'
Motto: "I thu chhiarin a siam che"

Sunday, August 16, 2015

Myanmar Bible Society Hnuhma

MYANMAR BIBLE SOCIETY HNUHMA (16 AUGUST, 2015 BIBLE DAY)

 
By: Zalianthanga, Tahan
 
A tirin:

Welsh hmeichhe tleirawl Mary Jones chuan a pawisa khawl chhuna Bible man a neih daih hnu chuan an awmna atanga mel 25 vela hla Baala khuaah a kal ta ngar ngar a. Mahse, Bible lei tur a lo awm ta mai lova, lunghnura haw mai tur chu Rev.Thomas Cherles chuan a lainat ta em em mai a, mi lei tawhsa a kawl mi Bible chu a lo leitir ta a, hlim em emin a haw thei ta a ni. Chu mi atang chuan Rev.Thomas chuan Welsh tawnga Bible neih theih dan kawng chu a dap nghal ta a ni.

Bible Society din a ni ta


Kum 1804 (March) a din tak British and Foreign Bible Society hi Bible Society hmasa ber a ni a. Kum 1946 khan ram 13 atanga palai kal khawmte chuan England Haywards khawpuiah inhmu khawmin khawvel Bible insuihkhawm pawl (United Bible Society) chu din a ni ta. Tunah chuan khawvel ram 200 chuangah pawl 146 meuh an awm tawh a. Tuna UBS President chelh mek chu India mi Dr. Robert Conville (2010-2016) a ni a, General Secretary hna chelh mek chu Mr.Michael Perreau a ni.

Myanmar-ah hian British and Foreign Bible Society rawngbawlna chuan kum 1889 khan bul a tan ve a. Kum 1964 atang khan The Bible Society of Myanmar chu dinin kum 1969-ah chuan United Bible Society chu a zawm nghal ta a ni. Kum 2015-16 hruaitute chu;
President: Rev. Dr. Zaw Win
Vice President: Captain Lalsangliana (Salvation Army) Honorary
Treasurer: Rev.Saw Crainer (Baptist Church) te an ni.

Kum 1889 atanga vawiin thleng, kum 125 chhunga Genenral Secretary hna chelhte chu;
1. Rev. William Sherrat 1889-1933
2. Rev. W.H Willians 1933-1957
3. Rev. S.V.Vincent 1957-1964
4. Rev. Aung Than 1964-1985
5. Rev. Than Tun Myat 1985-2000
6. Rev. Dr.Saw Mar Gay Gyi 2000-2010
7. Rev. Khoi Lam Thang 2010- ?
Myanmar ram chhunga Bible Society-a tel Kohhrante;
1. Myanmar Baptist Convention
2. Church of the Province of Myanmar (Anglican)
3. The Methodist Church (Upper Myanmar)
4. The Methodist Church of the Union of Myanmar (Lower Myanmar)
5. The Presbyterian Church of Myanmar
6. The Salvation Army (Union of Myanmar)
7. Self Supporting Kayin Baptist Mission Society
8. Lutheran Bethlehem Church
9. St.Gabriel Church (CIB)
10. Assemblies of God of Myanmar
11. Church of Christ
12. Seventh-Day Adventist Church 

Heng bakah hian Myanmar Council of Churches (MCC), Christian Literature Centre (CLC), National Council of YMCA’s of Myanmar (YMCA) leh National Young Women’s Christian Association (YWCA) te nen tang kawpin hma an la mek a ni. United Bible Society-te chuan ISP (International Support Program) nen tang kawpin Bible theh darh chungchangah Project 6 zet ruahman a ni a, hnam tin tan Bible zirna (Summer Institute of Linguistice) buatsaih zel tum a ni bawk. Bible chhiar thei lote tan pawh benga ngaihthlak theih khawl Proclaimer ( Memory card-a Bible thu chhiar play-na) sem thin a ni. Kum 2016 hma hian tawng 2000 zet ngaithla thei tura hma lak a ni bawk.

