I PATHIAN TÂWK TÛRIN INPEIH RAWH

                                                       (Amosa 4:12)

By: Joseph Saia

            Kum 1741, July 8 zânah khawvêla Pathian thu sawi thiam tak Jonathan Edward-a chuan Amosa 9:2-3 denchhenin, “Pathian thinurna kuta sual fate” (Sinners in the Hands of an Angry God) tih thupui hmangin Massachusetts State, Northampton khuaa Church of Christ biak inah thu a sawi a. Pathian thinurna hlauhawmzia leh Pathian rorêlna hmaah mi tin kan la ding vek dâwn tih a sawite chu mipui lo kal khâwmte chuan ngun takin an ngaithla a. Ṭhenkhat phei chuan hremhmunah an tawlh liam nghâl mai dâwn emaw tiin an thutthleng vawnbân chu nghet takin an vuan ang fer fur hlawm a. 

           

                

       A thusawi tâwp lamah chuan, “Unau duhtakte u, ni khat khatah Pathian thinurna chu a lo thleng ngei dâwn a, chu chu tu mahin kan pumpelh dâwn hauh lo a ni. Kan zîngah Krista la nei lo kan awm em? Kan awm chuan Pathian thinurna lâk atânga inthlirfihlim dân ngaihtuah tûrin ka fuih duh a che u,” tiin a thusawi chu a titâwp a. Thlarau Thianghlim hnathawh avângin a hnu lawkah Northampton, Massachusetts-ah thlarau harhna nasa tak a lo thleng a, mi tam takin an sualte an sim a, Pathian tâwk tûrin a inbuatsaih ta vek mai a ni. Chuta ṭang chuan harhna chu hetih hun laia New England tia an koh Maine, Vermont, New Hampshire, Massachusetts, Connecticut and Rhode Island-ah te a thleng zêl a. Hei hi America rama harhna ropui ‘Great Awakening’ bul inṭanna chu a lo ni ta reng mai a ni an ti.

            Zâwlnei Amosa pawh hian Israel chhûngte chunga Pathian thinurna leh rorêlna lo thleng tûr chu chiang takin a hria a, chu vâng chuan Israel mipuite hnênah, “Chuvângin, Aw Israel, i chungah hetiang hi ka ti ang: i chungah hei hi ka tih dâwn avângin, aw Israel, i Pathian tâwk tûrin inpeih rawh.” (Amosa 4:12) tih thu hi huai takin a puang ve ta a ni. Kan thupui a fiah deuh zâwk nân Thuthlung Hlui huna Israel chanchin tlêm târ lang hmasa ila a ṭha ang.

            Lal Solomon-a khan BC 970-930 chhûng ro a rel a. Lal fing tak a nih avângin miten an zah êm êm a. Jerusalem Temple hmasa ber a sa a. Lal in ropui tak tak a sak bâkah a pa Davida lalram chu nasa takin a zauh bawk a. A lal hun chhûng hian Israel ram chu ram ropui leh hausa takah a siam a. Râl do tûr an neih loh avângin Israel mipuite pawh thlamuang takin ram chhûngah an awm thei a ni. Lal Solomona hun hi Israel mipuite tâna ralmuan ber lai hun a nih avângin mi thiamte chuan ‘Hun Rangkachak’ (Golden Period) tiin an ko hial a ni.

            Lal Solomona thih hnu chuan a fapa Rehoboama a lo lal a. Rei vak lovah chuan Isarel hmâr lam hnam sawmte chu an lal chungah an hel a. Chûng hnamte chuan anmahnia lalram hran din an duh avângin Israel chu ram hnihah an inthen a. Hmâr lama awm hnam sawmte chu Israel lalram (Hmâr lam lalram) tih a ni a, Chhim lam rama awm Juda leh Benjamin mite chu Juda lalram (Chhim lam lalram) tih a ni bawk.

Amosa hi tu nge ni?

            Amosa chanchin hi Bible-ah kan hmu tam lo hle a. A chanchin kan hriat chhun chu he a lehkhabua mi hi a ni mai âwm e. (Amosa 1:1; 7:14-15) Amosa hi zâwlnei  dangte anga zâwlnei  sikul atânga zir chhuak a ni ve lo va, lal tâna hnathawk leh zâwlnei  pâwl zînga mi a ni hek lo. Amosa hi chhim lam (Juda) lalrama khaw te tak te Tekoa tlângrama awm a ni a, a hnathawh pawh beram vên leh theipui huan enkawl a ni. (7:14) Amosa hi chhim lalrama chêng leh khawsa ni mah se, Lalpa chuan hmâr lam lalram Israel hruaitute leh mipuite hnêna thusawi tûrin a tîr tlat thung a, a mak ang reng khawp mai.

