Theipui kung aṭanga tehkhin thu zir tûr (Matt 13:28)

By: Bishop Bawlliana (Tahan) 

Kan Burma ram buaina Spring Revolution hun leh hunbite hian awmzia nei takin Pathian remruatna a rawn thleng ni hian alang a. Hun hian kan nun a ṭha zâwng leh chhe zâwngin a tidanglam zêl chu a ni hi maw. 

Kristiante Ni ropui hun leh hunbi inhnekrem dân hian siamtu ropuizia a tilang a. Thlasik khawvawt nawm lai, kawrlum mawi nêna inchei nawm lai leh Tleizawng pârte vur tlain a bawh vâr seng seng hun leh Kristmas kan hmang ṭhînte hi a lo inhmeh êm êm a ni a.

April thlaah hnah hluite an ṭil a, a ṭang a lo no va, a hnah no a lo chawr chhuah lai takin Good Friday te, Ester Sunday hun a lo ni kher te hian mihringah awmzia a neihtîr riau a, kan mihring hlui tihṭil a, tiboral a ni lai leh tho leh Kriataah nun thara kan chawr chhuah pian lehna nên hian a inhmehin a inrem êm êm a, Lalpa hian rem hi a lo ruat fel a ni.

Tûnlai kan ram buaina hian Spring Revolution te hi a Pathian program riau mai a. Kan Bible-a kan hmuh angin Lal Isuan hêng theipui kung aṭangte hian zir rawh u a ti a. A ṭang a lo no va, a hnah a lo chawr chuan nipui a thaw dâwn tih in hre ṭhîn. Chutiang in hmuh hun chuan Krista chu a lo hnai tawh a, kawngka bul ngeiah a awm tih hria ang che u, a ti a. Chûng zawng zawng chu a thlen hma loh zawng tûnlai chhuante hi an ral lo vang, Ni pui thawk tûr inthlak hun lai taka kan ram S-Revolution a lo awm hi Lalpa remruat hun leh duh dân tak a ni ngei hi a rinhlelawm lo hle a. 

Hunin hnah hluite a thlâk angin kan chhuan tharten sual sipaiho thlâk kan tum tlatte hi Pathian Program tlat a ni. A chhan chu chhuan tharte tih leh Kriata hi mi thuhmun ang a ni a. Krista chhuan thar hian Juda kulmuk Pharisaite leh Sadduhkaite tih dân hlui vuan tlattu an nih kha a rawn hnâwlsak a, hetiang chiah hian kan Genaration Y, Z ten Burma sual sipaite nihna mai ni lovin thing hnah a ṭil angin sual sipai nihna tihṭil vek hi kan duh dân a ni ta bur mai a.  Tih dân hlui denchhena chel tlat tumtu hnâwl bo hi Krista tum ber a ni a. Kan Burma mipui kan inlungrual dân êm êm hi Pathian remruat a nih lo chuan hetianga rilru hmun khat, tum thuhmuna awm tûr hian a theih lo vang. Pathian malsawmna ram leh mihringah a lo thleng theihna tûr chuan rilru hmun khat awma inlungrualnaah Pathian malsawmna a lo thleng ṭhîn a ni. 

Sual sipaihote u, Pathian Thlarau Thianghlim hnathawh lo thleng hian a lenbo khawp ang che u. Hun leh hunbite tidanglama lalte sawn bo va, lalte tungdingtu, mi fing hnênah finna petu, hre thiamtu hnênah hriatna petu kan Pathian a ni. Mi tu mahin Pahian hmaah chuan chhuanlam an nei thei lo vang. Pathian chu thilsiamahte hian a lang a ni tih hian ka wall hi luah ve teh se.