'
Motto: "I thu chhiarin a siam che"

Saturday, December 5, 2015

McDonald’s leh Mr. Han Ding Guo



Kum 1970 hma lam kha chuan US company lar tak McDonald’s Corporation hian ram zau tak a la valh thei bik lo va, mite hriat a la hlawh loh avang leh mi thiam staff a la neih tam tawk loh vang pawh a ni ngei ang. Heti hun lai atang hian US McDonald’s chuan Taiwan khawpuia a company ramri zauh belh a duh hle mai a. Chutichuan ram chhung atangin senior executive turte inthlangin hma an han la tan a; mahse, harsatna lian tak mai an tawk nghal a. Chu an harsatna chu eng dang ni lovin ram pawn atanga hnathawktute la lut turin visa atan cheng tam tak sen a lo tul a, chumi avang chuan a ram chhung ngeia thawktute lak chu an duhthlan tur awm chhun a lo ni ta a; mahse, he hna thawk tura a ram chhung mi thiam takte lak mai tur an la awm meuh si lo hi a ni. 

McDonald’s in “Vacancy” tia a puangzar chu Taiwan mipuite chuan an ngaihven hle mai a. Nikhat chu Han Ding Guo an tih tleirawl hmel fel tak hian chu hna chu a va dil ve a. Tichuan an Chairman chuan interview a lo siam nghal ta mai a. Han-a beisei loh deuhvin chairman chuan, “Ek-in sil rawh, ti ta che se la, he hna hi I thawk duh dawn em?” tiin a zawt ta chawt mai a. Chhan ngaihna hre lova a ding reng lai chuan Han-a nupui chuan, “E, ka pu, ek-in zawng  zawng chu kan in-ah pawh nitin a sil thin alawm!” a lo ti a, chu thu chuan chairman chu a tihlim hle mai a, Han Ding Gua-chu hnathawktu atan a la nghal a ni. 


Han Ding Gua chuan McDonald’s kal dan chu ngun takin a belchiang a, a tawpah chuan McDonald’s hnathawktute reng rengin an tih hmasak ber chu ek-in sil hi a lo ni zel mai tih a hmu chhuak ta a. Hetianga McDonal’s in ek-in sil atanga a staff-te a chhawrna chhan nia an sawi chu “Inngaihtlawmna nun” an zirtir duh hmasak vang a ni an ti. A chhan chu McDonald’s hian thil tum fel tak a nei a, chu a thil tum chu eng dang ni lovin kan Lal Isuan, “rawngbawlsak tura lo kal ka ni lova, mite rawng bawksak tura lo kal ka ni zawk e,” a tih thu hi McDonald’s company thuvawn chu a lo ni. 

Hun rei lote ah chuan Han Ding Gua chu McDonald’s company hruaitu ropui tak a lo ni ta a, a hlawhtlinna thuruk a sawi apiangin, “McDonald’s company-a ka hnathawh hmasak ber chu ek-in sil a ni e,” tih hi a sawi tel zel an ti. 

‘Eng te tak te pawhin thim chhah tak a chhun tlang thei’ an tih angin hlawhtlinna kan tih pawh hi thil lian tak leh ropui tak atangin a intan vek ngai lova, thil te nau leh miten an tih duh loh thilte rilru inngaitlawm taka kan tih atanga lo intan a ni fo thin. 

Kan hnathawhnaah kan hotuten, “Ek-in sil rawh,” min ti ve ta se, engtin nge kan chhan ve ang? Han Ding Gua ang hian rilru inngaitlawm takin kan thawk ve mai dawn nge, “Ka tithei lo,” kan ti zawk dawn????

Print this post