Zirna lama kan Tuivar khawtlang dinhmun

By Lehkhabu Khawvel

Hre famkim lo hle mah ila, ka hriat chhun chhunte sawmkhawmin kan nau zawkten zirna lama kan Tuivar dinhmunte an hriatchian a, kan u zawkten famkim leh zau zawka an rawn chhui beiseiin he article hi ka rawn buatsaih a ni. 

Kum 1984-85 vel kha ni ta in ka hria. Naupang mai ni mah ila, Pingkhone lama kan u te rual sikul kal rawn chhukthla dum dum hi ka lo thlir reng thin a, engvanga mi khuaa va zir nge an nih erawh ka lo ngaihtuah ngai lem lo. Chunglai chuan kan Tuivar khawtlangin Primary sikul chauh kan la nei hi a lo ni a, Pingkhone khuaah erawh Middle sikul an lo nei deih tawh a ni. Kan khawtlang dinhmunin Middle sikul neih a la tlin loh avangin Primary level zirchhuakte paw'n zir chhunzawmna hmun remchang an neih loh avangin leh thenkhat harsakna avangin sikul an chhuahsan nasa hle a. Mi tlem zawk erawh chu phur lo leh hreh tak chungin Pingkhone lamah an zuk zir a. Chunglai chuan khua leh khua inpawngnekna, inteirukna thinlungte a la awm avangin a then phei chuan hmunsit an lo tawk a, sikul an chhuahsan leh nual bawk a ni. 

Chung boruak kara zuk zir chhunzawm ka hriat chhunte chu, Pastor Lalzawngliana, Tv. Lalrengliana (Parenga, Fam) Pu Kapkima, Pu Zamkima, Pu Remruata (Mizoram pemta) te an ni mai a, hmeichhe lam phei chu Nunvari tih loh hriat dang ka nei lo. Heng mite hi rualkhat chhuak middle sikul kan neih hmaa Pingkhone khuaa zuk zir ka hriat chhunte an ni. An hma hian Pu Suiluaia, Pu Chithanga, Pu Lalringa, Pu Lalrinliana te rualkhat ni leh in ka hria a, ka hriatchian chiah loh avangin chhuizui tawh lo mai ila. 

Kum 1987 khan pawl 4 zir zo mi 30 vel lai kan awm a, Pingkhone lam beisei tawh lovin Kawlpui St. Mary sikul lam kan beisei zawk a. Chunglai chuan tun ang hian kawng mumal tak a la awm lo va, tawlailir kawng mai a la nih avangin saikal (cycle) nena kal thei pawh kan la awm lo. Sikul naupang zawng zawngte chu ke-in kan kal dia dial thin a. Kum 1988 sikul hawn a rawn ni chhova, fur anih avangin kawngtluanin ipte leh puanfen khaikangin tui kan dai phei thin a. Sanpiah khua pelh chiah phei khi chuan saihnit lian pui pui a tam khawp a, hmeichhe rualho phei chu an rak leh thawt thin. Chutianga harsa taka thla 2 kan kal hnu chuan Rampum Buaina (Students Union Revolution) a lo chhuak a, chumi avang chuan zirna leh ei bar zawnna lamah mi a nghawr nasa hle a, sikul naupang tam zawk chuan chunzawm beisei tawh lovin, mahni thawhtheih zawng zawngte dapin a then Aizawl lamah a then leileh lamah chutiang chuan kan darh pheuh pheuh zo vek ta a ni. 

Kum 1989 ah sikul hawn a rawn ni leh a, sikul naupang tam zawk ten min chuahsan tak avngin a bang chhun tlem chuah kan awm tawh a, chung zinga ka hriatte chu Zaliankima, Ralliantawna, Zakhuma, U Luni, Bialfangzaui, leh Ramhmuaki te an kan ni. (Kum1988 rampum buai hmaa St. Mary sikula kal ka hriat chunte chu Hrangtinkapa(Hrangkapa) Zirthanga, Patea leh tun hmaa vengchhak lama awm Hmari nau mipa (a hming ka hriat loh) te an ni. Paawl 6 kum 1 ka zir hnu chuan Ralliantawna, Zaliankima leh Zakhuma ten min chhuahsan leh ta a, ka kum 2-na ah chuan Chawngthangan mi rawn umpha ta a, pawl 7 kum 1 ka zir hnuin a ni paw'n min chhuahsan leh ta a, pawl 7 ka kum 2-na ah erawh chuan Zabiakthanga, Laldingliana, Sangzama, Dinpuia, Lalsangliana, Zaawmi, Mabawihi, Manuni, Nunhlimi, C Thathangi ten min rawn rual leh ta a, kan hnuai deuhvah Parthani, Thanchhingi, Edeni, Lawmsangi te rualkhat an awm a, an hnuai leh deuhvah chuan Lallianenga leh Vanlalsawma te an awm leh bawk a, kan vai chaun mi 30 dawn lai kan nih ka ring. 

Kum 1996 khan matric zirlai ka chhuahsan fel ta a, India lama Baibul zirna ka chhuzawm nghal avangin 1997 hnu lama kan hmasawn zel dan te erawh chu hriat ka nei tawh lo. (He article hi a tawi thei ang ber tura ka buatsaih a ni a, hming ka telh hmaih te leh kan hmasawn zel dan a dawt a dawta ka tarlan dan dik chiah lo te a lo awm a nih pawhin min ngaihthiam a, dik leh famkim zawka hriaten in rawn tarlan ka beisei.He article-ah hian Tahan leh khua danga va zir sikul naupangte ka hriat loh avangin an hming ka telh lo bawk). 

Print this post