CIVIL DISOBEDIENCE MOVEMENT (CDM) A HLAWHTLING ZÊL

By: Tluanga Chhakchhuak 

(Myanmar New Year lâwmna ṭhulh. Silent Protest CDM huaihawt zâwk)

LAL kham lo sipai lal  Gen. Min Aung Hlaing hi kum 65 a ni tawh a, a pension a hun tawh chung  pawha a chawlh duh miau loh vânga a pension kum pawh kum 65  tiin a tidanglamtîr a, kum 65 a tlin hnu leh zel pawh President /Prime Minister ang thuneihna chan a tum leh zêl hi chu Myanmar mipuite tân a vânduaithlak a ni. A thlawp party lah ârte lukhawnin namen lovin chaurau ek an thai tâk si avângin TIH NGAM LOH ENG MAH KA NEI LO titu hian a hote nên suahsual an bâwl mêk a ni. A zâr lo zo tum phet rûl rilru pû chin Rûlputara te vua leh vang  ho lah hian  heti khawpa mipuite thisen a luan tawh pawhin setana leh Hitler-a pawhin êm êma a tih hial tûr Sual Sipaiho hi an lo la ṭan thei a nia maw le.

Sual sipaiten thuneihna an pâwng lâk hnu lawkah Health Department aṭangin  Doctor rualten sipaiho din State Administrative Council sorkar chu  CDM hmangin a dodâl nghal a, kâr lovah department hrang hrangten an rawn zawm ve nghâl a, mipuite pawhin an rawn thlawp nghâl avângin ram pum huap CDM chu a hlawh tling hle mai a, 95% in thlawp a hlawh a ni.

CDM  movement  hruaitu zînga pakhat CRPH  Minister Dr. Zaw Wai Soe chuan sorkar rorêl khâwl zawng zawng hi CDM vângin kan chawlhtîr thei deuh vek tawh a ti. Total bandh angin kan chawlhtîr ṭhup thei a ni a ti.

Sipaiho hian mipui sorkar an nam thluk aṭangin ni 70 a chuang tawh a, sipai leh police tih loh chu eng sorkar hnathawk mah a thunun thei lo va, sorkar damdawiin a chawl thup a, sorkar bank leh private bank an hawng lo va, ram chhûng inkal pawhna ber Railway Service Staff-te an CDM vek avângin rêl pakhat mah a la che sawn lo bawk.

Banking lam phei chu CDM avângin midang pawh an aiawhin lo thawhtîr dâwn ta se technically-in an tlin chuang lo hrim hrim a, damlo khirh tak tak enkawl a emergency-a damlo zaidam ngai OT luh pui tûr chuan an sipai doctor-te thiamnain a tlin lo. An mi man râpthlâk taka an nghaisak hnua thite ruang lo post mortgage  hi an thiam tâwk a ni mai.

CDM thlawptu mipuite chunga Sual Sipaite nun rawng taka chêt dân hi ni tin hian a rawva zêl tih mipuiten kan hmu a, sipai sorkar chungah engti kawng zawng mahin rinna nghah ngam pawh a ni tawh lo.

Sorkar pawh an ni lo va, mipuite thuneihna chhuhsaktu suamhmang rual an ni a, mipui rohlu Myanmar leilung hausakna zawng zawng China leh Russia hnêna hralh ral veka anmahni SAC chauh hamṭhat tum hian eng ram mahin a la pawmpui lo va, an pahrawn China leh Russia pawhin a lang a pauvin a hriatpuina Recognition a tichhuak ngam lo bawk.

Myanmar ram kum thar hi April ni 17 hi a ni dâwn a, an nghahhlelh êm êm kum thar hmuah nâna an hman ṭhîn Myanmar Traditional Water Festival pawh hmang hlei thei lovin CDM symbol in a luah lan ta a, Tuitheh kut hi ni 5 chhung awh ṭhîn  a ni a; mahse, kumin chu sipai rorelna duh loh lantîr nân hman a ni thung.

Hnungzuitu mipui neilo sorkara Arsi bel ṭeuh nih hi ka zah zâwng tak a ni a, rilru lama pianphunga rualbanloten Traffic Police Officer uniform haa kawngpui lunlai vêla ham rik an lo ham vêl te nên ka hmuh dân a dang chuang lo ve. SHHALA