Bible lehlin hna

Khawvel mihring maktaduai 7000 zingah hian tawng chi hrang hrang 7105 chuang a awm a. United Bible Society-ina a tar lan danin tawng chi hrang hrang 2590 lehlin tawh a ni. Myanmar-ah hian mihring maktaduai 60 zingah tawng chi 200 chuang hman a ni a, chung zinga tawng 72-ah Bible lehlin tawh a ni bawk.

The Bible Society of Myanmar hian full time-a thawk mi 17 an awm. An hna thawh ber chu Bible lehlin, chhut leh sem a ni tlangpui a, , kum 2014 khan Holy Bible bu 39524, Thuthlung Thar 7496, a bute 17135, buthehlep 596139 sem chhuah a ni a. Kum 2014 khan Kohhran, mimal leh tlawmngai pawl hrang hrang atangin Ks. 68134870 hmuh a ni a. He mi tlingkhawm atang hian Bible chhiar tur nei lote leh ngaihthlak tur nei loten an lo neih phah ta a ni.

Bible Day thupui

Kum 2014 Bible Day thupui kha ‘Pathian thu zirtira theh darh (Deut.6:4-7, Mat. 28:19,20, I Pet. 1:25)’ tih kha a ni a, kumin 2014-ah chuan ‘Ram tina Pathian thu theh darh (Nehemia 8:1-3, Sam 98:1-3, Habak. 2:14, Mak. 16:15, Tirh. 2:5-11, Rom 10:17-18)’ thlan a ni. Bible Day a thlen hma hian Bible Society chanchin, thilpek chi hrang hrang a dawn te, rawngbawlna chi hrang hrang te leh thupuite lar lanna lehkhabu a buatsaih thin a, chu lehkhabu chu No.262, Sule Pagoda Road, Yangon, Myanmar, (Ph. 01-250014, 388126) atangin Kohhran hrang hrangah a thlawnin a sem chhuak thin a ni.

Bible Day leh Kohhrante

Bible Day hman chungchangah hian Kohhran hrang hrang tih dan a inang hlawm lo mai thei a. Hmunpui lamah chuan an urhsunin item hrang hrang hman a ni thin, Bible chhiar tluk tluk te, Bible chang en lova insawisiak te, thu hmanga inziahsiak te, Drama chan te, Bible leh a bu thehlep semte leh item hrang hrangte buatsaih thin a ni. Kalay Myo, Tahan leh a chheh velah pawh hian Bible chhiar tlaivar runpui neih a ni thin a, Kohhran thenkhatah chuan hapta khat chhung te an hmang thin. Day thlen hma urlawk zanah phei chuan Bible chhiarin thalaite an tlaivar zak thin a, sawhchiar emaw ruai emawte an buatsaih hial thin.

Thawkkhat lai deuh kha chuan zan khaw tlaivara tlangarh (Loud-speaker) sang takah tar chhuakin hmun tin ram tinah an ri chuah chuah thin kha a nia, kawng leh lamah chuan a bengchheng lek lek thin . Dam lo tan phei chuan a khamawm thei hle ang. Tun khaw hnuah chuan a reh ta tial tial a, a ziaawm ta khawp mai. Zan khaw taireka varnaw chiam te, zing tawngtai inkhawma khuang vuak ring tak leh rak sa loh loha thawm neih chiamte pawh hi a that rual rualin dam lo leh thenawm khawvengte ninah a kal thei bawk. Fimkhur thiam a tul hle a, hmun fianriala hman theih phei chuan a tu ve ve tan pawh a fihlim thlak ngawt ang. 

Khawiah nge i Bible?

Malsawma Kawlni khan sap Bible te chi hi a ak reng thin lah tak a, Pu Sawm, Bible hi i ak reng thin a, i chhiar reng bik em ni’ an ti a. Pu Sawma chuan ‘Sipaiin silai an hnung puak hian an kap reng chuang hlei nem’ zu han ti pek a. A ni khawp mai, kan han sawi duh takah chu Bible hi kan ngainain kan hlut thiam a pawimawh a, chhiar fo tur a lo ni reng mai. Duhthusamah chuan chhungkaw khatah hian Holy Bible pakhat tal kan neih chu a awm hliah hliah a, mi pakhatin Bible pakhat leh Kristian Hla Bu pakhat tal hi chu kan neih vea mawi a ni.

