'
Motto: "I thu chhiarin a siam che"

Friday, June 6, 2014

Lalpaa lawmna

Rev. Vanlalzuata


Nehemiah 8:10
Mihringte hian kan zawn ber chu lawmna a ni a, kan peih loh ber chu lawm a ni bawk. Tuna lawm tum lovin nakina lawm kan tum tlat a, chu chu sawiin hla phuahtu chuan, “Lawm kan peih loh avang zawkin lo la thleng lovah kan ngai,” a tih hi a dik hle. Pathian chuan lawmna tur hlir min thlen mawlh mawlh a, keini erawh chuan lawm lohna lai tur kan zawng lui tlat zel. Tuna kan neih saah lawm tum lovin kan la neih loh kan neih huna lawmah kan khek a, kan neih loh chu han nei ila, kan la neih loh bawkah kan lawm tumna chu a insawn zel a. Lawm tum reng rengin thlan ko tlang kan thleng leh thin.
 
Series: Hlimna

 

‘Lalpa chunga lawmna chu in chakna a ni si a’ (Neh. 8:10).
Nu pakhat hian fa sawm a nei a. A fa zawmte zinga pakhat chu tun lai sualnain a man ve avangin a nu chu a hlim thei ta lo va. Pastor hnenah a kal a, “Pastor, min tawngtai teh, ka fa sawmte zinga pakhat a sual lutuk a, ka tawngtai thei tawh lo va, ka inkhawm a tui tawh lo va, Bible pawh ka chhiar ngai tawh lo a ni,” a ti a. Pastor chuan a lu chungah kut nghatin, “Aw Lalpa, he nu hi fa sawm i pe a, an vaiin an sual em em mai a,” tiin a bul a han tan a. Nu chuan, “Ngawi teh Pastor, ka sawi i hre sual a ni, ka fa sawmte zinga pakhat chauh a sual alawm,” a ti a. Pastor chu a tawngtai tha leh a, “Aw Lalpa, he nu hi fa sawm i pe a, an zinga pangate chu an sual hle a ni awm e,” a han tih leh chuan nu chuan, “a va mak em ve aw, pakhat chauh a sual ka tih kha, pakuate chu duhthusamin an tha alawm,” tiin a hrilh nawn leh a. Pastor chuan a vawi thumna atan, “Aw Lalpa, he nu hi fa sawm i pe a, a fa sawmte zinga pakhat chauh a sual a, (Nu chuan ‘a dik a dik’ a lo ti a). He nu hian a fa pakhuate thatnaah i hnenah lawmthu sawi lovin pakhat chauh sual avangin Setana lamah a tan phah a, a inkhawm duh lo va, a tawngtai thei tawh lo va, Bible a chhiar tui tawh hek lo, chuvangin Lalpa, he nu hi a fa sawmte zinga pakhat hi a sual simtir la, pakuate hi sual zawk se a tha ang,” tia a chham lai chuan nu chu a inhmuchhuak ta a. “Pastor a tawk tawh e, ka lawmna tur a tam daih zawk a lo nih chu, Pathian chhanna pawh ka beisei lo, nangman min chhang fiah ta vek mai,” tiin lawm takin a hawng ta a.

Mihringte hian kan zawn ber chu lawmna a ni a, kan peih loh ber chu lawm a ni bawk. Tuna lawm tum lovin nakina lawm kan tum tlat a, chu chu sawiin hla phuahtu chuan, “Lawm kan peih loh avang zawkin lo la thleng lovah kan ngai,” a tih hi a dik hle. Pathian chuan lawmna tur hlir min thlen mawlh mawlh a, keini erawh chuan lawm lohna lai tur kan zawng lui tlat zel. Tuna kan neih saah lawm tum lovin kan la neih loh kan neih huna lawmah kan khek a, kan neih loh chu han nei ila, kan la neih loh bawkah kan lawm tumna chu a insawn zel a. Lawm tum reng rengin thlan ko tlang kan thleng leh thin.
 
