Zoram Tang Fan Fan

By Tv. Edenthara (Tuivar) 

Zofate hi hnam vanneih kan va han ni teh lul em! Kan tun a sangin kan hmel a tha bawk si. Tum sang na na na chu kan tlakna pawh a la sang zel zawng a ni. Khawvel hmasawnna hian zofate hi kan duai bik hauh lova,eibar zawnna leh zirna lamah,zai leh rimawi lamah pawh nise tu dang kan ngai bik lo. Kan pi leh pu,kan thlahtuten vawin nia Zoram khawvel hi rawn hmu ve in, rawn hre ve se, lawm luat avangin biangah mittui a luangin zai an vawr ve ngei ang. Zoram han tih hian mi tam tak chuan tuna (Aizawl) ringawt khu rilruah kan dah pawh a ni mai thei. Mahse, kei Zoram ka tih ve chu Zo fate awmna,chenna hmun apiang hi Zoram ka tih chu a ni. Zofate hian kan ram han tih ve kel tur a ram leilung zawngin kan nei ve lova,khawchhak lama Chin State leh tuna Mizoram kan tih Zofate hmun pui ber pawh khu India ram chhunga State pakhat ve mai a ni a,ram a tling chuang lo. Mahse, Lalpan Mosia hnenah "In rah chin apiang in ram a ni zel ang" a tih angin keini Zofate pawh kan rah chin apiang hi kan ram atan Lalpan min lo pe hi a lo ni zawk. 

Suangtuahna rama pawh kan hmuh ngai lohna hmunah A kut chakin min hruai thleng zela,chumi rual rualin khawvel parmawina leh hnam dang chetzia hian Zoram hi a chimpil ang tih erawh a va hlauhawm tak em! A mi pekna hmun leh ramah hian eng chi te nge kan kuitiah tih erawh chu hun inher zelin a la par chhuahpui ang chu. Zoram tang fan fan han tih hian a ram chu leilung mai a ni a,tang tur a awm lo. A tang tur ber a chu i thinlung,i ngaihtuahna rilru leh i chakna tha zungzam kha a ni zawk. Zoram chhiatna leh thatna hi keimahniah a awm tih hrereng i la, Daduhi hla, "Mizo tlangval rual chhuanawmte u,intlawm mai dawn em ni,ruihhlo tin reng tawnah, phengphehlep khua a tlai hma ngei hian hara puanven sawichhing a hun Zoram tan"a tih anga, mihrang sahrang hmaa zam ngai lo Chhuihthangvala ruihhlo tawnah i tlawm leh mai si chuan Zoram hi chhantu nei lovin a la boral mai ang. Mi puitlingte hnam nun leh zia intehna bulpui ber chu hmeichhiate nunah hian a ni chawk. Kan inchei duh dan, kan tawqngkam leh chetzia hi miten min thlir reng a ni tih hrereng i la,kan nuna hmuh an tum ber chu kan sakhaw vawn leh hnam nun ze parmawi hi a ni. Chuvang chuan khawi hmunah pawh kal i la hnam nun vawngtu kan ni tih hi hriat a pawimawh tak zet. Hnung zawng ena vawr tha tak mautuai tlawn ang mai a mar tha zaih, hma zawng en erawha lungchhiatthlak tak i nih leh si chuan Zoram hian hma lam aiin hnung lam a pan a ni ang. Chuti a nih chuan vawin nia Zoram khawvel hi hnam dang unauten engang takin hmu ve ang i maw le? 

Hringnun khawvelah hian nungchang kan tih hi a pawimawh ber fova. Thufing chuan " Hausakna chan chu chan lo ang kan ni,hriselna chan pawh tlemte chauh chan kan ni,mahse nungchang ber a chhiat erawh chuan engkim chan kan ni" a ti. Kan hmel leh pumrua hi tha teh viau mahse kan nungchang ber a that loh erawh chuan,sana mawi tak hun vawng dik lo, neitu bum hmang an sawi kan iang viau lo ang maw!!! Tunlai khawvel hmasawnna sang zelah,vawiin ni a Zofate min chawikangtu leh kan ram min zauhtu hi Chanchin Tha a ni kan ti lo thei lo. Chanchin Tha hian malsawmna leh finna a keng tela,mahse a chhiar thiam lotu apiangte tan chhiatna a ni thung. 

I ram thanlenna leh i hnam par mawina Chanchin Tha hi i theihnghilh hun chuan Zoram hi chhantu ngaiin a la rum ngei ang. Kan ram, kan hnam leh kan Christian nun tungdinga a chhe lai siamtha turin nang leh kei hi Lalpan min ruat a ni tih hrerengin khawi hmunah pawh awm mah i la.i ram leh hnam tan tang fan fan ang che. A tawp ber a tan, kan sakhuana leh kan hnam nun hian kan hringnun hi vawng tlat se la, mizo kan ni a kan chettlatna hmun apiang hi zoram a ni kan tih tawh kha. Chuti ni lova,Zonuna hnam dang nun a parchhuah deih chuan Zoram hian chhantu nei lo leh hnemtu ngaiin a la kur ngei ang. Chuvang chuan Zoram tang fan fan ang che,hun a liam hma ngei hian...aw...Zoram tang fan fan!!! Chhiartute Lalpan malsawm mawlh che u rawh se.