Khawvel mi ropuite hian Bible hi an thu inngah nan an hman avangin an nun a hlim thin a, America ram ropui pawh hi Bible-a innghat a ni a, an tangka-ah pawh ‘In God we trust ( Pathian hi rinnaah kan innghat)’ tia inziak hi a chuang kuau mai a ni. Chuvangin Bible hi rinnaa kan purchawkna ber a nih avangin ni tina chhiar emaw, dawhkan leh lukham bulah te hian dah thin ila, thla a timuang em em mai a ni. Kristian kan ni a, mahni pual liau liau hian Bible emaw Kristian Hla bu emaw Thu rotling lehkhabute hi kan neih ve a pawimawh khawp mai.

Aw! thukna ropui Bible

‘Bible’ tih hi Grik tawng ‘biblia’ tih atanga lak a ni a, a awmzia chu ‘Lehkhabute’ tihna a ni a. Khawvelah hian chhut khawl hi kum 1450-ah khan a nei tan a, Bible chhut nghal a ni. Bible-ah hian lehkhabu 66 chhun fin a ni a, Thuthlung Hluiah buah 39, Thuthlung Tharah buah 27 a awm. Bible-ah hian Bung 1189, chang 31173 a awm bawk. Bung sei ber chu Sam 119, Bung tawi ber chu Sam.117, chang tawi ber Johana 11:35 (Mizo-ah I Thesalonika 5:16), chang sei ber Estheri 8:9 a ni.

Kum 1835 khan Myanmar(Judson) Holy Bible neih tan a ni a, Shan-tawngin kum 1892, Mon 1928, Mara Lakher 1955, Mizo 1959, Hmar 1968, Kuki, Paite 1971, Tedim Chin 1977, Haka Chin 1978, Bawm Chin 1989, Falam Chin 1991, Siyin Chin 2004, Asho Chin 2008 ah hian Holy Bible an nei hlawm tawh a ni.The Bible Society of Myanmar hian Bible lehlin hna an thawk mek a, tawng 72-ah Bible lehlin hna an thawk tawh a, 90% zet hi Zo hnahthlak tawng deuh vek a ni.

Tlangkawmna

Bible Day hi kan hman hun hi a inang hlawm lo a, ram dangah eng hunah nge an hman thin tih a hriat lo va, Mizoramah chuan December thla hapta hmasa berah an hmang thin a, keini Myanmar ramah chuan August thla hapta 3-naah kum tin khel lovin hman a ni thin a. Kohhran hrang hrangte inbuaisaihna pawh an hlut sawt hle a, a lawmawm khawp mai. Khawvela lehkhabu ropui bera tia chhal ngam Bible hi a ni telin a hlu deuh deuh zel a, a bel chiang apiangin hlimna thar a chhar zel thin a ni.

Bible hmang hian hmun tinah rawngbawlna a nei zel a, pawl leh mimal nei deuh ten Bible hi a thlawnin an sem thin a, lei zel pawh an awm bawk. Tunlaiah pawh hian Kristian in tinah hrut chhuakin dap ta ila, Bible nei lo leh leina la nei remchang lo an la kat nuk ta ve ang. Chuvang chuan Bible hlutna hi mi tinin kan hriat deuh deuh theihna turin leh sem darh hmanga ram zauh zel tur hian tan i la sauh sauh ang u hmiang tih hi kan tawngtaina ni fo rawh se.

He thuziak hi The Bible Society of Myanmar buatsaih, kum 2015 Bible Day thupui leh BSM rawngbawlna report bu sem chhuah a mi, a tul anga lak chhuah a ni.

Ref: Tahan Fackbook Group

Print this post