'
Motto: "I thu chhiarin a siam che"

Tuesday, August 19, 2014

Zofate leh Hmasawnna Rahbi


                                                       MCF Seminar Paper
                                                     Buatsaihtu: Joseph Saia
                                                      A hmun: KLBC, Alor, Malaysia
                                                      A hun: August 12, 2012
Buatsaihtu thuhma:

Pu Chairman leh MCF EC hruaitute, kan Lalpa leh Chandamtu Isua Krista hmingin chibai ka han buk hmasa a che u.

Malaysia rama Mizote hmasawnna leh hamthatna tinreng ngaihtuah a, Mizote nunphung humhalh kawngah leh rawngbawlna kawnga inhmangaih leh lungrual taka min kaihruaitu Mizo Christian Fellowship kan nei hi a ropuiin a hlu hle a. Tun tumah pawh Mizote hmasawnna lam hawia Seminar  buatsaih leh tura hma a lakna hi a ropui hle a ni. Seminar Paper buaisaih tura kei mi tling lo tak min thlang hi mihriang tak chuan ka insit a, mahse hetianga hruaitute duhsakna ropui tak ka chang hi phuloh malsawmna niin ka hria a, tling lo tak chungin ka han buaisaih ve ta chu a ni.

Kan thupuiah ‘Zofate leh hmasawnna rahbi’ tih a ni a, Rahbi tih a tel avangin hmasawnna kawng kan zawh thiam theih nana Rahbi zawk kan sawi uar dawn a ni. Engpawhnise, rahbi awm lovin a hlawhtlin theih lo va, hma a sawn theih loh tih hi hre phawt ila, hmasawnna awmzia leh a rahbi kan hriat hriatte chu tun tumah hian kan sawiho dawn a ni.

Kamkeuna:

Khawvelah technology leh media lam hmasawnna hi a tlanchak em em a. Chu chuan information leh communication lama hmasawnna chi hrang hrang a rawn hringchhuak zel a. Chu khawvel hmasawn chak tak chu mithiamten ‘Globalization’ emaw “Information and Communication Technology (ICT)’ tiin hming an vuah a, a chhan chu khawvel zau tak ni thin kha, media information leh communication hmansawnna chuan hmunkhatah min luanzatirin khawvel pumpui hi khaw pakhatah min siam ta a ni an ti.


Mi thenkhat chuan tuna kan hun hman mek hi ‘Post Modern Age’ tihin an ko ve thung a, a chhan chu kan hun tawn mek hian inelna leh intlansiakna mak tak tak a rawn hringchhuak zel a, chu inelna leh intlansiakna chuan tuipui angin min hrut vek a, keini khawvel kilkhawr bera awm Zofate pawh hmaih hauh lovin min hrut tel vek chu a ni. Zofate pawh hian tribal society kal pelin industrious stage lamtluang kan pan mek a, kan nungphung leh zia (cultural & traditional heritages), kan hlut zawng (value systems), kan chetdan (life-style) leh kan sakhaw nun (morality) chi hrang hrangte hi siamthat emaw thlakthleng emawa hmasawn kawng zawh tur tam tak kan nei a, hmathlir thui tak neiin hmasawnna rahbi kan rah chho zel a tul a ni. Hmasawn, hlawhtling, changkang tih tawngkamte hi inhnaih tak leh thenhrantheih an nih loh avangin tun tumah hian hmasawnna tih thumal leh hlawhtlinna tih thumalte hi kan sawikawp vek dawn a ni.

1.     Hmasawnna/hlawhtlina rahbi kan tih chu

Tun chhova kal mihringten kan tum leh beisei ber chu ‘Hlawhtlin/hmasawn’ hi a ni. Kan dinhmun leh nihna ang zelin ‘tum’ emaw ‘nih duh dan’ emaw ‘beisei’ emaw kan nei theuh va, chu kan tum, beisei leh nih duhte chu a te emaw a lian emaw pawh ni se kan tum leh beisei anga kan awm thei emaw kan hlenchhuak thei emaw a nih chuan hlawhtling (hmasawn) kan inti thin.

Hlawhtlinna hi amaha lo awm mai a ni lova, duh vanga neih ve ngawt theih a ni hek lo. Kan thiltih kawng engkima hlawhtling tur chuan Rahbi tam tak kan rah a tul a, tun tum Seminar-ah hian mi hlawhtlingte rahbi zirin hlawhthlinna rahbi tih hi kan sawiho dawn a ni. 

