NO. 77 LIGHT INFANTRY DIVISION HI MYANMAR ZOFA SIPAI ṬANGTE AWMNA BIK A NI LO

(CHIN BATTALION A AWM TAWH LO)

By: Tluanga Chhakchhuak

Tûn hma deuh chuan Zohnhthlak sipaite hi Chin Battalion hrang hrangah an ṭang ṭhîn a. 1st Chin Rifles Battalion ,2nd ,3rd leh 4th Chin Rifles Battalion lamah an lo ṭang ṭhîn a, kan pute hunlai chuan Chin Hills Battalions tiin British sorkarin an lo dinsak a, an huaiin an chak bawk a, Burma ramah chuan hnam dang sipai zîngah hriat an hlawh hle ṭhîn.

Light Infantry Division (LID )hi Kâwl ṭawng chuan (Chay Myan Tat Mah) tiin koh ṭhîn a ni, LID commander atân Brigadier General hian a ho ṭhîn a, a command-na hnuaiah hian Light Infantry Battalions 10 a awm a ni. Battalion tin hian Lt. Colonel rank sipai officer pakhat hian a command chhawng leh ṭhîn a ni.

Myanmar Army hian helho bei tûra rang taka râl rama che vêl thei tûr (rapid reaction mobile force) atân LID hi din a ni a. No. 77th Light Infantry Division chu 6th June 1966 khân din a ni.

Mi ṭhenkhat hian Zohnahthlakte hming tihliau tumin 1988 kuma zirlaiten sorkar duh lohna lantirna 8888 Uprising tudaitu sipai 77 Light Infantry Division hnuaia sipaite chu Chin hnam Zohnathlakte an ni tiin an sawi ṭhîn a, hei hi belhchian a dawl lêm lo ve. Kumin Yangon khawpui chhûnga rawva taka che vêl sipaiho pawh hi a mi mal chuan tlângmi Zohnahthlak pahnih khat vêl chu lo awm ta ang pawh nise Zohnahthlak tlangvâlten Burma sipai an ṭan lohna a rei ta hle mai. Burma sipai ṭan hi an hlawh a bei tham em mai a, râl rama nunna chân palh a hlauhawm vângin a aia hlawh tam zawk inhlawh theihna Singapore, Malaysia, Midle East ramte Europe ram leh America ramah hna thawkin a tam zâwk hi an kal bo deuh duak a, khaw hmun nghâk thalaite chu lehkha zir laklawh-te, nu leh pa enkawl ngai, mahni hna thawk thei chin chauh hi an awm ta zâwk a ni.

Tichuan, LID chanchin hi sawi chhunzawm ta ila. No. 88th Light Infantry Division leh 99th Light Infantry Division pawh chu a kum zawn in 1967 leh 1968 kum khan an din nghal ta a. No. 77th Light Infantry Division hi Myanmar Army zînga hriat hlawh ber niin 1970 bawr vêl khân Communist hel pâwl CPB (Communist Party of Burma) tawm khâwmna hmunpui, Burma ram hmun laili tak (Central Bago Mountains) aṭanga um chhuaktu sipaite an ni. 

Light Infantry Division dang 3 hi 1970 hnu lamah hel ho dorem nân hawn belh leh a ni a, No.66th, No. 55th and No. 44th Light Infantry Division tiin an headquarters theuh chu Pyay, Aungban leh Thaton khawpuiah an din belh zêl a ni. Kum 1988 hnu lama sipaiin thuneihna an lak (Military coup) leh khân No. 33rd LID chu an hmunpui Sagaing khua leh No. 22nd LID headquarters chu Karen ram Hpa-An khawpuiah din leh a ni.

Sipai hian a ram chhûng dorâl Ethics Armed forces-te hi bitum tur a ngah hle mai a, No 11th LID chu December 1988 khân mamawhna a san êm avângin Yangon aṭanga hla vak lo Inndine Township Bago khawpui bulah a din leh a ni. Sipai ṭha a chak chuan ram inrêlbâwlna chu a chak ang tia ring tlattu Myanmar sipai lalte chuan 1991 kum khân 101st LID din lehin an headquarters chu Burma ram chhim thlang lam Pakokku khuaah a din leh bawk.

LID hi Commander atân Brigadier General (Bo hmu gyoke) level officer hian a awp ṭhîn a, Division khat hnuaiah chuan Light Infantry battalion 10 a awm tlângpui a ni. Chu Light Infantry Battalion te chu special taka counter-insurgency leh jungle warfare lam zir chhuakte an ni.

Ethnic hnam helho leh ruihhlo lama sumdâwng ṭhînte a do a ni ber mai. Tin, battalion 3 theuh chunga hotu atân Tactical Operations Commander (TOC; Nee byu har Hmu) hi ruat an ni leh bawk. TOC chu commander atân full Colonel (Bo hmu gyi) in a ho a. A hnuaiah hian laipui leh Tank car lam hmang chi Field Artillery units an dah tel bawk ṭhîn. Tichuan, Supply &Transport unit, Signal Units, Medical Unit ten an puibawm ṭhîn a ni.

Myanmar ramah hian kan hriat theih chinah 11th, 22nd, 33rd, 44th, 55th, 66th, 77th, 88th, 99th leh 101th Light Infantry Division a awm a, tûn hma chuan mipui venghimtute an ni a, mipuiin an thlamuanpui hle. Tûnah erawh chuan sipai tih ṭawngkam hian kan thinlungah a tla na tawh lo hle a ni.