Sim vang vang atana tha ka tih chu!!!

Tuino leh tuium hmui dai khera in hi!

Inrin tlai a ni a, thiante nen Table Tennis kan khel a, kan hah chawlh chhungin ka tuiuma tui ka in a, ka thianpa chuan, “Thiana, ka lo in ve,” a ti a. Tichuan ka tui chu ka pe a, ka tuium chu hmuam pukin a in ta a. “E, thian pa, khawngaih takin ka tui kha hmui daiin in suh aw!” ka ti a. Ka thianpa chuan,” E Khai, I va Vai ve a, Vai kan nih loh hi!” a ti a, ka rilru te te chuan, “I va’n mawl tak!” ka ti a, ka tui chu ka dil let duh ta lo va.

Tuino leh tuium dai lova tui in hi Vaiho tih tur bika ngaih tur a ni lova, kan tana tha leh him zawk a nih avangin kan tih ve atana thil tha tak a ni. Mahni mimal puala tuino/tuium kan hmang/nei a nih erawh chuan kan tuium hmuamin in mah ila a pawi reng reng lo. Mahse mitin in tur atana an dah tuino/tuium leh thianthate tuium hi chu hmui dai lova in thiam tum hram ila, chu chu thil tha leh mawi a ni a, a finthlak zawk em em a ni.

Keini khawteah chuan tuivawtbel kan hung mai zel a, chu tui chu zu in pa pawhin a rawn in a, khaini hmuam mite pawhin an rawn in bawk a, zial leh kuhva timite pawhin an rawn in bawk a, ha nawt ngai lo leh thawuih mite pawhin an rawn in bawk a, chutiang chuan no pakhat chu kan in hmantawm luih luih a, engti kawng mahin a thianghlim thei lo a ni. Hetiang chung pawha natna kan inkaichhawng zung zung lo te hi a vanneihthlak ka ti ngawt asin! 

Chuvangchuan tui in chungchangah fimkhur ila, hmui dai kher lova tui in hi natna inkaichhawn theih laka kan invenhimna a nih ang bawkin mahni tuium lo chu hmui dai lova in thiam zir theuh ila, hmui dai kher khera tui in ka tum thlat hi sim vang vang atan tha ka ti a ni e.

I ngaihdan a nih loh pawhin kei chuan sim vang vang atan tha ka ti a, tunah tha ti lo mah la, nakinah tal chuan tha i tih ve ngei ka beisei.