2.    Hlawhtlinna zedik tak chu

Hlawhtlinna hian scope zau tak a huam tel a, zirna, sum leh pai leh thilsiamchhuah lama hlawhtlinnate a huam tel vek a ni. Engpawhnise mi hlawhtling, hmasawn kan tihte hian an dam chhunga daih tur hlawhtlinna hmuh tumin tum leh beisei ram an neih theuh va, chu an tum leh beiseite chu a taka thawhchhuahpuia beitute an ni thin. Hlawhthlinna kan tihah pawh hian hlawhtlinna ziktluak leh tluak lo a awm thei ang a, tunlaia mi hlawhtling kan sawi fo te pawh rei lo te-a hlawhthlin leh lo te an ni thin a, hlawhtlinna ziktluak leh tluak lo tehna pawh hun a daih rei leh rei lova a innghah dawn tihna a ni.

Tunlaia mi hlawhtling kan tihte pawh hi an hlawhtlin rual rualin an chhe leh vek thin a, an hlawhtlinna chuan belhchian a dawl tawk thin loh avangin hlawhtlinna ziktluak kan tithei lovang. Chuvangchuan mi hlawhtling kan tihte hian engangin nge hlawhthlinna dik tak an lo sualchhuah a, engang rahbite nge an lo rah tih hi kan chik fo a tul. Chutiang hrethei tur chuan tumruh an neih dan te, mahni an invawnfel dan te, miten an faksel dan te, an chanchin lehkhabua an ziak dante leh an hlawhthlinna in society a nghawng dante kan zirchian a tul a, heng zawng zawngte hian an nihna dikna a hrilfiah hle a ni.
 
