Hitler-a chanchin Part (3)

By: Joseph Saia (Australia)

ZIRNA LEH A NUN INTHLÂKTHLENG:

Kum 1898-ah Alois-a leh a chhûngte chu Leonding, Hafeld-ah bâwk an lêt leh a. Hafeld-a an lêt leh hnu hian a pa mizia chu a dang ta hle mai a. Zirna lamah pawh a fapa Hitler-a chu nasa takin a khuahkhirh a. A duh anga a awm loh phei chuan kut pawh a thlâk mai zêl a. A nu Klara-i lo inrawlh ṭhîn lo phei se Hitler-a hian a pa kut a tuar tuk tin mai dâwn a ni. 

A pa Alois-a kha mi luhlul leh thinchhe tak a nih bâkah zu duh ve tak, ruih lungpuam veleha nupui fanaute vau khur khur leh hrohrang chhe tak tak hmanga ânkhum buan buan ṭhîn mi a ni a. A fapa Hitler-a chungah pawh khân khuahkhirhna khauh pui pui a lekkawh fo va. Chutianga a hlei a hluaka thununna khauh zet zet a lekkawh ṭhîn avâng chuan Hitler-a pawhin a pa chu zah bîk hauh lovin a chhâng ve khauh zêl a. Hetiang a nih avâng hian Hitler-a te pafa chu an in mû leh âr ta reng mai a ni. 

Febuary 1900-ah Hitler-a nau Edmund-a chu hmaihuh natna tuarin a thi a. Hitler-a hian a nau chu a hmangaihin a thihna râpthlâk tak chu a tuar hle a. He thihna hian Hitler-a nunah nghawng nasa tak a nei a. A zirtîrtute leh a pa Alois-a ngei pawh dodâlin sual kawng a zawh ṭan ta a ni. Zirlai nungchang ṭha leh entawn tlâk ni ṭhîn Hitler-a chu naupang luhlul leh chimawm tak a lo ni ta a. A zirna a ngaihsak loh avâng leh sikul a kal ṭhat duh loh avângin vawi tam tak zilhhau a tâwk a ni. 

A naupan lai aṭang rengin German hnam pasalṭha nih duhna thinlung lian tak a nei tawh a; a hun laia sakhaw thuneihna sâng ber ‘Habsburg Monarchy’ pawh nasa takin a dodâl a. Austria hnam hla an sak ṭhînte pawh sa duh lovin German hnam hlapui ‘Heil Deutschlandied’ tih a sa zâwk ṭhîn a ni. 

Alois-a chuan civil service lama a hniakhnung zui ve tûrin a fapa Hitler-a chu a beisei hle a. Mahse, Hitler-a erawh chuan a pa beiseina leh duhthusâm chu tihhlawhtlin a tum lo nasa mai a. Civil service hna thawh ai chuan lemziah thiam tak nih a duh zâwk thu a sawi ve ta phawng mai a. An pafa inkâra inhnialna leh intihthiam lohna a awm fo avângin a pa chuan September 1900-ah Linz khuaa secondary sikul (Realschule)-ah a kal luihtîr a. Heta ṭang hian Hitler-a te pafa inkârah buaina nasa tak a lo chhuak ta a. Lung in a tân laia a lehkhabu ziah ‘Mein Kampf’-ah pawh an pafa inkâra thil thleng tam tak a târ lang hial a ni. 

Kum 1903, January ni 3-ah a pa Alois-a chu rin loh takin a thi thut mai a. Hetih hun lai hian Hitler-a chu tleirâwl kum 14 mi a ni tawh a. A pa thih hnu chuan a nu Klara-i chuan Hiter-a te unau chu Leonding aṭangin Linz khuaah a pêmpui ta a, chutah chuan a thih ni thlengin a fate chu a hmeithaipui ta a ni. A hrisêlna a ṭhat loh avângin Klara-i chuan a fapa Hitler-a chu kum khat lai sikul a chawlhtîr a. September 1904-ah Steyr Secondary sikul (Realschule)-ah a zirna a chhunzawm leh a. 

He hmuna sikul a kal lai hian a dam chhûnga mi pawimawh tak ni kumkhua tawh tûr Leopold Poetsch-a nên an inchhar hlauh mai a. Leopold Poetsch-a hi German mi, history zirtîrtu a ni a. Hitler-a hian an zirtîrtu Poetsch-a chu a ngaina hle mai a. A bîk takin Poetsch-a zirtîrna chuan Hitler-a ngaihtuahna leh suangtuahna a thlâk danglam nasa hle a ni. 

An zirtîrtu Poetsch-a chuan tuan leh mang aṭanga Austria ram awptu Habsburgs lalte chu a ram mipuite chunga khawngaihna leh zahngaihna ther tê pawh nei lo an ni a, hêng mite hian min awp reng lohna tûrin German hnam zawng zawng chu thinlung hmun khat pua insuih khâwm tlat tûr leh sawrkârna pakhat hnuaia nghet taka din a pawimawh thu a hrilh ṭhîn a. Aryan hnamte hi khawvêla hnam chi ṭha ber, chak ber leh thiltithei ber an ni a, khawvêla rorêltu tûr leh khawvêl awp tûr atâna hnam ropui filawr leh chungnung lawtlak an ni. Juda-ho leh Slavs-hote hi chu hnam inpawlhsawp, hnam chawm leh hnam suak an ni a. Chu vâng chuan Aryan thlah ziding dik tak ni ve lo hêng hnam hnuaihnungho zawng zawng hi chu Germany leilung aṭanga hnawh bo vek mai tûr an ni a ti hial a ni. 

Hitler-a chuan kum khat chhûng chu theihtâwp chhuahin lehkha a zir a. Sikul naupang zîngah pawh a thiam thei ber pâwl a ni a. Mahse, Hitler-a hian rilru mumal leh tum fel tak eng mah a neih loh avângin final exam a pass hnu kum 1905 khân a sikul chu a chhuahsan leh ta a ni. 

Print this post