'
Motto: "I thu chhiarin a siam che"

Wednesday, December 19, 2018

KRISMAS NÎ ROPUI

Inner Light
Millennium Christmas Choir


1.    Krismas ni lâwmawm kan thleng leh ta,
       Ngui leh lungngaih tah mittuite bansanin,
       Bethlehem khaw arsi êng chu thlir ve in,
       Berampute lai khumah an zal laiin,
       Hriat loh chhîngkhual vân mi thianghlim rawn kal chuan,
       Mi tin tân a Chanchin Ṭha chu rawn thlenin,

Cho:    Aw nang Bethlehem Judai ram a mi,
            Judai khawpuite zîngah I tê ber tawp lo,
            I chhung aṭangin awptu a chhuak ta,
           A mi Israel-te hruaitu chu.

2.    Vân mipui fak hla aw mawi thângkhawk ri chuan,
       Leilung hi a nghawr a khat thinlai ril’an,
       Remna Lal Fa lal Krista lo pian nî chuan,
       Chung thângvân si-âr te paw’n chibai an bûk,
       Kan thinlung kawngkhâr a hnên lamah hawnin,
       Chibai bûk tûrin I kal ang u tûnah.

3.    Nangni vâng Angel Seraf thianghlimte u,
       Ran in tlâwma Lal thar lo piang chawimawiin,
       Chung thângvânah pawh in âwi ve dâwn lawm ni?
       Hei ang renga kan tân a Lal lo piang hi,
      An piang leh tawh lawng nge he lei chinah hian,
      Kan vânnei êm e, he hun kan tawng leh hi.



Saturday, July 28, 2018

Thil ṭha ti atâna siam kan ni

I am certain that after the dust of centuries has passed over our cities, we, too, will be remembered not for victories or defeats in battles or in politics, but for our contribution to the human spirit.
John F. Kennedy (1917-1963)
 
Kan chênna khawvêl hi nakinah chuan lei vaivutah an la chang vek ang a, chumi hunah chuan kan hlawhtlinna te, indona leh politics thila chak zawk kan nihnate hian hriat reng a hlawh kher lo vang. Amaherawhchu, kan mihringpuite tâna thil ṭha kan tihte erawh chu kum khuain a nung reng thung ang tih chiang takin ka hria.

Friday, July 27, 2018

Taimakna

By: J. Lalengkima (Jo Jo-i pa)              
 

    Eng hna pawh mahni kova tla, tlansan lova thawh zêl duhna rilru hi “Taimakna” chu a ni.
 
    India ram zalênna sual chhuaktu, India hnampa tia kan koh Mahatma Gandhi chuan ‘Taimakna’ tih ṭawngkam hi hetiang hian a hrialhfiah, “Mahni inzahna leh mahni inphatsan avânga hna chi tin reng (a ṭha lamin) thawh duhna hi taimakna a ni” tiin. Chutiang bawkin Bawih chhuahtu ropui Abrahma Linclon-a chuan “Taimakna chu thatchhiatna hmêlma, a hmei a pa, puitlin leh puitlin loh lanna dârthlalang a ni” a lo ti bawk a ni.
 

Thursday, July 26, 2018

Lehkhabu chhiar hlawkna

By: Kawlngheta Vaiphei


L. Keivom-a chuan, "Lehkhabu hi mihringte hriatna, thiamna, finna luan khawmna, chhia leh ṭha hriatna dîl zau ber a ni," a lo ti thlawt mai nia.

    Mihring nuna thil pawimawh berte zînga pakhat chu lehkhabu chhiar hi a ni âwm e. Lehkhabu chhiar tûr chuan a chhiar tûr kan neih a ngai a. Kan nei lo a nih pawhin Library emaw tal hi chu kan bul hnaiah a awm a tûl âwm e. Mahni sum senga Lehkhabu lei pawh hi a ṭha hrim hrim. Chu chuan lehkhabu mi a ngaihhluttîr ṭhin.