'
Motto: "I thu chhiarin a siam che"

Tuesday, July 2, 2013

Mother Teresa (1910-1997)

By: Josephsaia

Pian leh murna

Catholic hmeichhe missionary zianga ropui ber leh khawvel mi zawng zawngtena an ngaihsan ber “Fahrahte Nu” tia an koh thin chu Mother Teresa-i hi a ni. Kum 1910, August 26 khan Macedonia ram (tun hma chuan Ottoman Empire tia koh a ni a, tunah chuan Republic of Macedonia tia koh a ni.) Skopje-ah a piang a, a nu leh pate chu Albanian hnam thlah zianga mi an ni. Unau pathum zinga a naupang ber a ni a, a u hmeichhia chu Aga-i a ni a, a u mipa zawk chu Lazar-a a ni. August 27, 1910-khan baptisma a chang a, a hming Agnes Gonxha Bojaxhiu tia koh a ni a, kum 18 anih thlengin Agnes tia koh a ni. Catholic chhungkaw rinawm tak an ni a, kohhran leh khawtlang thilah pawh mi tangkai tak an ni. A pa Nikola Bojaxhiu chu damdawi leh thil dang danga sumdawng thin a ni a, insakna lama contractor hna thawk thin a ni bawk. A nu Drane Bojaxhiu erawh sakhaw rawngbawlna kawnga mi thahnemngai tak a ni a, tawngtai leh thilpek rawngbawlna kawnga mi inpe zo tak a ni. A pa Nikola -a phei chu sumdawnna lam mai abakah politic lamah nasa takin a tlan a, Albanian zalenna sualtute zinga a phusa ber pawla mi a ni.
 
Kum 1919 khan a pa in a boral san thut a, chutah Teresa pawh kum 8 chauh a la ni. Teresa pa Nikola hi engvanga thi ta thut nge anih tih Teresa chanchin chhuitute pawhin an hre thei lova. Mi thenkhat chuan politic lama a inhnamhnawih avangin a hmelmaten tur-in an hrai hlum a ni ang an ti. Chutianga a pa in rin loh taka a thihsan thut avang chuan Teresa chuan a nu chauh chu rinchhan tur a neih chhun leh a pa ang tluka a rinchhan tur a neih chhun a lo ni ta a ni. Teresa nu hi sakhaw mi tak a nih mai abakah mahni invawng fel leh mi khawngaihthei tak, thilpek lama thahnemngai em em mi a ni a, a fanu Teresa pawh amah ang bawka mite tana a nun hlan a, thilpek leh mite tanpuia rawngbawl zel turin a beisei em em a, chutiang tithei tura enkawl leh kaihhruai zel chu a tum lian ber a ni.

Download Complete Biography in Mizo (PDF)

Print this post