Source: The Zozam Times
He video hi ka kut atanga chhuak (leak out) a ni lo tih hi Pathian hmingin ka sawi ngam: Zonunmawia
Kumin ‘2009’ hi Zo rimawi khawvel tan kum tha a ni lem lova, zaithiam chhuak thar emaw mipui lawm fal an awm loh lai vek hian kawng lehlamah mualphona leh chetsualna a thleng zauh zauh a tihtheih awm e. March 4 zan khan khatih laia Youth Icon 2007 nihna chelh mek Malsawmtluangi Fanai chuan Thalai Times hmaah sex video chungchangah inpuanna a lo nei tawh a, a lainatawmin a chunga vanduaina thleng avang khan a chanchin hriatzui harsa khawpin a reh ta, a pawi hle.
Thawm a reh tan ta emaw tih laiin, Icon chhul chhuak tho- Josephine Lalramengi (Jojo) pawh mipat hmeichhiat-na sualah a tlu lut a, a inpuanna leh ngaihdam dilna hi chhuak hmasa lamah tarlan anih tawh kha.
Boruak tha zawk a awm tawh ang chu maw tih laiin, Michael M Sailo leh SP-i te chuan Kohhran hall-a inneih an lo rawt thlu tawh bawk a! Kar hmasa khan gospel singer hriathlawh leh a hla hit tak, 'Aw ringtu, tunge hruai thin che' tih hla satu Laldinkimi(Makimi) chuan sex video chungchangah thu thar a nei ve leh ta a, kumin hi kum tha tih chi rual a ni ta lo!
Sex video tihchhuah leh thehdarh anih danah hian Makimi leh a pasal Zonunmawia te chuan thu thar an nei ve nghal chat a, January thlaa thil thleng ni si kha thla hmasa atang khan chak takin a darh ta a ni.
Hemi chungchangah hian mipa lam leh hmeichhe lam te chu police lakah an lungawi lo hle a, an thinrim hle bawk niin an sawi. An hnen atanga tihchhuah ngei nia an hriat tlat avangin a darh hnu-a police-in he thil-ah hian inhnamhnawihna an nei lo an tih laiin lehlam atangin an kut atanga chhuak a ni lo an ti ve bawk
Makimi hian he video chungchang hi August 15 zan khan a hre ve chauh a, hrehawm a tiin a mangang hle.Tichuan, a mipa Zonunmawia, Kolasib ami chu hrilh nghalin ani pawh rang takin Aizawl a rawn thleng a. Palaite an intir a, mahse boruak tha tak erawh a awm theih mai loh avangin an nupa hian an inru ta a ni. Hetianga an chunga vanduai-na leh mualphona thleng chungchangah he video hi a mipa-ina a tihdarh (leakout) nia sawi chu nasa taka phain Zonunmawia chuan, "Ka nupui hi ka hmangaih em em a, ka duh em em bawk.
“A hmasa berin he video hi ka kut atanga chhuak (leak out) a ni lo tih hi Pathian hmingin ka sawi ngam. Kei pawhin vawi 2-3 bak ka en lova, phone-ah hian a awm char char. Password-in ka ‘lock’ a, hawn theih mai chi a ni lo. Chu bakah, ka hmelte pawh a lang vek a, engtinnge khatianga lang si kha midang ka pek duh ang?
“Ka bike bo chungchanga Vaivakawn Police Outpost-a FIR ka thehluh khan police lamin ka phone hi an kawl nghal a, a chhunga thil awm chu hre ve tho bawk mah ila, Police te hi mipui rawngbawltute an ni a, mimal thil leh nun hi an zah sak mai turah ka ngai a, ngaihthat lohna pawh nei lem lovin Kolasib-ah ka let leh nghal.
"Ka hriat sual loh chuan phone hi kar hnih tling lo hret an kawl a, ka pa-in vawi hnih vawi thum ngaih-ven a, a va dil pawhin an lo pe mai lova, mahse a hnu-ah handset leh simcard chu an lo pe a, mahse a rawn hawn hian a chhungah memory card a awm lo. Kan va ngaihven leh chuan 'Hei hi chu a pawimawh a, kan la kawl dawn' an lo ti a ni,” a ti.
Zonunmawia hian hemi chungchanga police te chet dan chu a lungawi thlak loh hle niin a sawi nawn leh a, a tir lamah chuan OC-in amah rinhlelhna leh puhna eng-mah sawi anih loh laia a darh hnu-a ama tihchhuah ang ziazanga thu thehdarh ani ta chu a hrethiam lo hle niin a sawi bawk.
Video a laknaah erawh a thiam loh leh a tihsual liau liau a nih thu a pha hauh lova, mahse phone atanga ti leakout tu erawh a ni lo a ti a, he thilah hian a tawp thleng a tang ngam tih a sawi. Makimi leh a pasal Zonunmawia te interview chipchiar hi vawiin chhuak Zoram Today-ah chhiar theih a ni.
======================
Sex Video leh Pornography tihdarh lama dan thenkhatte
1. The Indecent Representation of Women (Prohibition) Act, 1986
Section 4: Hmeichhe thlalak emaw, an lem emaw an zahawmna tibawrhbang thei lehkhabu, film, paper, slide writing, drawing, painting, representation etc. thehdarhte chu section 6 hmangin a vawikhatna-ah lung in kum 2 thleng tan emaw pawisa Rs. 2000/- thleng emaw chawitir theih an ni a, a vawihnih hnu-ah phei chuan thla 6 aia tlem lo atanga kum 5 thleng leh Rs. 10,000/- atanga Rs. 1,00,000/- thleng chawi tir theih an ni.
2. The Information Technology Act 2000 (IT Act)
Section 67: Mi thlalak mawi lo leh lepchiah deuh, rilru hruaikawi thei thil midangte hnena electronic form a hmuh theih tura vawrhdarhtu chu a vawikhatnaah lung in kum 5 thleng tan leh pawisa Rs. 1,00,000/- thleng chawitir theih a ni a, a vawihnihna leh a hnu zelah lung in kum 10 thleng tantir leh pawisa Rs. 2,00,000/- thleng chawitir theih an ni.
Section 72: Penalty for breach of confidentiality and privacy: Mi phalna lova electronic record, information, thlalak, lehkha, thil chhinchhiahna document etc. thehdarh a, lo la te chu kum 2 thleng lung in tan leh pawisa Rs. 1,00,000/- thleng chawi tir theih a ni.
3. Indian Penal Code (IPC)
Section 292 (2) (a&d): Mi tu pawh thlalak bawrhbang (obscene) leh en nuam lo thehdarhtu chu a vawikhatna ah kum 2 thleng lung in tan leh pawisa Rs. 2000/- chawi tir. A vawihnihna leh a hnu zelah kum 5 thleng tan tir leh pawisa Rs. 5000/- thleng chawi tir.
Section 500 (Defamation): Tawngkam emaw, chetzia emaw leh thil dang hmanga mi zahawmna tih hmingchhiat hian kum 2 thleng lung in tan leh pawisa chawi tir theih a ni.
