SAYA!!

By: Thangmawia

San Chaung, Yaogon 

Tun laiin kan ramah (Myanmar-ah) “SAYA” tih tawngkam hi kan hmang uar hle a, Yangon khawpuiah hlei hlei kan uar leh zual. Keini ‘eng a’ hmang ho (a bikin Tahan Mizo ho) pawh ka bang chuang lo. Sunday School naupang hovin an zirtirtu mipa chu “SAYA” tiin an ko deuh vek mai, chutiangin Summer School zirtirtute pawh. Eng ual ni lo mah ila mipa kum 20 vel atanga chhunglam zawng hi chuan Yangon hmun tin hmun tangah “SAYA” tia kotu hi kan tawng leh nawlh thin.

Thingpui dawrah han lut ila “SAYA engnge i in dawn?” min lo ti a. Store-ah lut ila “SAYA engnge i duh” min lo ti chamchi bawk. Lumehna dawrah leh dawr chi hrang hrangah lut i la, chuti bawk. Zirtirtu vawi khat mah thawk eih lo paw’n “SAYA” tia koh kan hlawh leh nawlh mai thin. An tia a lawm: Vawi khat chu khawte lam atangin pa pakhat pawh Yangon-ah a zin ve a, thingpui dawrah thingpui in tura a han thut chuan waiter chuan, “SAYA engnge i in dawn?” a lo ti pek a. Chu mikhual pa chuan, “E!! … Vala, engtin nge kan khuaah school zirtirtu ka thawk tih i hriat le?” tiin mak ti em emin a zawt a ni awm e. Nia, zawt awm tak chu a ni, Yangon chin chang hre lo tan chuan. “SAYA” tih tawngkam hi Bible School leh Biak In-ah hlei hlei hmanlar a ni. He tawngkam khat hian kan thian pakhat (kan Bible zirpui) lu a ti hai ngang mai. Tihian kan thian pa chuan phun deuh nuah nuahin a sawi a: “Eh! SAYA tia min kotu an tam lu tuka awm dan pawh ka thiam lo. Sikulah thian leh thian inzah der nan SAYA chumi khami tiin kan inko va. Chutiang bawkin kan Lecturerte leh kan Professor ten min ko bawk. 

Yangon kohhran hrang hrangah rawngbawla (practical field work thawka) kan kal lahin kan Church School naupang mai bakah nu leh pa te, kohhran upa te leh pastor hovin “SAYA” tiin min lo ko bawk a. Pawn chhuakin dawrah han lut hlek ila chutiang bawk. Thal school chawlhah khuaa kan va hawnin chutiang bawk. Eh!! … a buaithlak lam pang deuh chu a ni, kei lah engual kan ni mang si lo va” tiin. A ti dik khawp mai. He tawngkam ang em ema hmuntin hmuntang hawl kim hi Kawl tawngah a tam lo viau mai thei. “SAYA” tih awmzia chu kawlram zofate chuan kan hre deuh vek ang a. Tawngkam mawi tak leh zahawm tak pawh a ni. Amaherawhchu, tun anga hman lar a nih hnu hian a title hlutna tlemin a nep deuh ta niin a lang. Tin, tun ang ema hman lar a nih hi a la rei vak hmel loh va. Kan hriat theuh angin tawng kam hman dan hi a danglam chak em em a. Hman lar bik tawngkamte a lo chhuak a, chutih rualin thenkhat hman zawm loh va riral ta mai a awm nuk bawk. Hman lar deuh tawngkamte pawh a lo rei chuan a chuai ve leh mai thin. Tin, khaw tin deuh thaw hian tawngkam uar bik kan nei thin a. Kan tleirawl lai ti ve mai ila, kum 1995-98 lai bawr vel khan Letpanchhaungah “an lo mawm, chitui um hnihin/um thumin an lo mawm” tih tawngkam kan uar em em a. A awmzia chu “an lo hau ve” tihna a ni a, tawngelna (“i chawh” tih) ang deuh a ni. Tunah an uar tawh meuh lo. Hman deuh (ni kum hmasa lam) atang khan Tahanah naupang leh thalaiin “a chi nang” tih tawngkam an hmang uar hle a – uar rei tak ang maw? Tin, tawngkam then khat chu a rei tial tial a, a chhan leh a kawh tum a dang daih thin. Kawl tawng myaik de tih hian tun hma kha chuan thil tha lo lam (negative) a kawk a, tunah erawh chuan thil tha lam (positive) lam a kawk tel tlat. Kan thian pakhat chuan yauhphah (makpa) tiin a thian kawmngeih te chu min ko vek a. A tan chuan yauhphah tih chu ka thian tha tih tluk a ni. Amah chauh a ni lo, thiantha hetianga in ko hi hmuh tur an awm nual mai. 

Engpawh ni se mak hranpaah ngai lo ila, kawl nula then khat te pawhin mahni insawi nan kyama aiah kyanaw an ti ve bawk. Hengte avang hian alawm mithiamte chuan, “Tawng hi pawisa a vir kual reng ang hian a che ve reng a, a danglam zung zungin a inthlak fo thin,” an lo tih ni. “Tawng reng reng che lova a awm reng chuan tawng thi a ni,” an lo ti bawk. “SAYA” tih pawh hi a chunga kan han sawi tak ang deuh khi a ni a. Nakinah hetiang em em hian an hmang uar tawh lo pawh a ni mai thei. Mahse tunah rih chuan a la popular tlat si a. Mipa kum 20 aia u deuh i nih a, Yangon-a awm i nih bawk a, i hmelin puak a tih deuh ngat chuan khawi khawiah emaw i sikul naung pang pawh ni lo, i hmel hriat pawh ni lovin “SAYA” tiin a rawn ko ngei ngei ang che. Chutih hunah chuan he thuziak hi hre rengin nui sengin nangmah kotu chu i chawn dawn nia.