A hun lai khawvêl:

            Amosa thuhril hun chhûng leh zâwlnei a koh a nih hun chhûng hi rei lo hle mah se, a thuhril leh thuchah erawh chu a khauh hle tih kan hmu. (Amosa 1:1-6:14) Amosa’n a thuchah a puan hun lai hian Israel ram chu ram hausa tak a ni a, ei leh bar, sum leh pai lamah pawh an than duan lai tak a nih hmêl. An lalber Jeroboama II kha lal huaisen leh thiltithei tak a ni a, a sipai chakna hmangin an chheh vêl ram tam tak chu a thuhnuaiah a dah thei a, hmêlma beitu an neih loh avângin an ram pawh a muang hle a ni.

            Hetih hun lai hian Israel ram chu ram hausa leh ropui tak a ni a. Chutih rualin mi hausa leh mi rethei kar a zau êm êm mai a. Mi hausa leh thiltitheite chuan retheite thil neih chu lâk luihsakin dik lo takin thil an ti a. Pachhia leh kulh kawngkaa thlachhamte chanpual ngei pawh pe phal lovin an rûksak a. Mi felte pawh tiduhdahin tangkaruain an hralh a. Mi retheite lu chunga vaivut tak ngial pawh an it avângin pheikhawk bun khat lekin mi retheite chu an hralh a. Chumai nilovin, an hmeichhiate lah chu a inti mi lian a, hriak ṭha ber ber inhnawihin saingho chungah an thu a, Basan ram sebâwng châwm thau ang maiin an inei thau a. Pa leh a fapa chuan nula pakhat an zen tawm a. (2:6,7) Dikna aiin thamna chu thiltithei zâwkah a ṭang fo va. Rorêlna dik a awm loh avângin inpâwngnêkna leh hlemhletna (Social injustice) a pung thur thur a, chu chuan an khawtlâng nun pawh a tibawlhhlawh zo ta vek a ni.

            Hêng bâkah hian puithiamte leh mipuite pawhin Lalpa Pathian an biak bâkah ram dang pathiante an bia a. An lalte chuan chung pathian biakna tûr maichham tharte chu an sakbelh zâl a, tûn hmaa Jeroboaman milem biakna hmun a lo siamna hmun Bethel ngei mai chu ram dang pathian biakna hmunpui ber a lo ni a. Chûng thil zawng zawng avâng chuan Lalpa an chungah a lawm lo va, Isarel-ho chungah leh an chheh vêl ram eng emaw zât chungah Lalpa thinurna leh rorêlna chu a lo thleng thuai dâwn a ni tih chu zâwlnei  Amosa hnênah a lo thleng ta rup mai a ni.

Amosa thuchah lai pui:

            Amosa thuchah lai pui ber chu Israel mite chunga Lalpa rorêlna lo awm tûr leh hrem an nih tûr thu hi a ni. Israelte chuan Pathian malsâwmna an dawn zozaite chu hre thiam duh lovin nawmchenna khur pui lam panin an tlân bo zo va. Pathian dik tak chu theihnghilhin pathian dang an biaksan a. A petu leh a malsâwmtu lam thlir lovin a malsâwm thilah an buai zâwk a. Pathian malsâwmna chu Pathian thinurna chawkthotu atân an hmang ta a ni. Hetianga chhûngril lama takna awm si lova Pathian an biak dân leh Pathian biak an urhsûn loh dânte a hmuhin Pathian chuan, “In Kûtte ka huain ka hmusit a, in inkhâwmpui urhsûnahte chuan ka lâwm hek lo vang,” (5:21) tiin zâwlnei  Amosa hmangin Israel chhûngte hnênah a sawi ta a ni.

            Pathian chuan pathian dang an biak thinte chu kalsan a, thinlung taka inchhira a lam lo hawi tûrin  a duh a. Sualna huaa dikna ngaina tûr leh mi dang chunga dikhlel taka thil an tih thinte bansan tûrin  zâwlnei  Amosa hmangin a au lâwm lâwm a; nimahmahsela, Israel chhûngte chuan Pathian sâwmna aw chu an âwih duh chuang lo. Chu vâng chuan Pathian pawhin an khawpui zawng zawngah tamna te, thlâkchhamna te, rona leh hmuarnate hmangin a hrem a. An grep huan te, theipui kung te leh olive thingte pawh thingnget a ei zawhtîr vek a. Chuti chung pawhin Israelte chuan Lalpa lam hawi an tum chuang lo va, an thiltih thinte pawh bansan an tum chuang hek lo a ni. Pathian chuan Sodom leh Gomorra khua ka tihchim lai angin in zîngah mi ṭhenkhat ka tichim a, mi sual ka hrem a, chuti chung pawhin ka hnênah in lo kîr lo. Chuvângin, Aw, Isarel, i chungah hetiang hian ka ti ang: i chungah hei hi ka tih dâwn avângin, “Aw, Israel, I Pathian tâwk tûrin  inpeih rawh,” tiin zâwlnei  Amosa hmangin Israel chhûngte chu Lalpan a zilh ta a ni.

