'
Motto: "I thu chhiarin a siam che"

Friday, June 19, 2015

Aung San Suu Kyi

( Aung San Suu Kyi Piancham phaphak, kum 70-na lawm nan) 
 By: Zalianthanga, Tahan

 Pian leh murna
 
Aung San SuuKyi hi General Aung San leh Daw Khin Kyi te fa pali zinga fanu upa ber ni turin kum 19 June, 1945 khan Yangon-ah a piang a (A pianpuite chu Aung San Oo, Aung San Lin, Suu Kyi, kum 1946 khan a laizawn tur a piang leh na a, a pian hnu lawkah a thi zui ta a ni). A pa Aung San-a chu Burma independent sual chhuaktu a ni a, kum 19 July, 1947-ah amah phiartu ten an kah hlum khan Suu Kyi hi (Suh Chi tia lam tur) hi kum 2 mi chauh a la ni a. A nu leh pa leh a pi ( a nu nu, Phwe Suu) hming chawi kawpin ‘Aung San Suu Kyi’ a inti ta a ni. Pasal a neih hnu hian ‘Daw’ hi belh a ni a ‘Daw’ hi ‘Pi’ tihna a ni a, ‘Pi Suh Chi’ tihna ang a nih chu. Theravada Buddhist sakhaw bia a ni.
 
Zirna runah


Tarmway school-ah lehkha a zir tan a, kum 15 mi a nihin Methodist English High School (Tunah chuan Basic Education High School No.1 Dagon) a zir zawm leh a. A nu hi kum 1960 chho khan India ram leh Nepal ram Ambasador-in a awm a, Suu Kyi pawh chuan a nu tawiawmin Delhi-ah a awm thin. Kum 1960-61-ah conbvent of Jesus and Mary leh Lady Shri Ram College-ah a zir leh a. Delhi University-ah chuan College a kal a, chu mi hnuah St. Hugh’s College Oxford University atangin kum 1964-67 khan B.A (Philosophy, Politics and Economics) a zir chhuak bawk. Post-graduate chu Japan ramah a zir thung a.
 
A hna chelhte
 
Kum 1969-71-ah United Nation Secertary, New York hmunah Assistant Secretary, Advisory Committee on Administrative and Budgetary Questionahna a chelh a. Kum 1972 khan Bhutan rama Ministry of Foreign Affairs-ah Research Officer a ni leh a. Kum 1985-1986 chhung khan Japan rama Kyoto khawpuia Center of Southeast Asia Studies-ah visiting school-in a awm leh a ni. Suu Kyi hian kum 1972-a Bhutan rama Research Officer, Ministry of Foreign Affairs hna a chelh lai hian British mi, Dr. Michael Viallancourt Aris-a nen an innei a. Fapa pahnih Michel-a (Alexander Jhon Christopher Aris) leh Kim (Dannian Kim Arundel Aris) te an nei a.

Politic lam Burma dinhmun
 
Kum rei tak ram dang mite awp behna huaia a awm tawh hnuin kum January ni 4, 1948 (Zing dar 4:20, second 28) khan British awpna atangin mahnia ro inrelna zalenna pumhlum (Independent) chu a hmu ta a. Zalenna a hmuh hnuin Democracy sawrkar hmangin Prime Minister hmasa ber U Nu’an a kai hruai a. Kum 1962 khan General Ne Win-a chuan sipai sawrkarnain a thlak a, Dictator a ni nghal a. Saipai sawrkarna chu a tirte atangin a vin nghal a, dawrte, school te, damdawi in te, thil siamna (factory) te sawrkarin a la (nationalized) vek a. Kum 26 chhung zet (1962-1988) Generla Ne Win-a hian ro a rel a. Generla Ne Win-a sawrkar chhung zawng hian party khat chauh din a phal a, ‘Burma Socialist Programme Party (BSPP)’-ah Chairman a ni nghal a. Burma kalphung milin a her rem leh a, ‘ Burmese Way to Socialist Party’ a ti a, ram hmasawn aiin tlak hniam lam a pan chho zel a.
 