3.    Tumruhna (Realize your dream)
Mi tam zawk chuan ‘tum’ kan nei a, mahse kan ‘tum’ ah kan ching tawk thin lova, kan tum hi a ruh zo tak tak thin lo a ni. Tumruhna hian taimakna, chhelna, rinawmna, beiseina leh huaisenna te a kel tel vek a, heng hi hlawhtlinna chang tura kan hlenchhuah tur Rahbite an ni.
Khawvel scientist ropui Albert Einstein-a pawh hi a naupan lai chuan mi tawngmawh tak leh lehkha thiam thei lo tur tluka miten an ngaih a ni. A puitlin hun pawhin mawza bun ngai lo, necktie pawh awrh duh miah lo mihring a ni. Inbual nan leh khabe hmul met nana sahbawn chikhat chauh hmang thin, thil tam tak hman chu hna titamtu mai a ni tia ngai tlat, office kal pawha thawmhnaw uluk ngai lo, kalkawng a kal lai pawha meizial pak khuk vut vut chiang mi a ni a, mahse a nuna tum a neih chu hlenchhuah tumin a hun neih zawng zawng chu chhiarkawp zir nan a hmang a, chu a tumruhna chuan khawvel scientist ropui ber nihna a khumtir a, a hlawhtlinna rah chuan khawvel a tidanglam ta a ni.
Einstein-a hian chhiarkawp zir nan a hun leh rilru zawng zawng a hmang a, mi thenkhat chuan pa darben ang hialin an hmu nghe nghe a ni. Vawikhat pawh bank-ah pawisa la turin a kal a, bank a thlen chuan a hming an lo zawt a, a hming a theihngilh tlat mai! A beidawng chu a hawkir leh a, kawngah an thenawm nu in a hming a lo hrilh a, a hrechhuak leh theih hram chauh a ni. Mite sawisel leh hmuhsit tawk thin mah se tumna ruh tak a neih tlat avangin khawvel mi ropuite zinga mi fing lawr bik Genius-a chhiar tel a ni a, khawvel awm chhung chuan a chanchin hian sawi a hlawh zel dawn a ni.
4.    Mahni inrintawkna (Self-Confident)
Hmasawn tur leh hlawhtling tur chuan mahni kan pawimawh ber fova, kawng engkimah keimahni kan inring ngam tur a ni.
Hmasawnna kawng kan zawh mek laiin harsatna leh manganna chhumpuiten min hualin min tihbuai thin mah se Tirhkoh Paulan, “Ka rina chu ka hria” a tih angin kan thil tum hre rengin kan rahbi kan rahchho zel a tul. Hlawhtlinna hi vawi leh khata hlawhchhuah theih mai a ni lova, hlawhchham leh beidawng taka kan awm chang a awm thin. Mahse chu chu a tawpna a ni mai lo.
Hmasawnna kawng kan zawh mek laia kan hriat tur thil pawimawh tak pakhat chu “beidawng mai rawh, I tithei dawn chuan lo” tih keimahni chhungril atanga chhuak leh pawn lam atanga kan hriatte hi huai takin kan do ngam tur a ni. Hlauhna leh rinhlehna reng reng chu kan hnuchhawn ngam tur a ni. Mahni inrinna nei lo mi te chuan thil reng reng hi a chhe lam leh a beidawn zawng hlirin an thlir a, chung mite chu ‘pessimist’ tiin an ko thin. Sap thufingin, “Mahni inrintawkna nei lo leh mi dawtzep chuan a silai a kah hma hauhvin a silai mu a zo thin”, a ti a, pessimist-ho reng reng chu hlawhtlinna an chan hmain an beidawng leh mai thin. Harsatna chhe te lo awm se, an vui a, sep sep an sawi a, an tihtheih loh thil avangin mi dang mawhpuh tur an zawng a, chhan leh vang an dap a, chhuanlam tur an dap ruai a, an hnar hnuaia phatna chu an inhumhimna lungpui a ni fo thin. A vang chu mahni inrintawkna an tlak chham vang a ni.
Hmasawnna kawnga mi thahnemngaite chuan thil reng reng hi a tha lam hlirin an thlir a, an beisei chu tithei ngei turin mahni leh mahni an infuihin an inthunun thin a, fimkhur takin thil an ti a, chutianga thil thlir fo tute chu ‘optimist’ an ti ve thung. Heng mite hian beiseina lian tak leh hmathlir thui tak an nei zel a, an thiltih kawngah pawh beidawng duh ngai lo, hlawhchhanna chu hlawhtlingna kawng min zawhtirtu rahbi pawimawh tak a ni tia ngai mite an ni fo thin. Psychologist mi ropui William James-a pawhin ka thil hmuhchhuahte zinga ropui ber chu, “Mi tupawhin mahni inrintawkna a neih a, a rilru a thunun theih phawt chuan a pawn lam nun thlengin a danglam vek thei a ni,” tih hi a ni a ti. He a thufing hi kan Baibula, “mi thinnel chu mi chak aiin a tha zawk a, a rilru thunun hneh chu khaw latu aiin,” a tih nen hian a thuhmun hle a ni. Mother Theresa pawhin, “Engah nge in lungngaih mai ni! Pathian chuan kan tihtheih loh tur thil hi engtikah mah min tihtir a tum ngai lo,” a tih angin hmasawnna kawng kan zawh mek lai hian harsatna eng eng emaw avangin kan beidawng mai tur a ni lo. Tirhkoh Paulan, “Boruak mai hnek lovin keimah ka inhnek zawk thin,” a tih angin mahni inthunun chung zelin ke kan pen a tul. Kan thuziak tifiahtu atan a hnuaia thu hi I han chhiar teh ang u.

For all the heartaches and the tears,
For gloomy days and fruitless years;
I do give thanks, for now I know,
These were the things that helped me grow.  (David Lockett)
(Aw Lalpa, Ka lungngaihna leh mangangna,
ka rilru natna, mittui zawng te leh;
Ka hlawhchhamna zawng zawngte hi, min tichaktu leh min tithangliantu an ni tih min hriattir avangin I hnenah lawmthu ka sawi e.)

He thu hi literal translation hmang lovin Mizo Context nen inmila lehlin mai a ni. (Buaisaihtu)