Eng nge zir tûr kan neih?

            Kan sawi tâk atângte hian eng nge zir chhuah tûr kan neih? Kan ram hi tûn hma chuan ram rethei leh fahrah tak a lo ni thin a. Mahse, tûnah chuan khawvêl hmasâwnna leh changkannain tui lian hruta min hrut avângin kan khawvêl pawh a zim tial tial a. Tûn hmaa kan hmuh ngai loh leh hriat ngai loh thil changkang tak takte pawh kan in chhûngah a khat rup tawh a. Ei leh bar, sum leh pai lamah pawh tûn hma ai chuan kan hniarhnarin Basan ram sâbawng châwm thau ang maiin kan inei thau a. Kan sitting room atângin khawvêl hmun hrang hrang kan fangkual zet zet ta mai a. Khawvêl ral lehlama chêngte nên pawh second khat lek chhûngin kan inbe zung zung thei tawh a. Tûnah phei chuan khawvêl hi kan kutphahah kan dah tawh a ni ber e.

            Changkanna leh hmasawnna vawr tawpa chêng mek ni si hian kan Kristian nun leh khawtlâng nun erawh a awng rawp telh telh niin a lang. Kan kutphaha khawvêl kan dah chinah chuan mahniin kan inawm tlei hliah hliah a. Pathian thu nung ngaihthlâk aiin kan kuta milem pathian biak kan thlang zâwk a, inkhâwm chhûng dârkâr khat emaw lek pawh hi rei kan ti êm êm mai zêl zawng a nih hi! Mizote hian Pathian thu kan duh hle a; mahse, a taka nunpui duhna erawh kan thlachham hle a ni. Hei hi kan pha thei lo va, pha mah ila, bum hmangah kan insiam chawp mai a ni ang.

            Israelte pawh kha sakhaw mi êm êm an ni a. Pathian hnênah inthawina leh halral thilhlante hlânin inkhâwmpui urhsûnte pawh an nei zêl a.  Rimawi chi tinreng hmangin Pathian fakin an chawimawi a. Mahse, chhûngril taka Pathian pawl duhna an neih loh avângin an inthawina leh thilhlan te, an inkhâwmpui urhsûn te, an chawimawina rimawite chu Pathianin a lawm hauh lo va, chûng zawng zawng chu,  “Ka hnên ata la sawn rawh u,” (Amos 5:23) a ti a ni. 

            Mizote hian Pathian kan duh hle a, hre thûk leh chang sâng bik nih pawh nuam kan ti. Amaherawhchu, tûnlaia Pathian kan biak dân leh inkhâwmpui ropui tak tak kan hman dânte hi ngun takin han thlir ila, Pathian thutak ngaihthlâk aiin a vuakveh bâwrah hian kan buai zâwk niin a lang. Hêng kan inkhâwmpuite hi Pathian fak leh chawimawi nân hmang lovin thawmhnaw mawi leh changkan inel nân te, kan mawina leh thil neih ṭhat pho chhuah nân te kan hmang a. Chhûng ril lamah takna awm si lovin thlarau mi nih ka tum lawi si a, chu vâng chuan kan Pathian lung hi kan tiawi zo tak tak lo chu a ni. Kan Bible chuan chu chu sawiin, “In kûtte ka huain ka hmusit a, in inkhâwmpui urhsûnahte chuan ka lâwm hek lo vang a. A ni, in hâlral thilhlan leh in buhhlan min hlân mah ula, ka pawm lo vang a, in ran thau remhlante pawh ka ngaihsak hek lo vang a. I ṭingṭang rimawi chu ka ngaithla lo vang; chuvângin ka lakah i hla beng chhêng chu la bo rawh,” (Amosa 5:21-23: Isa. 1:11-17) tiin zâwlnei  Amosa hmangin min hrilh ve ta a ni.  

            A chunga kan sawi tawh angin Lal Isua pian hma kum zabi pariatna kha Israelte tân chuan hun rangkachak (Golden Period) a ni a. An ram a ralmuang a, ei leh barah an hniang hnar a, an ram a hausak avângin mi ṭhenkhat chuan saingho hmangin in te an sa a. Thlasik in leh nipui inte pawh an sa a. Chûng inahte chuan maimaw puang mawi tak phahin lukham dup nuam tak chungah an mu a. An hmeichhiate pawhin an pasalte hnênah, “Rawn la ula, i in ang u,” tiin khawvêl nuam an chen a, nun an thlahdah êm êm mai a ni.

