Lehkhabu Khawvel

By: Sayama Ringi (Green), Kalaymyo

Khawvelah hian lehkhabu chhiar tur leh chhiartu hi awm miah lo ta se, mihringte leh kan khawvel hi tun ang em em hian a changkang thei dawn lo reng reng a ni tih chu hriat sa a ni. Lehkhabu tha tak takte hi finna leh hriatna min petu, kan thian tha berte an ni. Lehkha chhiar tamtu chuan nun kawng sei tak a zawhnaah a chunga thil lo thleng thinte chu a tha lam emaw, a chhe lam emaw pawh ni se, enrem thiamnate, remhriatnate, beiseina tharte, huaisen leh chhel taka hringnun hmachhawn theihnate a chhar chhuak thar zel a, rilru chi ai leh tal buai mai lovin a tum ram chu ding takin a pan ngar ngar thei tlat a ni. Thenkhatin lehkhabu hi khawvel tukverh nente an lo tehkhin bawk a. Engpawhnise, lehkha chhiar tamtu chu a chhiar lo ai chuan a hmu thuiin a hre zau zawk hrim hrim phawt a ni.

Hnam changkang leh ram changkang zawkahte phei chuan lehkhabu hi an hlutin lehkha chhiar hi an uar em em mai a ni. An hun awl dang chu sawi loh eng emaw nghah an neih chhung hlekah pawh hian lehkhabu keu chungin an nghak thin a, i ti mai teh ang, an daikal chhung teah pawh lehkhabu an chhawm lut hial thin a ni. An changkang zawk bawk reng a. Chuvangin lehkhabu hlut zia hi khawvel mi zawng zawng te’n tun aia hre chiang zawk leh chhiar tam leh zual se tih beiseiin U.N.O hnuaia UNESCO chuan 1995 atang tawh khan kum tin April ni 23 hi “Khawvel Lehkhabu Ni” (World Book Day) atana ruahmanin thahnem ngai tak leh uar takin a lo hmang tan tawh a, kumin 2010 hi a hman kum 15 na tur a lo ni ta reng mai. U.N.O hian khawvel pumpuiin hria se a tih thilthate, leh pawimawha a ngaih zualte leh a uar thilte tan hian “Ni” bikte buatsaihin a lo hmang thin a. Ni thenkhatte chu mi hriat lar leh uar taka hman thin ni mah se, ni thenkhatte erawh chu a hman chu sawi loh tukhaw hriat hlawh lem hlei lova liam ral mai mai thinte pawh sawi tur a awm nual bawk. Ni pawimawh em em ni si mi tam zawk leh ram tam zawkina an la hriat lar vak lem loh ni pakhat chu tuna kan tarlan tak April ni 23 “Khawvel lehkhabu Ni” hi a ni.

“Khawvel lehkhabu Ni” atana April ni 23 kher an thlanna chhan pawh hi UNESCO in a sawi dan chuan hetiang hi a ni. Kan hriat lar theuh tawh vawiin thleng pawha Khawvel thu leh hla ban pui, British ziaktu tha tawp thang “William Shakespeare”-a pianni leh thihni hriat rengna leh amah chawimawina atana he ni kher hi thlang a ni. (William Shakespeare a hi 1564 April 23 ah a pianga, 1616 April ni 23 ah a thi a ni.) Tin, Spain ramah phei chuan 1616 April ni 23 veka thi ve tho an ram lehkha ziaktu hmingthang, “ Migual de Cervants (1547-1616)” chawimawi na’n leh hriat rengna atan 1923 April 23 atang tawh khan “Lehkhabu Ni” hi an lo hmang daih tawh a ni. Eng pawh nise, khawvel nghawrnghing thei khawpa ziakfung chelek thei, ziaktu hmingthang pahnihte fam channi April ni 23 hi “Khawvel lehkhabu Ni” nen a inremin hman awm reng pawh a lo ni e.

Lehkhabu lo chhuah tan dan

Tun hma kum 6000 vel atang daih tawh khan mihringte hian lehkha an lo ziak tan tawh a ni. Heng hun laia an ziah chhan ber nia lang chu an thil ngaihtuahte leh ruahmante, an chhehvela an thil hmuh leh hriatte, an tawnhriat eng eng emawte tha taka chhinchhiah (record) an duh vang a ni. A tir berah chuan milem (picture) hmangin an ziak a, chu mi hnuah chhinchhiahna (symbol) te siam chhuakin an ziak leh a. Hun a lo inher liam chhoh zel hnuah phei chuan hawrawp (alphabet) hmangin lehkha an ziak tan ta a ni. Heng ziahna atana an thil hman (material) te pawh hi hun a inher danglam chhoh ang zelin, a changkang chho ve zel a.

A tirah chuan saruh (bone) chungah an ziaka, chumi hnuah chirh phek te (clay tablets), tin thirphek te, mombati phek te, thingphek te, phairuang phekte (papyrus), maimaw puan te (silk) savun phek te (parchment) leh savun phek zialte (parchment scroll) an hmang changkang chho zela, tunah phei chuan lehkha (paper) hman a lo ni ta a ni. Hetianga an thil chhinchhiahte hi an dah tha a, an khawlkhawm tha zel a, a lo tlin tam deuh hnuah phei chuan awmze nei taka “dahkhawmna tur hmun bikte” an ngaihtuah chhuak chho leh zel a. Hei hi tun laia “library”kan tih ang hrul deuh hi a ni ang chu. Hetiang hmun zinga a hmasa ber pawl leh a changtlung ber pawl nia chhuitu te’na an hmuh chhuah chu “Alexandria library” hi a ni. Aigupta ram lal Alexander, Ropui-a din “Alexandria khua a, B.C 3 na vel tawha din library a ni. He khua a cheng Aigupta hnam leh Greek hnam ho hian literature lam an uar em avangin Alexandria khua chu chutih hun lai chuan “Khawvel Lehkhabu Khawpui” tih theih khawpin literature lamah tu tluk rual lohvin a sang chho dawrh mai a ni. Tin, literature han tih hian hmaih theih chi miah lohte chu hawrawp siam chhuaktu “Rom” ho hi an ni. Rom number pawh tun thlengin kan la hmang uar hle chu a nih hi.

