Zofate Hmathlir 1-na

By: Alex Dinga

Do all the good you can, By all the means you can, In all the ways you can, in all the places you can, At all the times you can, to all the people you can, As long as ever you can.

Zofate hi Tribal Society kal pel a, industrious Stage ah lut mek kan nih avangin kan value systems, morality, cultural heritage, traditional heritages leh kan life-style chi hrang hrang hi kan siamthat emaw thlakthleng tur tam tak a awm ta. Mithiam leh mi thahnemngai tak tak ten durbin hrang hrangin Zofate hma an lo thlir thin a. Thu leh hla in ram an la mek zel a. Tunah pawh hei, Zofate hmathlir khatna kan nei leh dawn a ni.

Abik takin Chhaktiang zofate tana hmathlirna a ni ang. Tuna thupui kan han theh tur hi hnathawhna lam a ni a. Zofate hian hna kan thawh dawnin sang tak kan han beisei nghal phawt a. Lehkha inti zirsang deuh te phei chuan leileh chu sawi loh, mi chunglama thawh chi hna hi kan han tizawn deuh kher bawk thin a. Hna sang kan tlin loh chuan hna dang hi kan thawk peih tawh lo emaw tih mai turin kan awl heuh heuh a. Engmah tih kan tum ta lo tih mai turin hunin nasa takin min liamsan a, a tawpah tlai intihna a lo awm a. Hna nei mumal si lo, intichangkang ve lak lawh siin hmantlak lohvah kan chhuak fo. A pawi em em a ni.

Eng hna pawh kan hmuh phak tawk apiang, kan chan tawk apiang thawk thei turin kan inhuam a ngai ta. Dam chhung hna thawk turin vawi khata thlan fel mai a har fo. Mahse hun I neih a, I la nghak dawn a nih chuan chumi chungin hnathawh tur dang zawng fo rawh. Zofa hnahthlak dang te hi heng kawngah chuan an bengvar hle. Hnahniam, hmeichhe hna, mipa hna a awm lo. Kawl ho thawh tur, Vai ho thawh chi tih eng hna mah a awm hauh lo mai. Kha ngaihdan kha hmasawn lohna bul, kan thanmawh bawk a ni. Hna zawng zawng hi Mizo thawh chi vek. Nula zawng zawng te hian hnathawk lo tlangval inchei pang ai chuan pangpar huan enkawltu hnathawk thin kha pasal atan thlan ngei ngei tur anih tih an hrethiam tlat tawh. Kut hna thawh chi hrang hrang hlawk taka thawhdan ngaihtuah a, kan hun hi hnathawh nan hman fo tawh zawk tur a ni. Ram changkang leh mi hmasawn te hian an thawh theih zawng, leh thiam bik te an awm chuan a te a lian thlu lovin an hmuh phak tawk hna apiang an thawk hreh lo. Hun hi a thlawnin an liamtir mai mai lo. Keini zofate inti te hi hnathawh kan zak tlat thin.

Developed countries ram tlawh fo thinte chuan kan hria ang. Master degree nei te leh Pastor thenkhat te pawn bungrua siamthat hna te, naupang enkawl hna te, office staff hna pakhat khat an hmuh phak tawk apiang hreh loh le zak miah lovin an thawk mai a ni. Kei pawh Manila-a Seminary kan zirnaah chawei thleng sil pahin leh library-a hmunphiah paha kan han bei ve chu a tira chuan ka zak ve deuh ngei a. Mahse zak tur fakauvin enge maw kan nih le, tiin kan rilru ka hneh hram hram a. Chuchuan Zofate tana hmathlirna min siamsak ta ani. Mi chan sawi mai hi a awl a, mahnia han hmachhawn erawh a awl lo khawp mai. Mahse hnathawh avanga inhmusitna, in enhniamna, inngaihnepna hi mi hnufual te zia a ni tawh zawk.

Chhaktiang zofate hian kan thil ngaihlut zawng, kan hnam nuna bet tlat hmasawnna dal thei thil te, kan sakhua biakdan hlui duh bur reng ngaihdan te hi kan thlak a, chapona leh mahni hmakhua chauh thlirna, inlaklen vak duhna rilru te hi bansan a hun. Tahan leh a chhehvela cheng zohnahthlak hrang hrang hi en ila, Mizo inti te hian sakhua huangchhung chauhah hna thawh kan tum emaw tih mai tur a ni. Sorkar ofis hna hrang hrang, company hna te, NGO hna hrang hrang te, leh private hna te ngaihsak kan la tlem em em. Chuti chung chuan intichangkang fe fe in kan la leng zuai zuai a. Department hrang hrang len luh changin mahni mi leh sa hnathawk leh biak tur reng reng kan han nei ve thin lo hi chu hnathawh kalhmang kan la man fuh tak tak lo a ni tih a hriat. Induhsak thei tur kan awm ve lo. Chuvangin hnathawh tur apiang, a te a lian thlu lovin kan chan phak, hmuhphak apiang thawk zung zung ila. Hna hrang hrang experience neih tum bawk ila, kawng thar leh tha kan nghak rih a nih pawn hna chi hrang hrangah in inbarh lut ve tawh ang u. A sang kher kher hmasat I tum loving u. Hna awl apiang, kan hmuh phak leh chan tawk apiangah I lut zung zung ang u.