Burma ram hi buh leh bal, oil leh rangkachak, lunghlu leh teak (tlawr thing) a hnianghnar hle a, mi thenkhat chuan ‘Khawchhak fairel’ an ti hial a. General Ne Win- chuan ram dang nena inlaichinna a khar vek a, ram a rethei ta tial tial a, General Ne Win-a sawiselna a tam tawlh tawlh mai bawk nen. General Ne Win-a chu thiam takin a inhnuktawk ta a, mahse; a kaihbua a hman theih U San Yu, U Sei Maung, Dr, Maung Maung leh Saw Maung-a te chu an thutna luah turin a ruat hlawm a. Sawrkar kalphung a danglam chuang lo. Kum 1962-ah ‘Revolutionary’ sawrkar a ding a; 1974 kumah ‘Pyithuhluttaw (legislature)-in sawkarna a siam a, kum 1988-ah chuan party pakhat aia tam awm phal a ni ta.
 
Kum 1988 September-ah chuan sipai lam vek chuan tharthawh lehin ‘The State Law ang Oder Restoration Council’ (SLORC) an din a, ram hming pawh ‘Union fo Burma’ tih chu ‘Union of Myanmar’ tiin a thlak a, ‘Rangoon’ pawh ‘Yangon’ tiin an thlak ta bawk a. He SLORC dan thar chuan mipuite chungah khawng takin ro a rel a, Pro-democracy tan tu mipuite chu rawng takin an awp bet leh ta zel a. Buaina a chhuak zel a, kum 1962 atang khan University leh school vawi tam tak khar a ni tawh bawk. Kum 1996-ah pawh University College leh University te an khar leh a.
 
Kum 1974 khan UNO secretary U Thant-a ( 1961-1971, Burma mi chu, kum 1962 kuma Cuba, Indonisia (1962), Zaire (1963), Cyprus (1964), India leh Pakistan (1965) ram buainaa remna leh muanna zawnga ching feltu) a thih khan sawrkar chuan tu khaw hriat lovin an phum ta mai a. Zirlaite chuan ram tihming thattu tiin chawimawi tumin a ruang an chhuh a, University zawng zawngte an kharin kawng an zawh mup mup mai a, sipai sawrkar chuan zirlai tam tak an kap hlum a. Heng bakah hian zirlai tam zawk ten ram dangah lehkha zir an chaknain a nawlpui chuan an kal thei lova, ram chhuahsan an phal lo bur mai a ni. Sawrkar duh lova nuarte leh inhawr khawm tel tel tawh phawt chu tharum thawhin an um darh thin a, mi sang chuang fe an kap hlum hial a ni.
 
Suu Kyi-in a nu dam lo a tlawh
 
Suu Kyi te chhung chu England-ah an cheng a, kum 1988 March khan a nu tlawh turin Burma-ah a haw a. Suu Kyi lo haw chu sipai sawkar a sawi nghing lawih a, an beng a verh hle a ni. Hetia boruak inchingchivet lai tak hian Burma ram siam tha tura pawl ding Pro-Democracy te chuan hruaitu tha an mamawh em em avangin Suu Kyi chu an sawm a. Suu Kyi lah chu politic lamah a la veikhawr em em si a, a pa sulhnute a’n ngaihtuah chuan mawhphurhna nei riaua an inhriat a vangin a rilru a siam fel ta a ni.
 
