'
Motto: "I thu chhiarin a siam che"

Friday, December 11, 2015

Rev. Richard Wurmbrand-a chanchin tawi

“God will judge us not according to how much we endured, but how much we could love.” (Richard Wurmbrand)

Damlai Martar (The Living Martyr) tia an koh thin Rev. Richard Wurmbrand-a hi a pianna Rumania rama Evangelical rawngbawltu (Minister) niin Communist awp behna hnuaiah tihduh dahna tuarin kum 14 chhung zet lung inah a tang a; Rumania ramah chuan Kristian hruaitu, zirtirtu leh lehkha ziaktu tia hriat lar a ni. Amah hi Juda thlah a ni a, pa inngaitlawm leh ngilnei tak a ni bawk. Nazi-ho leh Russian Communist-hovin Rumania an awp lai khan lei hnuai kohhran dinin nasa takin rawng a bawl a, Krista avanga nghaisak leh tihduhdah nasa tak tuar a nih avangin a hming pawh a thang hle a ni.
 


Kum 1945-a Communist-hovin Rumania an awp hnu khan kohhran rawngbawlna zawng zawng hmeh mit tumin nasa takin an bei a. Chuta tang chuan Richard Wurmbrand-a hian Russian sipaite dodal a, sala an chhawr ama chipuite chhan chhuah tumin Underground rawngbawlna chu a rukin a thawk tan ta a ni. Kum 1948 khan Richard Wurmbrand-a leh a nupui Sabine-i te chu man an ni a, lung in thima hren beh an ni. A nupui Sabine-i chuan kum thum chhung lung inah rim takin hna a thawk a, Richard Wurmbrand-a pawh tuma hmuh theih lohna tan inah kum thum chhung khung a ni bawk. Khaw har taka kum thum chhung a tan hnu chuan a huhova tanna (a mass cell)-ah kum nga chhung tang tura sawn (transfer) a ni leh a. 

Richard Wurmbrand-a hi International Christian Leader a nih avangin Diplomats of Foreign Embassy-ten Communist sawrkar hruaitute hnenah chhuah turin an dil thin a. Nimahsela, Communist hruaitute chuan Rumania ramah a tlan bo tiin dawt muhlawm an lo hrilh a. Communist Secret police-te pawhin, “Richard-a chu a thi tawh a, an vuina lung in thlanmualah pawh a nupui a rawn tel ngei a ni,” tiin an lo report ve bawk a. Rumania rama a chhungte leh ram hla taka a thian thate hnenah pawh, “A thi tawh a, chuvangin Richard-a hi in theihnghilh hmiah tur a ni,” tiin thu an pe vek bawk a ni. 

Kum riat pumhlum a tan hnu chuan lung in atanga chhuahtir a ni a. A chhuah hnu chuan Underground rawngbawlna bawk chu phur takin a chhunzawm leh a. Kum hnih chhung chu harsatna tam tak karah rawngbawlin a hun a hmang a. Mahse, kum 1959 khan man a ni leh a. Chumi tum chuan kum sawmhnih leh panga chhung tang tura a chungthu rel a ni a. Amaherawhchu, kum 1964-a lung in tangte ngaihdamna runpui (General Amnesty) a awm khan Richard Wurmbrand-a chu chhuah a ni ve hlauh mai a, kum sawm hnih leh panga tang tura an tih kha kum nga chhung chauh a tang ta a ni. Hemi tuma a rawn chhuah leh hnu pawh hian huaisen takin Underground rawngbawlna bawk a chhunzawm leh a. Nimahsela, lung in tan tum thumna tur hlauhawmzia leh rapthlak turzia chu a hre sa kiau tawh a ni. 

Hetih hun lai hian Rumania sawrkar chuan politics avanga Kristian lung in tangte chu mi pakhatah $1,900-in a hralh mek a. Chu boruak chu Wurmbrand-a tana hun remchang leh Rumania ram a chhuahsan theihna kawng tha ber a ni tih an hriat avangin Norwegian Mission to the Jews leh Hebrew Christian Alliance te chuan Rumania sawrkar an rawn dawr nghal vat a. Wurmbrand-a lak chhuak nan a tul ang ang sen an inhuam thu te pawh an hrilh a. Romania thuneitute chuan Wurmbrand-a laka hlawkna tel teuh an beisei avangin amah lak chhuak nan $10,000 lai an chhiar tlat a; mahse, Norway Kristiante chuan an lungawi zat pein an la chhuak ta tho a ni.   

Underground-a a rawngbawlpuite ngenna angin Wurmbrand-a te nupa chuan Rumania ram chu hreh takin an chhuahsan a. Norway leh England-ah te Chanchin Tha hrilin an cham lailawk a. Chumi hnu chuan America-ah lutin Underground Church rawngbawlna chu nasa takin a tlangaupui ta a ni. 

May 1966-ah khan Wurmbrand-a chu Washington-a Senate’s International Security Sub-Committee hmaah a inlan a. An sawisakna avanga a taksaa hliam tihbaiawm tak tak, thihpui tham 18 lai mai awm pawh a entir vek a. An nghaisakna chanchinte pawh US, Europe leh Asia chanchinbute atangin khawvel hmun tinah an theh darh chur chur a. Chumi hnuah Rumania sawrkar chuan Wurmbrand-a chu tihboral tura an thu an rel tluk tawh thu a hriattir leh a. Wurmbrand-a chuan thihna hlimkawr ruam zawh mah sela, a thil tawnte chu ngawih bosan mai lovin, hei hi, ‘Lei Hnuai Kohhran Au Aw (Voice of the Undergroud Church),’ chu a ni tiin a tlangaupui zel a. Kristian hruaitu tam takte pawhin Wurmbrand-a chu ‘Damlai Martar (The Living Martyr’ ‘Khaidiat bun mi thianghlim Paula’ tiihte in an koh phah ta nghe nghe a ni.
Print this post