum 1983, November khan United Kingdom Kumpi Lalnu (Queen Elizabeth) chuan Order of Merit chawimawina a hlan a. Kum 1985 khan America President Ronald Reagan-a chuan White House khual lian atan a sawm a, The Presidential Medal of Freedom a hlan hial a. Kum 1987, August khan Soviet Peace Committee atanga Soviet Union’s Gold Medal leh Philippine ram atanga chawimawina sang tak Ramon Magsaysay Award for International Understanding lawmmante pawh a dawng bawk. Kum 1991 khan Senate of Serampore College, Serampore, West Bengal chuan Doctor of Divinity (D.D.), (honoris causa) chawimawina a hlan a. A pianna Albania ram pawhin 1994 khan The Golden Honour of the Nation a hlan bawk a. Kum 1996, November 16 khan America chuan Honorary Citizenship of the United States a hlan bawk a, (He lawmman hi mi 4 chauhvin an la dawng a ni) US bawk chuan kum 1997 June thla khan Congressional Gold Medal a hlan leh a, he mi kum hi Mother Teresa thih kum kha a ni.

Nobel Prize a dawn tumin, “Mi rethei leh chanhaite hian kan hmangaih a ni tih hi an hre ngei ngei tur a ni,” tih sawiin, “he lawmman ropui tak hi mi retheite leh chanhaite aiawhin ka dawng mai a ni e,” a ti a.
Print this post