'
Motto: "I thu chhiarin a siam che"

Friday, June 19, 2015

Unfaithful Wife


By: Lehkhabu Khawvel

An pa khualzin lungleng pawh hma taka haw tumin a inbuatsaih a. Mahse, a chhuanna tur thlawhna a lo thlen lawk theih loh avangin rei tak a nghak a. Vanneihthlak takin thlawhna chu tlai tak hnuah a lo thleng hlauh mai a. Tichuan, an awmna hmun Airport pan chuan an thlawk ta vang vang a. Zan dar 12-ah Airport chu an thleng thei ta hram a. Hmanhmawh tak chuan a taxi driver chu a ko va, a in lam pan chuan a tlan ta vang vang a.


A thlen hun tura a thlen loh avangin a rilru a nuam lo hle a. Kawnga an thlan mek lai chuan, “Ka thlen hun turah ka thleng thei si lova, ka nupui la a rinawm bawk si lo, mi dang nen hian remchang an lo zawng mai dah lawm maw,” tiin a ngaihtuah ta neuh neuh a. A nupui chu a laka rinawm lo fo a nih avangin a rilru chu ringhlelnain a khat a. In an thlen hma chuan, “Kan nu chesual kan man chuan cheng 100 ka pe ang che,” tiin a taxi driver chu thu hretu ni turin a sawm a, a taxi driver pawh chuan rem a ti ta a.

In an thlen chuan an nu chesual man tum chuan thawm dim tein an in chu an lut a. Tichuan, an khum chu an va bihthla dek dek a. An pindan thimah chuan thawm danglam tak ri vel chu an hre ta a. An pa chuan, “Zanin zet chu ka va man chiang dawn ve aw, ka chhuah dawn lo reng reng,” tiin a rilru a intihuaisen a. Tichuan, vawilehkhatah mei a han hmet eng thut a. A rin lawk sa ang ngeiin a ngaihzawng pa nena ruak nghal ngata an lo mu dun chu a va hmu ta thut a.

An pa thinrim lutuk chuan a pistol a phawi nghal a, an nu ngaihzawng chu a tin ta reng mai a. An nu hlau lutuk tihngaihna hre lo chuan, “Pa ber, ni lo. Pa ber ni lo. Khawngaih takin he pa hi kap lul suh ang che. He pa hi mi tha tak leh mi thilphal tak a ni a. Heng ka cheng neih zawng zawngte hi, “Ka nu leh pa ro an ni,” tia ka lo hrilh fo che kha dawt vek alawm. “I kawr man tam ber ka leisak che pawh kha he pa lei vek hi a ni a. Kan inchhuanga bungrua man to tak tak leh dil kama kan in mawi tak pawh hi he pa min leisak vek alawm! Club member fee pawh kha he pa min tumsak vek hi a ni a, thla tin fee pawh min peksak zel asin!!” a ti a.

An pa mangang lutuk tihngaihna hre lo chu a hawi a hawi kual a. Tichuan, a pistol chu zawi muangin a tihniam ta zel a. A taxi driver chu en rengin, “Tuna ka dinhmunah hian ding ve ta la, he pa hi engtin nge i tih dawn?” tiin a zawt ta a. Taxi driver chuan, “Vawt a tih hmain puan lum tak ka sintir vat ang,” tiin a chhang a.
Print this post