INKAHHAI AN PUANG TA

 INKAHHAI AN PUANG TA – 

By: Familia Fanai Lalṭansanga

Israel leh Hamas indona chu ni 11 hnuah inkahhai an puang thei ta. Israeli Defence Minister Benny Gantz chuan Israel sipaite hian kan rin phak bakin hnehna kan chang a ni, a ti. Hamas lam hotute pawhin hnehna kan chang a ni, an ti ve tho mai. He inkahhai hi Palestinian mipuite tân hnehna chhinchhiahna a ni a, Israeli PM Benjamin Netanyahu a tlâwm tih entirna a ni, an ti a. Jerusalem mosque pakhata loudspeaker aţangin “He Jerusalem Ngunhnam Indonaah hian Palestinian te hian hnehna kan chang a ni,” tiin a puang dum dum mai. Gaza khawpuiah mipui a maka maka tam pâwnah chhuakin an pung khâwm chiam a, lirthei chi tinrengin kawng an zawh mup mup a, hlim leh lawm takin an au dur dur mai a ni. 

Inkahhai hi an rama 21.05.2021, Zirtawp zîng dâr 02:00 (23:00 GMT) aţang khân a inţan a, US President Joe Biden chuan White House the Cross Hall-ah he inkahhai hi ngemnghetin thu kamhnih khat lek a sawi a. An buai chhung zawng khân United States chuan Hamas leh a sa ngâwi zâwnpui , firfiak hovin rocket hmanga Israel ram chhûng an râlsainaah Israelin a ram humhim theihna dikna chanvo a nei tih hi a pawm tlat a ni, a ti. 

US chu UNO nên Gaza ram siam thar lehna leh mipuite chhawmdâwlna khawngah lungrual takin kan thawk dun zêl dâwn a ni. Palestinian Authority nên pawh chhawmdâwlna hna kan thawk dûn zêl bawk dâwn a, Hamas hi chu kan thawhpui thei hlawl lo a ni, a ti a. He inkahhaina awm thei tûra a kûl a taia palai hna thawktu Egyptian President Abdel Fattah Al-Sisi hnênah lâwmthu a sawi bawk. Israel leh United State chuan Israel rama Arab leh Judate nun humhim nân Iron Dome system kan lo siam khân nunna tam tak a chhanhim a, he Iron Dome system hi ţha zawk leh changtlung zâwkin kan siam thar leh dâwn a ni, a ti bawk. 

A thusawi hmawrbawk nân Joe Biden chuan, “He hun hi Israel leh Palestiniante inkâra inremna siam kawnga hmasâwnna duhawm tak awm theihna hun remchâng tak ni thei tûrin  ka beisei a, chutiang awm thei tûra hma la tûr chuan ka inkau reng a ni, a ti. 

Ni 11 an inkah chhûng hian Gaza-ah Palestinian mi 232 an thi a, Israel lamah ni 12 an thi thung a ni. 

Egypt chuan Israel leh Palestinian territory-ah an inkahhai kengkawha enzui tûrin  vênghimtu sipai palai (security delegation) a thawn lût dâwn a ni.