Babylon Kulhpui

"The Richest Man In Babylon" by George S. Clason

 Compiled & Translated into Mizo by Lehkhabu Khawvel

 

Van Sar an tih sipai putar tawh tak pakhat hi a awm a, amah chu Sargent a ni. A naupan lai chuan pa tisa tha tak leh pa awm-khauh tak mai a ni a, indo hmunah pawh a hma lama kal thin a ni. Mahse a kum a lo upat a, a chaknate a lo kiam tak chinah chuan ral hmuna kal tawh lovin kulhpui venghimtu zingah a tel ta zawk a.

Heti hun lai hian Babylon ram chu khawvela ram chak ber leh ropui ber a ni a, a kulh ropuizia leh rinawmzia chu khawvel zawng zawnga mite hriat a ni a, hmelmate pawhin Babylon kulh tihchim chu an huphurh ber thil a ni.

Babylon kulh ropui tak chungah chuan mihring kal kawng a awm a, chu kalkawng tawpa lawnchhonaah chuan Pu Van Sar-a chuan kulh venhim hna pawimawh tak thawkin, kil tin atanga hmelma rawn beitute chu theihtawp chhuahin a lo beilet thin a. Hmelmate kuta an boral lo nan leh khawpui a tlukchhiat loh nana mawhphurtute chu kulh vengtu sipaite huaisen leh huaisen loh, rinawm leh rinawm lohva a innghat a ni. Kulh pawn lamah chuan hmelmate authawm leh an sakawr hram ri hriat tur a awm reng a, kulh khar nana an hman thing leh dar mum ri bung bungte leh chhunglam leh pawn lama sipai inralring renga awmte thawm pawh hriat tur a awm reng bawk a.

Babylon chu ropuiin sipai tam tak nei mah se hmelma tam tak a neih tlat avangin sipai zohotu leh a sanghotute chuan khawchhak lama Elimite ralte an va bei a, kulh venghimtu atan sipai tlem te chauh an dah a. A chhan chu an hmelmaten an rawn beih thut an rin loh vang a ni. Hmar lam atanga Syria sipai tam takte chuan rin loh takin Babylon chu an rawn run ta thut mai a, Babylon sipai an tlem zawk avangin an tan chuan thih ngam lu-pu-a tanlak a tul tawh a, he inbeihnaa an hneh lo a nih chuan Babylon hausakna leh ropuina zawng zawng chu Syria-in a la bo vek dawn tih chu mitin hriat a ni. Syria sipaiten Babylon sipai tam tak an that tih an mit ngeia an hmuh chuan Babylon mipuite chu mangang leh hlauin an khur a, thlabarin an tlan a, an biangah mittui a luang a, an taksa chu thlanin a bual a, indo a reh hnua thil awm dan turte chu an hriat chak ber a ni ta.

Indona chu a sosang zel a, tunah chuan a vawrtawp a thleng ta! Syria sipaite chuan khawpui chu nithum zet an hualbet tawh a, tunah chuan Babylon kulhpui sutchhiat chauh chu an tih tur awm chhun a ni. Syria sipai rualte chuan kulh chunga lawnchhoh tumin lei sang tak tak an dawh a, Babylon sipaite pawhin fei leh thalte hmangin theihtawp chhuahin an lo beilet ve a, rawn lawn chhoh tum apaingte chu tel sa in an lo leih zel bawk a, Syria thal thiamte thal leng vel pawh ruah angin a sur bawk a.

Pu Var Sara chu indona leh inbeihna dinhmun fiah taka hmuhtheihna hmun laili takah chuan a awm a, a kianga putar pakhat lo kal chuan, “Ka pu, kulhah hian hmelmate an rawn lawn chho thei em? Ka fate la sipai zohotute nen ral hmunah an kal a, ka nupui chauh inah a awm a, kan hmelmate an rawn luh chuan kan neih zawng zawng chu lak bovin a awm dawn si a, ei tur nei lovin kan awm ang a, keini pawh salah min hruai ang a, mi ramah sal thihin kan thi mai dawn si a, he indona hi engang dinhmunah nge a awm tih khawngaih takin min han hrilh teh,” tiin aw khur der der hian a zawt a.