Politic buzawlah bu a khuar tan
 
Suu Kyi chuan a ram mite tuarna chu a hre chiang em em a, 8 August 1988 (8.8.88)-ah University leh school dangte kharin zirlai an nuar ta a, he revolution-ah hian sipai sawrkar chuan mipui tam tak a nghaisain a that nual a, zirlai leh ram tana hmangaitu tam tak an raltlan (Refugee) hial a ni. Kum August 261988 ah mi nuai chuangin Democracy rorelna a awm theih nan ngenna ‘Rally’ an nei a. Chu mi hnuah chuan Shwedagon Pagoda hmunah Suu Kyi chuan thu a sawi a, 24 September ,1988-ah chuan National League for Democracy (NLD) party chu a ding ta luah mai. Suu Kyi chu General secretary a ni nghal a, he party din hi a awlai lo hle a, lu chhum ban chhun huama din ang a ni. Suu Kyi chuan ram tlabal leh ei leh ina thla chhe lutuk chu a vei ber a. ‘Riltam chungin eng tin nge hma lam kan thlir theih ang’ a tih leh‘ Term khat chauh pawh min han kian chin teh u, kan ram kum 25 tlu chhe tawh hi ka din thar leh ang’tia a sawite chu mipui lawm a hlawh hle a ni. 27 December, 1988-ah chuan Suu Kyi nu chu a thi a, a vuina lo pungkhawm mipuite chuan remchangah lain sawrkar duh lona entirna hunah an hmang nghal a, tum lo deuhin buaina a chhuak chiam nghe nghe a ni. Chu mi hnuah thu sawi kualin a zin kual a, 5 April, 1989 khan Irrawaddy Delta huam chhunga Danubyu khuaah campaign an neih laiin sipaite chuan an rifle chu kauin thah hial an tum a, sipai major a lo inrawlh vat a, tlema tlemah a nunna a hloh tep a ni.
 
House Arrest
 
Suu Kyi che vel chu sawrkar nak a do tlat avangin 18 September, 1988 ah sipai rorelna hnuaiah House Arrest (Roreltu hmaah thiam thu sawi theih lohna)-in an khuahkhirh ta a. A awmna in atangin zirtawpni apiangin thu a sawi thin a, mipui pungkhawm an thahnem thei hle a, zirlaite chuan kawng zawh leh tihthaihin an rikrap deuh reng bawk a. House Arrest-a awm chhung hian tlawh phal a ni a, zirlai ten an tlawh tam ber thin. Khawvel hum hrang hranga mi ten an theihnghilh lohzia leh a mite chhan chhuak tura a tuarnate chu an khawngaihin an tanpui reng bawk a.
 
Inthlanna

May 27, 1990 khan General Saw Maung-a hun laiin inthlanpui chu buatsaih a ni ta .Suu Kyi chu House Arrest-in awm mah se, a party NLD chuan inthlannaah vote 82% hmuin a chak a. Chu mi awmzia chu seat 485-ah 392 an hmu a, mahse; sipai sawrkar chuan NLD party chu sawrkarna an hlan duh chuang lo va, buaina namen lo a chhuah phah leh leh a ni. Mi tam tak lung inah khungin thenkhatte phei chu dam chhung tang tura tih an ni bawk.

Kum 1991 chuan Nobel Peace Prize an pe ta hawl mai a, he lawmman hi a fapa-in a laksak a, a lawmman dawn atangin US $ 13,00,000 chu zirna leh hrilselna atan a pe nghal a. House Arrest a awm laiin 10 December, 1991 kuma a ziah ‘Freedom from Fear and Oder Writings’ tih lehkhabu chu London-ah an chhuah a. An tlangzarh tirh phei chuan in chhunga leng lo khawpin pawnah an intlar put mai a ni.
 
Chhuah a ni ta!
 
House Arrest-a a awm lai hian ram hrang hrang hruaitute pawh chhuah tura an ngen chamchi pawhin barah an khawn lem lo. 20 September, 1994 khan General Than Shwe leh General Khin Nyut-te chuan Suu Kyi inah an tlawh a. A tum hnihna an tlawh (October 28) leh hnuin 10 July, 1995 khan an chhuah zalen a ni a. SLORC sawrkar chuan a duh phawt chuan a pasal leh a fate hnenah a kal theih thu a puang a. Dik tak chuan Suu Kyi chu Burma a chhuahsan an duh ber a, a chhuah vaih chuan luh leh an phal a ring bawk si lo, a pasal leh fate chu ngai em emin a chhuahsan ta rih lo a ni. Kum 2000 kumah an hreng leh a, kum 2002 khan an chhuah leh zawk a, kum 2003 ah an hreng bet leh a, November 13, 2010 khan an chhuah ta chauh a ni. A vanglai a hun tha zawng zawng tan inah a hmang ral a ni ber mai.
 
