Lehkhabu Khawvêl: October 2022

Thursday, October 6, 2022

Malaysia Zofate ka hmuh dân

By: Joseph Saia

Thuhmahruai:

Mizo thu leh hla lamah sûlhnu hniak khat pawh la nei lo keini ang duang Mizo Society of Malaysia (MSM) Tin Jubilee Souvenir-a thu ziak tûra min sâwm hi ka lâwm hle a. Chutih rualin kan thupui hi thlirna tlâng dang dang aṭang pawha thlir thiam harsa tak leh hmuh fuh loh leh hriat sual palh awm thei tak a nih avângin keuh sual pawh a hlauhawm hle a, chawngkhum dân tlâng huat loh kan ti a ni ang chu!

Kan hruaitu kal hmasate sawi dânin kum 1990 hma lam kha chuan Malaysia ramah Zofate an la tlêm hle a, a awm chhunte pawh inhlawhfaa kal an ni deuh ber. A tam ber chu mipa kum 20-30 inkâr an ni a, hmeichhia phei chu sawi tûr abâr an la awm lo tih theih a ni.

Kum 1990 hnu lam khân Malaysia ramah Zofate an luh belh zêl a, kum 1994-ah chuan inkawm hlim tham an lo awm ve ta a. UNHCR-in kum 2003-a Kâwlram aṭanga râltlante refugee-a a pawm hnu phei kha chuan Zofate chu a khau kâp a khau kâpin Malaysia ramah kan tleh luh ta hum hum mai a ni.

Hnathawhna kawngah:

Ka khualzinna ram

Aw Lalpa, he khawvêl hi ka khualzinna ram a ni tih min hriatnawntîr fo la, haw leh tûr ka nih avângin awm dân min zirtîr ang che.

Ka cham chhûngin mikual duhawm tak ka nih theih nân duhamna lakah min thîarfihlim la, mi dang tân malsâwmna ni tûrin thil phal min zirtîr ang che.

Dam chhûng mi hmuak apiang i tirh ni se, natna leh lungngiahna hian i hmêl min hmuhtîrin damna leh hrisêlna hi i thilthlâwnpêk a ni tih min hriattîr fo ang che.

Thihna hi nun nei tûra kailawn a nih avângin nung tûra ka thih theih nân inbuatsaihna hun ka neih chhûng hian ka duhthlânnate nei la, hlim taka ka lo haw theih nân sual laka penbona lakah min chelh tlat ang che.