Tichuan, ROM hovin hawrawp an chher chhuaka, German mi Gutenberg-a’n lehkha chhutna khawl (press) a’n siam chhuak leh a, lehlamah China ho lahin lehkha (paper) an han siam chhuah leh hnuah meuh chuan khawvel mihringte tan awlsam taka chhiar theih “lehkhabu” a lo chhuak ta a ni. Lehkhabu hlut zia hmutute thukhawchang Lehkhabu hlut zia leh chhiar tam tangkai zia hi sawi tur a tam luat em avangin kei ve mai hi chuan a sawi pawh ka sawi kimchang seng thei kher lovang Chuvangin, lehkhabu hlut zia hmu chiangtu khawvel mi ropui leh hmingthangte thukhawchang hi i lo thlir zawk mai teh ang u.

(1) “Lehkhabu lo hi chuan ka nung zo thlawt lo a ni ber mai!” ti in lehkhabu eddict Thomas Jefferson (1743-1826) chuan a lo tih chu maw le.

(2) British ziaktu hmingthang Mc Colley-a chuan “In ropui taka khawsa si, lehkhabu chhiar ngai der si lo Lal ber nih ai chuan in chhe tea awma, lehkhabu chhiar tur nei, mi rethei deuh nih pawh ka thlang zawk e!” a lo ti ve bawk.

(3) France ziaktu hmingthang Yan Porsert-a (?) ve thung chuan “Lehkhabu hi ka pathian a ni a, lehkhabu dahkhawmna hmun (library) te hi ka biak in a ni mai,” zu ti tlat a.

(4) Kawl ram lehkha ziaktu ropui berte zinga mi, Saya Nat Nwe- a pawhin, “Lehkhabu hi ka pathian ! Lehkhabu hi ka nupui!”zu ti ve chawk a.

(5) France Novelist Gustave Flavbert-a chuan, “Lehkhabu hi khawhar hnem atan chauh chhiar lo ula, finna leh hriat zauna atan ringawt pawh chhiar bawk lo ula, nun kawng zawh thiamna atan chhiar zawk rawh u!” a lo ti a ni.

(6) American Educationist Horace Mann-a chuan, “Ni tin lehkha tlem tal chhiarin in rilru chawlh hahdamtir rawh u. Ni khatah tlar khat te chauh pawh chhiar thin rawh u. Ni tin a tlem berah minute 15 vel chauh tal lehkha chhiarna hun in pek phawt chuan kum a lo vei hnuah hlawkna mak tak in chang ngei ngei dawn a ni!” a lo ti bawk.
 

(7) “Lehkhabu awm lohna in chu tukverh nei lo in ang a ni!” tiin lehkhabu eddict Thomas Mann-a chuan a lo sawi ve bawk a ni.

A ni lah tak a. Tukverh awm miah lohna inchhung thim dan tur zia leh thawipik thlak dan tur zia chu ngaihtuah chhin mai pawhin a hriat theih mai a. Chutiang bawkin lehkhabu chhiar tur leh chhiartu awm lohna in chu hriatna lamah leh tunlai thiamna leh finna intlansiakna khawvelah hian kan hnufualin leh kan thim mup bik mai dawn a ni. Sum leh paite, thawmhnaw mawi tak takte leh inchhung bungrawman tam tak takte ringawt hi chuan hriatzauna leh finna eng min pe thei tak tak miau si lo a le!

Kei, ka thlirna kil atang ve chuan lehkhabu hi “Hriatna Robawm” a ni ka ti duh tlat. Chu robawm chu hawngin a chhunga rohlute chu nunkawng kan zawhnaah a tangkaina mual mualah kan hmangin kan chhawr tur a ni.Taksa than len nan chaw kan ei a, thlarau lam than len nan Pathian thu kan mamawh ang bawk hian kan rilru a than len a, a lo puitlin (mature) chhoh zel theih nan lehkhabu chhiar tam kan mamawh tak zet a ni.

Thukharna leh thurawnna

Aw le, keini pawh hi lehkha chhiar i uar ang u hmiang. “Khawvel Lehkhabu Ni” te hi lungrual tak leh phurtlang taka hman theih hun a va nghahhlelhawm ve le! A bul tan nan message te inpechhawngin inhriat zau tir zel phawt ila, hei ringawt pawh hi thil pawimawh leh tangkai tak a ni thei thovang. Lehkha chhiar tam turin infuih tawn hlawm bawk ila. “Kan kohhran library-te hi a lun tha tawk em?”tih lam pang zawngte hian inbih chiang zel bawk ila.

China thufing in “Hnam changkang apiangin lehkha chhiar an uar a, lehkhachhiar uar hnam reng reng, an chang kang bawk a ni” a lo tih angin kei ni pawh hnam chngkang ni turin lehkha i chhiar uar ang u. “Lehkhabu Khawvel” a chengin “chawlhna tuikam” i pan ve ang u hmiang!

Ref:ZKC

Print this post