'
Motto: "I thu chhiarin a siam che"

Wednesday, May 1, 2013

Mother Teresa Chanchin (Chhunzawmna III)



Rawngbawl tura koh vawihnihna

Kum 1946, September 10 a ni a. Hahchawl tura Calcutta atanga Himalayan tlang dung zawha rail a chuan lai chuan a zirtir hna chawlhsan turin leh Loreto Sisters rawngbawlna chhuahsana Calcutta chhehvela mi rethei tanpui hna thawk tura hriattirna mak tak mai a lo thleng a. Chu kohna chu Isua Krista kohna ngei a nih tih a hria a, chu kohna chu, “Chhungril Kohna” (The Call within the Call) a ti hial a ni. Chumi tum chuan Isuan a hnenah, “Teresa, India ramah hian mi rethei te, hmangaihtu leh lainatu nei lo te leh naupang dam lo te enkawl tur tam tak ka nei a, chung mite enkawl tur leh chhawmdawl tur chuan hmangaihna leh lainatnaa khat, sakhaw tana mi inpumpek ngam Indian hmeichhiate ka mamawh a ni. Nang chu mi sual, mi chak lo leh thiltithei lo I nih ka hria. Mahse I chaklohna chu ka ropuina tihlanna atan hman ka duh a ni. Ka thu hi I hnawl ngam dawn em?” tiin a zawt a.


Chu kohna chu Isua Krista kohna ngei a ni tih hre mah se Teresa chuan thuawih tura thuthlunna a lo siam tawh avangin amah thu mai chuan a rawngbawlna chhuahsan tura thutlukna siam har a ti a. An hotute hnenah dilna a thehlut ta a, kumkhat dawn lai a nih hnu kum 1948 January khan Local Arch Bishop Ferdinand Périer hnen atangin remtihna a hmu ta a. Chumi kum August chuan hmeichhe puithiam rawngbawlna Loreto Sisters chu chhuahsanin Calcutta khawpui chu a var leh a pawla tial sari inbelin a fangchhuak ta a. (Sari tih chu Indian hmeichhiate inbel thin puanbah a ni a, a var leh a pawla tial sari hi mipui hmaa a hak thin a ni a, a dam chhung zawngin he thuam hi a hmang).
Print this post