Damdawi inah kal ila, natna khirh tak tuar an rum vawng vawng a, dam taka awmte an awt ngawih ngawih a, “Han dam leh ila chuan aw,” an ti vawng vawng a. Nimahsela keini, damdawi ina awm ngai lova kan duh duh thawk theite hi kan lawm chuang reng reng si lo va. Oxygen pek kan ngai lo va, khemo lak kan ngai lo va, thisen pek kan ngai lo va, biopsy result nghah tur kan nei hek lo. Kan mit a del lo va, kan piangsual hek lo va, hliampui kan tuar hek lo. Chuti chung chuan kan vui a, kan thin a rim a, lungngaiin kan rum a. Kan lawmna tur atan Pathianin thil ropui tak min tihsak a, ni tinin thil thar min pe mawlh mawlh a. Lawmna tur hi a tam teh lul nen, mahse lawm kan peih lo tlat hi engvang nge ni ang le?
 
Kan lawm tur anga kan lawm theih loh chhan pakhat chu kan lawmna tur tam zawk aia lawm lohna tur kan thlir tlat thin vang a ni. Pathianin kan lawmna turin thil tam tak min tihsak laiin keini chuan min tihsak hmaih kan dap a. Duhthu kan sam vak vak a, kan duhthusam chu Pathian nemnghehtir kan tum a. Pathian hi kan peon ang chauhvin kan ngai a, kan peon ni lovin, kan Pathian, kawng engkima kan thatna tura hna min thawhsaktu a nihzia hi kan hmuh fuh a pawimawh hle.
 
Kawng dangin kan lawm theih loh chhan hi thlir leh ila. Pathian thu chuan, “Lalpaah chuan lawm fo rawh u,” tia min hrilh laiin keini chuan Lalpaah lawm tum lovin a thil pekah lawm kan tum tlat a. Chawkhawn thinlung puin Pathian hi kan dawr a, thil kan dil tlut tlut a. Habakuka chuan Lalpaa a lawmna nghehzia sawiin, a eizawnna leh a nghenchhan zawng zawng chhe vek mahse Lalpaah chuan a lawm tho tho dawn a ni tih a puang a. Joba pawh kha a neih zawng zawng tihchhiatsak vek a nih hnuah, a taksa pawh hrehawm taka tuartir a nih lai khan a nupui chu phunchiarna thlalerah a cheng hman a, “I Pathian sawi chhia la, thi mai teh,” a ti hial a. Joba erawh chuan, “Pathian hnen atangin thil tha kan hmu a, thil chhia pawh kan hmu ve tur a ni, Lalpa hming chu fakin awm rawh se,” a ti a.
 
Vawi khat chu Mission Vengthlangah kan awm laiin ka thiannuin vawkpui pahnih a vulh ve a, kei chuan ka hmuhpui ve lo va. Vawkpui pahnihte chuan note 22 an hring a, miten an rawn hauh tak tak a. Khatih lai khan vawkte pakhat chu Rs. 2000/- a ni a, Rs. 44000/-vel nei thei tura inngaiin a hlim hle a, vawkte mana Washing Machine a lei tur thu leh thil dang a lei tur a ziak chhuak hial a. Chutih vel lai tak chuan kan hotuten Mission Venga Mendus Building luah chho turin min rawn ti ta thut a, vawkte pawh ngaihsak hman lo chuan kan ri ta rum rum a, vawkte 22 te chu an thi zo deuhthaw ta reng a. Ka thiannu chu a ngui lap mai a, a thianten an rawn ral nual a. Kan pahniha kan awm pawhin a vawkte thi pawi a tihzia chu a thunawnah a hmang rei ta deuhva hriain, “I vawkte thi hi sawi sawi tawh lo teh, Habakuka kha ngaihtuah la, ‘Ran inah ran awm lo mahse, Lalpaah chuan ka lawm zel ang,’ a tih kha,” tiin ka zilh a. Ani chuan, “Lalpaah chuan ka lawm ve tho va, ka vawkpuiah ka lawm lo a ni mai alawm,” tiin min chhang a.
 