            Mi hausa leh nei nungte pawhin duh tawk chin an neih loh avângin retheite pâwngnêkin an rap bet a, thlachhamte chanpual an ei zo va, dik taka tih tum an awm hauh lo. Hêng mi retheite tawrhna leh harsatna zozai hi zâwlnei Amosa chuan a vei hle a, a dik lohzia leh a ṭhat lohzia te a hmuhin, “Rorêlna dik chu lui angin luang se la, felna chu luipui kang ngai lo angin luang rawh se” (Amos 5:24) tiin a au ta a ni. Hei hi sawiin hla phuah thiam Pastor Benjamin Lalrinmawia chuan-

           

I dawn thin em, zâwlnei au aw kha,

Israel chhûngte zîngah sual a hrang lua e,

Ephah ti te a sekel ti rittu, nun chu Lalpan a dem a ni,

Rethei pachhia lu chungah vaivut pawh ittu hnênah,

Zâwlnei vau khanna aw chu hei hi a ni.

Aw Israel, Bethel-ah lo kal la, bawhchhe rawh,

Gilgal-ah lo kal ula, bawhchhiatna tipung rawh u,

Dikna Lalpa chuan simna ani a phut ni,

Aw Israel, i Pathian tâwk tûrin inpeih rawh.

Buh an zawrh nân thla thar nghâkhlel e,

Chhangphut an hralh theih nân chawlhni ral nghâkhlel,

Rawn la ulangin, i in ang titu nun chu Lalpan a dem a ni,

Baptisma i chantîr a, sim si lo inthawina chu,

Bawhchhiatna tipungtu mai a ni.

I dawn chiang em, kan ringtu nun hi,

Lalpa mite zîngah sual a hrang lua e,

Dikna a fam ta, felna tel lo nun hi

Lalpan a dem a ni,

Ṭhahnemngaihna reng nei lo, dân anga rawngbâwlna hi,

Mahni luchungah meiling chheh ang a ni.

tiin hla a lo phuah chhuak ta hial a ni.

            Vawiina kan ram dinhmun hi han chhut chiang ve ta ila, eng nge kan an bik le. Zâwlnei Amosa hmanga Pathian thupuan chhuahte hi kan ramin a mamawh ber a ni ve mai lo maw?

Kan ramah hian hriat loh chhûngin in leh lo ṭha a puang thur thur a. Motor ṭha tak takte pawh kan nei zung zung ta mai a, a lawmawm hle. Amaherawhchu, hêng zawng zawngte hi engtia kan neih nge, khawi atânga kan hmuhte nge an nih tih erawh chhut tham a tling. Chawngkhum dân tlâng huat loh ti ila, thawk khat lai khan Mizoram-ah ‘Chiah-Puan’ tih ṭawngkam hi a lâr hle mai a. Mi tam tak chuan hausak thur thur beiseiin kan sum kan chiahpuam a, hei hian sum kan ngainatzia a tilang chiang hle a ni. Amaherawhchu, kan Bible chuan, “Sum hi a tîrah chuan deh chhuah thuai theih mah sela, a tâwpah malsâwm a ni kher lo vang,” a tih angin kha boruak pawh kha a tâwpah chuan malsâwmna ni lovin mi tam tak mittui tlâkna mai a ni a, hlawkpui leh hlimpui tûra kan ngaihte chuan tahna mai min thlen leh si a ni.

            Chiahpuam boruak a reh fel chauh emaw kan tih laiin ‘Kheh-Puam’ boruakin min nangching nghâl ta mai a. Sumdâwnna pângngaiah chuan kum hnih khat leka inkhehpuam hman kan nih loh laiin he ‘khehpuam’-ah hi chuan chawp leh chilhin kan puam nghâl awk awk mai a, tûnah phei chuan kan taksa thlengin a puam ul tawh mai zawng a nih hi. Dik lo taka kan sum lâk luh hmangte chuan hmun leh ram zau tak takte leiin kan inchhêk ârbâwm a, chutah chuan in leh lo ṭha tak takte kan din uaih uaih a, nimahsela, “A chhûngah chuan in chêng lo vang. Grep huan nuamte pawh in siam a, nimahsela a uain in in lo vang,” (Amosa 5:11) a tih angin kan in chhûng ropui tak takah te chuan hlim tak leh nuam takin kan chêng ngam leh ta si lo a nih ber hi.

            Chu vâng chuan zâwlnei Amosan, “Rorêlna dik chu lui angin luang sela, felna chu luipui kang ngai lo angin luang rawh se,” (Amos 5:24) a tih ang hian kan ramah pawh rorêlna dik leh felna chu lui pui kang ngai lo anga a luan a, Pathian thinurna leh rorêlna chu kan chunga a thlen loh nân tûnah hian kan Pathian tâwk tûrin i inbatsaih ang u. Lalpan malsâwm rawh se.  

Print this post