Pu Van Sara chuan, “E, ka pu, thlaphang reng reng suh! Lal in kan venhim ang bawkin nangni pawh kan venghim vek dawn che u alawm! Babylon kulhpui hi khawvela kulh ropui ber a ni asin! Thlamuang takin i in lamah han haw tawh! Fei leh thalten an fuh palh ang che!” tiin a lo thlamuan a. Chumi hnu chuan nu pakhat hi a lo kal ve leh a, “Ka pu, inbeihna engtin nge a awm zel? Ka pasalin hliam na tak a tuar a, mahse kan nufa tana a thlamuan theih loh avangin amah ngei chhuaka beih a tum tlat mai a, ral an rawn luh chuan kan neih zawng zawng hi an la dawn si a, kan thla a muang thei lo a ni,” a rawn ti ve leh a.

Pu Van Sara chuan, “Ka nau, thlamuang takin I in lamah va haw tawh! I pasal leh I fate chu va enkawl zawk rawh! He Babylon kulh ropui hian mipui zawng zawng a venghim vek dawn a ni. Kan kulhpui hi han en teh! Hetiang anga kulh ropui hi a awm leh thei tawh ngai lovang! Engang hmelma leh ralte mahin an tichhe thei dawn lo! He kulh hi kum 100 kal ta khan lalnu Simirameh-in rinawm tak leh hmathlir thui tak neia a lo din a ni a, eng ral mahin an la tichhe ngai lova, tun hnuah pawh nghet takin a la ding zel dawn a ni. Tuna I hriat ri te chu kan sipaiten kulha rawn lawnchho kan hmelmate tel-in an leih a, an mangang authawm a nih chu! Engmah hlau suh ang che, thlamuang takin va haw tawh!” a ti a.

Pu Van Sara chuan a hna chu rinawm takin a chhun a zanin a thawk zel a, anmahni tanpui tura rawn haw sipaite rawn kal dem demte chu hla tak atangin a lo thlir reng a, kulh chunga hliam tuar an zawnthlakte pawh chu a thlir reng a. Mangang leh hlauthawnga awm mipuite pawhin Pu Var Sara thlamuan tawngkam hriat tum chuan an rawn pungkhawm a. Sipai rinawm tak anih angin inbeihna chungchang rawn zawt apiangte chu a lo thlamuanin a, rilru sei takin a lo hrilh zel a.

Inbeih tan ni atang khan karthum leh ninga chiah a ni ta! Mahse inbeihna chuan kiam lam a pan thei chuang lo. Syria sipaite chuan tha thlah hauh lovin tan an rawn la zel a. Hlauh thawn avanga thlanchhia te, mangang authawmte chu hmun tinah a awm a, inbeihnaa thite ruang tam tak avang

chuan leilung chu thisenin a khat bawk a, zan lamah sipai thenkhatten ruang phum hna an thawk tluk tluk bawk a.

Karli a nih pawhin inbeihna chuan kiam lam a pan thei chuang lo. Mahse vanneithlak takin a tuk khaw a rawn var meuh chuan boruak a lo dang ta! Hmelma beidawngte chu Ni chhuah rualin an kir a, kulh chunga ral vengtute chuan, “Hnehna kan chang ta! Hnehna kan chang ta!” tiin an au va. A hnuai lama sipaite pawh chuan chu hnehna hla mawi chu an rawn zawm ve thup thup a. Chumai a ni lo! Babylon khaw pumpui chu hnehna hla thawmin a khat a, kawmkar leh inchhunga birute pawh kawngpuia rawn tlanchhuakin hnehna hla sa in an zuang a, an lam a, lawm hla an rem thup thup a. Chuti lai tak chuan Bell tower atangin hnehna meialh a rawn chhuak a, Babylon khawpui kil tawp thlengin hnehna hla mawi chu a thangkhawk ta a ni.

Babylon kulh rinawm tak avang chuan a mipuiten thlamuanna thar an nei leh thei ta a, hmelma lak ata a mipuite a chhanhim theihna chhan chu hmathlir thui tak neia lalnu Simirameh-in he kulh ropui hi a lo din vang a ni. Kil tin atanga an hmelmaten an rawn beih pawha chhe thei mai lo tura inbuaisaihna tha tawk an lo neih sa avangin hmelmaten awlsam takin an tichhe thei lova, mi zawng zawng tan chhandamna kulhpui a lo ni ta a ni.

Hmasawnna kawng kan zawh mek lai hian harsatna leh manganna, lungngaihna leh tahna ten kan hringnun an tibuai thin a, kan hmelmaten hneh tumin min bei chamchi a, beidawng leh chauvin kan awm fo thin. Mahse hmathlir thui tak nei a, inbuatsaihna tha tak kan neih phawt chuan chung zawng zawng chuan min hneh thei dawn lova, kan manganna leh lungngaihna chu lawmanah kan chantir thei dawn a ni tih he Babylon kulhpui hian min zirtir a tum chu a ni.