Min chhanna chu dikna chin nei, dik tluantling hauh si lo niin a lang. Mi, Lalpaa a lawm tak tak chuan a thil neihah leh a neih lohah pawh a lawm tur a ni zawk ang. “A lawmna chu Lalpa danah a ni zawk,” tih ang khan kan lawmna hi Lalpaah a innghah chuan vanduainain kan lawmna chu min chhuhsak thei lo va. Thil neiha lawm kan tum chuan kan neih loh hunah kan lawmna a chuai mai thin. Abrahama pawh kha Sadom lalin rallak sum pek vek a tum lai khan Abrahama chuan, “I lazai pakhat pawh ka la dawn lo. Abrahama hi keima tihhausak emaw i ti ang e,” a ti hmiah mai a. Lalpa chu a hausakna leh a lawmna a nihzia a hre chiang a. Chuti ang taka amaha innghat chu Pathian pawhin chumi zan la la chuan a rawn be ta a, “Abraham, kei hi i phaw leh i lawmman nasa tak ka ni e,” tiin a rawn delhkilh a (cf Gen. 15:1).
 
Lalpaa lawm tak takte chu tuarna pawhin an lawmna a tikiam chuang lo mai ni lovin a tipung zawk hial niin a lang. Dam leh pawh inbeisei tawh chuang lo Cancer vei te han kan chang hian mak ka tih thin chu hei hi a ni. Cancer vei chungin an lawmzia mittui parawl teuhin min hrilh mawlh mawlh a. Chutih laiin Cancer vei hauh lo te, natna nei reng reng lote kan lawm mang hauh si lo hi thil mak tak a ni. A chhan eng nge ni ang? Natna khirh tak tuar, dam chhuah leh pawh inring tawh lote chuan Isua ni lo thil dangah lawm an tum tawh lo va, Lalpaah chauh lawmna an zawng a, a hnena tlu lut lo thei lo dinhmunah an ding a. Lawmna chu an hmu ta ngei a, tuar chung pawhin an dam ta a, thi chungin an nung ta a ni. Chuti a nih chuan keini Lalpaa lawm hlei thei lote hian Lalpa ni lovah hian lawmna kan zawng khawtlai mai mai a lo ni e. Thing hmuna mautuai khawrh tuma chhuak ang kan ni a, kan hlawhchham hunah chuan Lalpaah lawmna tak tak chu kan la hmu ve chauh vang.
 
Nehemia chuan, “Lalpa chunga lawmna chu in chakna a ni si a,” tiin min hrilh a. Lalpa chunga lawm tlatte hi Setana pawhin a hneh theih lohte an ni a, awlsam taka a hneh thin chu vui ching te, lawmna reng nei lova phunchiarna thlaler rama chengte hi an ni duh. Chuti ang mite chuan a thim zawngin thil an thlir a, an bula awm pawh a hahthlak a, khawvel hi a pik mup mai thin a ni. Thufing pakhat chuan, “Khaw thim chu anchhia lawh suh, bati chhi mai zawk rawh,” a ti a. A eng zawnga thil thlirtute chuan khaw thimah bati an chhi a, an nuih chuan mi zawng zawng an nui a, an tah chuan anmahni chauh an tap dawn tih an hre chiang a ni.
Chuti chuan Lalpa behchhanin thil neihah lawm tum lovin, Lalpaah lawm ila kan thil neihah kan lawm thei zawk ang. Natna tuar mekte pawh kan dam huna lawm tum lovin, Lalpaah lawmthu sawi ila kan dam zawk ang. Pastor pakhatin damlo a tawngtai a, “Lalpa he damlo nen hian kan lawm hauh lo va, mahse lawm luih hram hram kan han tum ang e,” a ti a. Setana hneh nan lawm luihte pawh hi i tum hram ang u. Kan hrisel lo emaw, kan rethei emaw, eng pawh ni rawh se; Lalpaah hian lawm phawt mai ila a fuh ber ang.
 
Lalpaah lawmna in duh chuan,
A ro hlu chhiar rawh u;
Amahah thu ring nghet chungin,
A tamzia ngaihtuah r’u.
 
Ref: Kristian Thalai.com
Tuesday, 31 May 2011
Print this post