Burma Nuclear Thuruk

Burma sipai sawrkar chuan kum 5 chhunga nuclear siamna khawl pakhat leh nuclear siam nana hmarua (Plotonium) tihfaina khawl pakhat siam a tum avangin he project atan hian North Korea-in Burma a tanpui mek a ni tih chanchin chu Syney Morning Herald chuan a tarlang a ni.

Burma sipai hruaituten Nuclear siam an tumna hmun hi hriatfiah chiah a la ni lova, mi thenkhat chuan Burma hmar lama Naung Hlain tlangah a rukin an siam tan tawh a ni tiin an sawi a ni. He chanchin rapthlak tak hi khawvel chanchin bu ropui tak taka tarlan vek a ni lova, Australia National University-a research siamtu Desmon Ball- leh chanchin bu mi Phil Torton-a ten Burma sipai kuthnuai atanga Thanland ram ri lam pana tlanchhiate an lo zawh atanga an ziah a ni a, journalist Phil Torton-a chuan he chanchin hi chanchin dik tak nia a hriat avangin BBC-ah a sawi ta a ni.

Burma sipai sawrkar chuan hetianga ralthuam hlauhawm tak nuclear siam a tum avang hian Russia-ah nuclear chanchin va zir tur mi 1,000 lai a thawn a, chumi chungchangah chuan Russia leh North Korea-te paw’n rem an tihpui thlap a ni tih pawh Burma chanchin chhuitute chuan an hrechiang hle a ni.

He thuruk hi kan hnunga Thailand rama ASEAN Prime Minister rorel tuma US State Secretary Hillary Rodman Clinton-in Burma leh North Korea-ten nuclear technology lama indawrtawnna an neih hi ASEAN ramte tana harsatna thlentu a nihtheih thu a sawi hnu ni rei lo te a, lo langchhuak nghal a ni.

Print this post