Chawimawina a dawng
 
Suu Kyi hian ram hrang hrang atangin chawimawina (International Awards, Honors & Appointments) chi 114 chuang a dawng tawh a, a ropui hle mai. Ram hrang hrang zingah hruaitu lu ber pawh ni si lo hian ram hruaitu lu ber ang hian khawvel ram ropui rorelnaah leh mualkil upa thutphahah pawh mikhual lo, ram ropui lu berte pawhina a kam chhuah chilthli tla doh doha an ngaihchan ‘He nu zet hi chu’ an tih Suu Kyi hian chawimawina a dawn nasatzia chu sawi hian an siak lo a ni ber mai.
 
Suu Kyi Quavadis
 
Tunah chuan Suu Kyi pawh kum 72 lai a lo ni ve ta. Amah hi mi invawng leh nun uluk tak mai a ni a, a kum ngaihtuah chuan nula tha tak a ni. A hun tha zawng zawng ram tan, lung inah a hmang ral a ni ber mai. An sawi dan chuan A fate pahnih England-a awmte hi Myanmar-ah ko lutin Myanmar citizenship dilsak se, an pe mai dawn a, amah pawh hian foreign citizenship nei lo mah se, President a ni mai thei bawk ang. Suu Kyi, President a nih theih dawn loh chhan lian tak chu ram danpui No. 436 bakah No.59 (f)-na hi a ni a. No.59 (f)-ah chuan ‘Mahni emaw, a nu leh pa emaw, a nupui emaw a pasal emaw, thalbea chhuak a fate emaw, thalbea chhuak a fate nupui leh pasalte emaw ram dang sawrkarina a chawm hlawm leh a kut hnuaia enkawl emaw, foreign citizenship nei a ni tur a ni lo’ tih a nih avangin ramri kham a ni bawk si a. Chu dan ‘Constitution of the Republic of the Union of Myanmar, May 29, 2008 an duan chu NLD chuan a nawr nasa hle nain Pyithu Hluttaw palai Thura U Aung Ko chuan ‘Siam that theih a ni lo’ tiin a chhang bur mai si a. President ni tur chuan foreign-a fate awmtir bawk hi Myanmar ram danin a phal si lohah chuan Suu Kyi hian India rama Sonia Gandhi ang hian a chet ve mai a ngai ang. Ani pawh kha MP ni mah se, Prime Minister a ni thei lo va, mahse, a duh duha a hman tur Prime Minister fel leh tha tak a siam mai a ni. Suu Kyi hian tun hmaa a thawhpuite kha an upa tawh hlawm nain thalai fel tak tak te nen hma an la zel a, tun tum inthlanna (October thla ral , November thla tir, 2015 ?) lo awm turah hian mipuite beisei ber NLD party chuan huang a valh nasa hle mai a, eng tak ang maw le, i lo thlir ang u hmiang.
 
Thu laknate;
 
1. Bangalore Mizo Christian Fellowship, Raltiang i kai ve ang, Lalrinawmi Ralte ziak, Aung San Suu Kyi,Koramangala Bangalore-95, 1999.
2. Lalrinawmi Ralte, Hmatiang sawnin, Rev.Dr.L.R. Bawla ziak ‘Rul anga finga Thuro anga pawisawi lo’ National Printing Press, Bangalore, 2001.
3. The Thalun, Myanmar-English Pocket Dictionary, Kyaukseinn press, Yangon, 2000.
4. Pa ropui, fanu ropui, Min Chit Oo, Yangon, 2013.
5. C.Laizawna, The Lady (Aung San Suu Kyi), Moe Kyan Sapee, J.L Publication, Aizawl, 2014.
6. Constitution of the Republic of the Union of Myanmar, Printing & Publishing Enterprise, Ministry of Information, September, 2008.
7. http://www.biography.com/people/aung-san-suu-kyi-9192617…
8. http://en.wikipedia.org/wiki/Aung_San_Suu_Kyi

Hetah hian chhiar theih a ni e>>> https://www.facebook.com/zalian.thanga/posts/845754435479603
Print this post