5.    Chelna (Persistence/Endurance)
Kan tum a ruh leh ruh loh hian kan chhel leh chel loh a hril chiang ber a. Tumna a san poh leh chhelna pawh kan nei tam telh telh thin. Tumna chuan chel turin min zirtir a, mahni inrintawkna min siamsak bawk a, beidawng lo turin min kaihruai thin.
Hlawhchhanna a awm loh chuan chel chiam tum a tul hran lova, hlawhchhamna hi hlawhthlin tura min zirtirtu a ni fo thin. Sap thufing chuan, “Mi hlawhchham ngai miah lo te hi hlawhtling tura tum chhin ngaih hauh lo te an ni a, hlawhtlinna atang aiin hlawhchhamna atang hian zir tur a tam zawk,” a ti a, a dik hle a ni. Tuna mi hlawhtling kan hmuhte hi hun kal tawha lo hlawhchham thin, mahse beidawng duh lo te an ni. (MCF palai thuziak a mi, a ziaktu hriat loh) Mi hlawhtlingte rahbi hi a bumbohvin a mam ngai hauh lova, chuti rual rualin pumpelh kawng a awm hek lo. Harsatna leh manganna, lungngaihna leh beidawnna, tahna ruamte an zawh hnuin an thinlunga hlawhtlinna Zion lamliante chu pan zelin thlalerah hlawhtlinna tuihnate siamin chakna atangin chak lehzualnaah an kal a, chawimawina crown ropui takte nen khawvelah thang an chhuah thin a lo ni.
  
Khawvel scientist-te zinga kan sawi lar em em Thomas Elva Edison pawh chhungkaw harsa tak atanga rawn seilian a ni a, a pa pawh leilet pa ve mai a ni. Naupang lai atanga bengchhet a ni a, sikul pawh thla 3 chhung chiah a kal. A naupang lai chuan artui thutkeh tih velte hi a nuam tih zawng tak a ni a, an chhekin pawh a halkang hial a ni. Kum 12 a nih chuan rel kawngah candy leh chanchinbu zuarin a hun a hmang a, electric-bulb a siamchhuah dawn pawh khan vawi sang tam tak a tisual a, chutianga vawi tam tam a chhin hnu chuan electric bulb pakhat a siamchhuah thei ta hlauh mai a, mahse chu a thil siamchhuah thar diak chu a chhiahhlawh a awmpuiin a tihkeh sak hlauh mai a,  mahse a ai tha zawk siamchhuak tura mi chotu a ni e, tiin beidawng lo leh chhel takin  a siam a, a tawpah hlawhtlinna ropui tak a hmuchhuak a, a hlawhtlina rah chu khawvela mi zawng zawngte hian a zar kan zo va, “Ani chuan thim thuneihna lak ata min la chhuakin a Fapa hmangaih tak ramah chuan min kaitir ta,” a ti angin Edison-a hian thim ata engah min hruailut vek ta a ni.
Edison-a pawh hi Einstein-a ang bawka rilru nghet tak nei mi a ni a, Electric bulb chi hrang hrang siama a hnaa a tui lutuk avangin a nupui neih zan a theihnghilh tlat mai a, a hna puituin, “Ka pu zanin chu I nupui neih zan a ni, chawl ve rawh” tia a hrilh vang chauhvin a hrechhuak leh a ni an ti.
6.    Quality aiin Quantity a pawimawh zawk
Mi hlawhtling ni tur chuan pian leh murna, chhungkhaw background leh pianpui finnate hi thil pawimawh ber niin an sawi thin a, a dikna lai a awm ngei ang. Mahse pian leh murna, chhungkaw dinhmuh leh pianpui finna an neih that vang ringawt erawh chuan mi hlawhtling an ni vek kher lo tih a chiang.

Pianpui finna an tehna chu IQ (Intelligent Quotient) tih a ni a. Evolution Theory hmuchhuaktu Charles Darwin-a unau pa Francis Galton-a kha IQ sang tak nei a ni a, “IQ hi mihringa thil hlu ber a ni a, miin finna a neih phawt chuan hruaitu nih a phu a, ram leh hnam tan hlawkna ropui tak a ni bawk,” a lo ti hial a, mahse khawvel mi ropuite zinga chhiar tel a ni chuang hauh lo.

IQ Test an chhinchhiah danin mi pangaite hian IQ Score 90 atangin 110 thleng an nei thei a, Khawvela IQ Score sang bera an ngaih chu MarilynVos Savant-i a ni. Savant-i hian IQ Score 288 meuh a hmu thei a, mahse Savant-i hian hna sang tak a chelh pha chuang lova, Parade Magazine-a Interview siamtu a ni phak tawk lek a ni.

