'
Motto: "I thu chhiarin a siam che"

Thursday, May 2, 2013

Mother Teresa Chanchin (Chhunzawmna IV)


The Missionary of Charity din a ni ta
Kum 1948 atang chuan Loreto Sister rawngbawlna hmuna an tih thin dante chu zawi zawiin a bansan a. India hmeichhiate tih thin angin a var leh a pawla tial Sari  inbelin Indian hmeichhe zingah chuan a khawsa ve ta a. Chumi hnu rei lo te ah chuan Indian ram mi nihna (citizenship) chu a hmu ta a, tichuan Patna khawpuia Holy Family Hospital-ah thlaruk chhung zet mai damdawi lam a zir leh a, chumi hnu chuan Calcutta khawpui daifem lama mi retheite leh hmangaihtu leh lainatu nei lo te hnena rawngbawl turin a fehchhuak ta a.

Calcutta khawpui Motijhil hmunah chuan sikul a sa tan ta a, a tum lian ber chu mi rethei leh chanhaite tanpui a ni. Hetianga a rawngbawlna hma a lak mek lai hian thlemna nasa tak a tawk a, harsatna leh manganna, rinhlehna leh hlauhnate chuan a nun an tibuai a, a nun hlui nuam tak chu ngaiin hnung lama kir te pawh a ngaihtuah a, a chhinchhiahna lehkhabuah pawh, “Lalpa chuan harsatna kross ka put a duh a, vawiinah hian zirtirna tha tak ka dawng a ni. Mi retheite harsatna hi engang tlukin nge a harsat dawn tih ngaihtuah chung zela chawlhna tur hmun zawnga ka vaihvaih lai chuan ka kut leh ke te hi an na zo va, mi retheite rilru leh taksa pawh keimah ang hian ei tur leh chawlhna tur zawngin a vakvai ve dawn a ni tihte pawh ka rilru chuan a ngaihtuah zel a, chutianga ka beidawn lai tak chuan nuam taka ka lo awm tawhna Loreto Sisters rawngbawlna lam pana haw leh ka chak em em a, ka rilru pawh nasa takin a insual a,” tiin a lo ziak hial a ni. Chuti chuan kum 1949 khan St. Mary’s sikula zirtirtu a thawh laia a sikul naupang 12 te leh zirtir a thawhpui mi thenkhatten an rawn tawiawm ta a, sawrkar atanga tanpuinate pawh tam tak a dawng bawk a. Kum 1950 October 7 khan Vatican (Holy See) atanga phalna chu a hmu fel ta a, chutichuan The Missionaries of Charity Sikul chu din fel a lo ni ta a.
 

The Missionary of Charity chu khawvel hriat a lo ni ta
 
Mother Teresa rawngbawlna chuan hun rei lo te chhungin mite hriat a hlawh hle a, India mi ropuite leh sawrkar hruaitute hriat hial a lo hlawh chho zel a, India PM meuh pawhin a rawngbawlna ropuizia chu a fak hle a ni. Khawvel ram hrang hranga hruaitute pawhin Mother Teresa rawngbawlna chu an ngaihven ta hle mai a, tanpuina sum pawh hun rei lo te chhungin tam tak a hmu a.  Kum 1965, February 1, khan Pope Paul VI chuan Decree of Praise an tih rawngbawlna hmun din phalna a hlan a, chutichuan Mother Teresa din The Missionaries of Charity chu International Religious Family-a puan a lo ni ta a. Kum 1950-1960 chhung khan phar enkawlna te, fahrah enkawlna te, tar enkawlna te, chhungkaw damdawiin te, HIV/AIDS dam lo enkawlna hmun te, khawvela mi rethei tanpuina hmun te, Refugee tanpuina hmun te, piang sual leh mitdel enkawlna hmuh te, zeng enkawlna hmun te, tui lian leh tam avanga harsat mangan tawkte tanpuina hmun te leh ngawlvei enkawlna hmunte pawh a din belh zel a. Kum 1965 khan Venezuala ramah hmeichhe puithiam 5 hmangin rawng a bawl tan a, chumi hnu chuan Rome-ah te, Tanzania-ah te, Austria-ah te, Eastern Europe leh Soviet Union thlengin a zauh zel a, a hnuah Asia, South Africa, Albania, Cuba, Middle East leh Latin America lamah te pawh a zauh belh zel a, a rawngbawlna chuan khawvel pumpui a nghawr chhuak ta a ni.
Kum 1971 khan New York khawpuiah “A Soup Kitchhen” damdawiin a hawng a, chutah chuan HIV/AIDS dam lo te a enkawl tan a, a kum leh 1972 khan Lebanon khawpui Beirut-ah a zin leh a, Beirut khawchhak lama awm Kristiante leh Beirut khawtlang lama awm Muslim-ho zinga fahrah naupangte chu la khawmin rinna hmun khata siam tumin nasa takin a bei a, he mi tumah pawh hian mite fak leh chawimawi a hlawh nasa hle a ni. 
 
The Missionaries of Charity rawngbawlna chuan khawvel ram tin a fangchhuak a, kum 1979 khan Communist ramah rawng a bawl tan a, Croatia ram Zagred-ah pawh rawngbawlna chhunzawm a ni a, 1980 khan East Berlin lamah zauh belh zel a ni bawk a, 1980-1990 chhungin Communist ram zawng zawngah Foundation 15 dinin rawng a bawl a, China ramah erawh phalna a hmuh theih loh avangin Mother Teresa pawh a beidawng hle a ni.
 
Kum 1985 October khan New York khawpuiah United Nations General Assembly chuan United Nations piancham 4-na ropui takin a lawm a, chumi tum chuan Mother Teresa pawh thusawitu atan sawm a ni a, hemi kum 1985 December 24-ah New York khawpuiah HIV/AIDS enkawlna damdawiin a din belh leh a, a hmingah “Gift of Love” a pe nghe nghe a ni.
 
Kum 1997 khan rawngbawltu hmeichhia puithiam 4,000 zet a nei tawh a, lay voluteers mi sang chuang zet a nei bawk a. Kum 1969, March 29 khan mi retheite tlawmngaia tanpui pawl (Co-Workers) tih din a ni a, kum 1990 khan thawktu mi nuai khat lai an tling tawh a, heng tlawmngai pawlte hian ram 40-ah rawngbawlna an nei a, mi tam takin lawmna thar beiseina thar an neih phat a ni. The Missionaries of Charity rawngbawlna chuan Foundation 697 lai dinin khawvel ram 123-ah rawng a bawl a. (Kum 2012 khan hmeichhe puithiam 4,500 an tling tawh a, rawngbawlna pawh ram 133 ah zauh belh zel a la ni.)
Print this post