Vân bank-a ro khâwltu C.T. Studd-a (1860-1931)

By: Joseph Saia (Australia)

“If Jesus Christ is God and died for me, then no sacrifice can be too great for me to make for Him.” (C.T. Studd) 

C. T. Studd-a hi a hun lai chuan England rama cricket khêl thiam bera an sawi, mi lâr leh hmingthang tak a ni a, mi hausa tak chhûngkua aṭanga piang leh sei lian a ni. Kum 1880 chho aṭang khân criket khêl thiam ber tiin khawvêl chuan a ngaisâng êm êm mai a; mahse, kum 1873 chhova evangelist ropui D.L. Moody-a leh a thawhpui Sankey-a ten Kumpinu awp thliarkâr hrang hranga kum thum chhûng atâna an duan lawk, Chanchin Ṭha hrilh beihpui an thlâk lai khân Mr. W-a an tih thuhriltu (evangelist) pakhat Pathian thusawi aṭangin a piang thar ta hlauh mai a. Hannah Whitall Smith-i ziah 'The Christian’s Secret of a Happy Life (Ringtu Nun Hlimna Thurûk) tih lehkhabu a chhiar hnu phei chuan a nun pum Pathian tân a hlân ta hial a ni. 

A pian thar hnu chuan a nun pawh a danglam nasa hle a, “Isua Krista hi Pathian a nih a, ka tân a thi a nih si chuan ka tâna a tawrhnate chu engti kawng mahin ka rûl sêng dâwn lo,” tih thu hi a rilruah a khat liam a. A hnuah chuan khawvêl ropuina leh hmingthanna zawng zawngte kalsanin a dam chhûnga Pathian rawngbâwl tûrin missionary atân a inpe ta a. China, India leh Africa rama a rawngbâwlna chanchin leh harsatna tam tak pal tlanga rinawm tak leh chhêl taka Isua hnung a zui dânte chuan mi rilru a hneh hle a, mission rawngbâwlna lama kohhranhote meichher chhitsaktu leh chawk phûrtu a ni hial a ni.  

        

C. T. Studd-a hian China leh India ramah kum 16 chhûng ngawt rawng a bâwl a. Chumi hnuah Pathian kohna chhângin kum 1910-ah khân Africa ram lamah puanthuah têlin a feh chhuak leh ta a. Africa hnam mâwlho zîngah harsatna leh manganna nasa tak tuarin kum sâwm leh pariat chhûng teh meuh Chanchin Ṭha a vahvaihpui leh a, a dam lâi nî a kin thlengin beidawng lo leh chhêl takin Pathian rawng a bâwl a ni. Amah anga ram hrang hrang pathum, mizia leh nunphung inanglo tak kâra hun puma Chanchin hrila thih chilh zui ta hi an awm âwm lo ve. Ama'n a lo sawi tawh ang ngeiin a thlân chu rahchhana hmangin mi tharten Africa khawmualpuiah Chanchin Ṭha an pu lût zêl a, Africa ram hmun tinah harhna pawh a thleng nghe nghe a ni.