Kan Zofate zingah pawh kan evangelist-te hian mite sawisel leh fak an hlawh nasa ber awm e. Mi tam zawk chuan evangelist-te Baibul bung leh chang hriat nal dan em em hi mak kan ti a, an hriatzia chu hahipin kan sawi kur dup a, rilru chak bik leh pianpui B.A. nei tha bikah kan ngai chawk thin. Mahse han kawm chiang tak tak ila, chutianga hriattheihna mak tak nei tumah an lo awm chuang bik hauh lo. Baibul hi chhiar nuam an ti a, sawi nuam an ti a, chutianga vawi tam tak an chhiar a, an sawi tawh chuan an tan thil harsa a ni tawh lova, mahse thlirtute leh ngaithla tute lam atang chuan mi thluak tha leh thil hre thei bik tak niin kan ngai a, hriatzauna leh Baibul bung leh chang zau taka an sawi phei chuan kan ngaisang leh zual bik a ni.

A dik tak chuan kan evangelist-te hi leilet pa ve mai an ni a, a then phei chu zirna pawh nei mumal hauh lo te an ni. Mi hausa leh dinhmun nghet nei an ni bik lova, mi karah pawh vawi tam tak chesual remrum vek an ni. Mahse khawvel Quality lam ni lovin Pathian thu lamah Quantity an ngai pawimawh zawk a, chu an tumna chu Pathianin mal a sawm a, mite chawimawi leh fak phu khawpin hlawhtlinna an chang kan ti lo thei lo a ni.
7.    Rinawmna
Mi hlawhtling nun zirchianna atanga kan sawi hmaih hauh lo tur pakhat chu ‘rinawmna’ hi a ni. Hlawhtlina ziktluak tak chang tur chuan Pathiana rinawm, nupa inkara rinawm, thiante laka rinawm, mahni hnaa rinawm, thutiama rinawm, sum leh paia rinawm, kohhran leh khawtlang, ram leh hnam tana rinawm a tul vek a. Rinawmna chuan mahni tanghma a sial lova, a ma hlawkna tur chauh a ngaihtuah ngai hek lo.
Kan Baibulin rinnaa kan pate tih a sawi zawng zawngte khi en ila, rinawmna avanga ram latute an ni a, thih ngam lu-pu a, rinawmna vawng tlattute an ni. Josefa hlawhtlinna kha khawiah nge a innghah kan tih chuan rinawmna, dikna leh khawngaihna, lainatna leh ngaihdamtheihnaah te a innghat tih a chiang. Lal David ropuina chu Jonathana chunga a rinawmna leh Lal Saula a ngaihdamtheihnate kha a ni a, Nabala chhungkaw chunga chhiatna a thlen lo khan Pathian chunga a rinawmzia a tilang chiang hle a ni.
South Korea ram hi kan hmuhtheihah chuan ram hmasawn chak leh thangchho chak ber a ni ngei ang. South Korea hmasawnna zirchiannaah chuan hetiang hian an sawi a. Soviet Union hun lai khan Communist ralte chuan Korea an run a, chumi tum chuan khaw pakhatah hian Kristianho an lo inkhawm a, communist sipaite chuan an inkhawm lai chu an va nang ching a, tichuan inkhawmho zawng zawngte chu an dintlartir vek a, “Kristian ka ni lo tiin inpuang rawh u,” an ti a, an chal zawna silai an tin sa reng tawh avangin pakhat te te chuan an inpuang a, an pastor meuh pawh a inpuang a, mahse a tawp berah naupang pakhat chuan, “Krista ringtu ka ni a, ka rin Pathian hi Pathian rinawm tak a nih avangin keipawh atan ka rinawm tlat a, ka Lalpa chu ka phatsan thei lo a ni,” tiin a chang a. Chutianga naupang rinawm leh huaisen tak an Pastor-in  a hmuh chuan a mittui a tla zawih zawih a, keipawh hi tunah min kap nghal mai rawh u, ka Lalpa chu ka phat thei lo a ni, tiin tap chungin naupang te chu a va kuah a, tichuan a rualin an kaphlum vek a, chu naupang rinawmna rah chuan Korea ramah harhna ropui tak a rawn thlen ta a ni an ti.
8.    Hmanhmawh theih a ni lo
Mite hlawhtlinna han hmuh chuan an hlawhtlinna sawi nuam kan ti a, an nih ang ni ve kan chak a, mahse engang kawngte nge an zawh a, engang harsatna te nge an lo sut tlang tih erawh kan ngaihtuah tel ngai hauh lo. An hlawhtlin hmaa an rilru hahna te, an beidawnna te, an lungngaihna te leh miten an fakselna zawng zawngte hi kan hriatpui ngaih hauh lo.
Minute 15 vel leka i chhiar zawh mai theih Palai buaisaih nan hian kan Ziaktu lian (mahse amah tak chu a pa lian em em lem lo)-in karkhat meuh hun a hmang daih asin!!! Darkar chanve leka i chhiar zawh mai theih Zokawtchhuah buaisaih nan thlakhat  lai a inbuatsaih a tul tih i hriatthiampui chuan hlawhtlinna leh hmasawnna awmzia kan sawi fo te hi kan hriathiam a hun tawh hle a ni.
Khawvela mi ropuite leh hlawhtlin kan tihte pawh hian awlsam takin hlawhtlinna an phurchhuak mai lova, Relativity Theory hmuchhuaktu Albert Einstine khan lehkhabu 250 meuh a ziak a, Chemistry leh Physics lama research beih nan kum 53 zet hun a lo hmang daih asin!!! Origin of Spieces leh Evolution Theory hmuchhuaktu Charle Darwin-a pawh khan lehkhabu 119 a ziak a, thil nung chanchin zir nan kum 51 meuh a hun a hmang ral bawk. Psychology lama mi ropui bera kan ngaih Sigmund Freund-a hian lehkhabu 330 a ziak a, mihring rilru kal vel dan a zir nan kum 45 hun a hmang daih a ni. (ziaktu thenkhat chuan a thih dawn kum 80 thleng khan mihring rilru awm dan research a la bei a ni an ti) Khawvela lemziah thiam ber Pablo Picasso hiam kum 75 zet lemziah nan a hun a hmang a, Mother Theresa te, Lenin-a te, Moe Tse Tung-a te, Ayatollah Khomeni-a te leh Bill Gate-a te pawh hian kum 20 aia tlem lo hun an hman hnuah chauh The Greatest People of the 20th Century-a chhiar tel an ni. 
Tlangkawmna:
Hmasawnna zawmzia te, hmasawnna rahbi kan tih tumruhna, chelna, taimakna, mahni inrintawkna leh rinawmna pawimawhzia te kan sawi tawh a, hengte hi a chhiara chhiar liam mai lova, a taka kan hlenchhuah a pawimawh tak zet a ni. Hlawhtlinna hi hla taka awm a ni lova, kan hlawhtlinna leh hlawhchhamna chu vawiina kan awm dan leh kan rilru put dan hian a hril thui hle dawn a ni. Kawng engkima hmasawn kan duh a, hlawhtlin kan duh chuan tuna tang hian goal fel tak siam theuh ila, tirhkoh Paulan, “Kan hmaa intlansiakna tur awmah hian chhel takin I tlan zel ang u,” a tih angin hlawhtlinna no pui kan dawm hma chuan chhel takin tlan zel ila, rinawm tak leh taima taka thawk zelin kan puanven I sawichhing zel ang u.

Sawiho turte:

1.    Engvang nge hma kan sawn theih loh? Kan pian leh murnain a zir loh vang nge, mi awptu sawrkarin a zir loh vang zawk? Nge keimahni hian kan zir lo ve hrim hrim?

2.    Eng kawngah nge hmasawn kan mamawh?

3.    Hmasawn turin eng ang hmathlirte nge kan neih a tul?

4.    Hmasawnna kawngah kan kohhran, khawltang leh Society-te hian engangin nge hma la se i duh?

5.    ‘A taka tih’ aia ‘Sawi’ kan chak fo hi kan mizia ve reng em ni? Nge mihring hlutna (human value) kan hmelhriat dan a la chiang tawk lo zawk?

6.    Zofaten inngaihtlawmna ni lo, inngaihhniamna (Inferiority) kan nei tlat leh mi tih ang tithei ve tura rilru huaisenna/mahni inrintawkna (Superiority/Self-Confident) kan tlachham tlat hi engvang nge ni? Kan inzirtirna leh infuihnate hi a tha tawk lo em ni?

7.    Malaysia Mizote aiin hnam dang unaute zingah hna sang chelh an tam zawk tih Malaysia Zofate dinhmun zirchianna atanga hriat a ni a, Mizoten hna nghialnghet kan chelh thei lo hi kan taimak tawk loh vang nge kan tum a ruh tawk loh vang? Nge kan hna tui zawng thlang thei lova kan hna hmuh hmuh thawh a tul vang zawk? Kan mizia renga rilru nghet lo nge kan nih chelna leh rinawmna kan tlakchham vang zawk? Nge kan hmanhmawh lutuk thin vang?

Print this post