KA FAPA, I IN I LA THLENG RIH LO VE!

By: Pastor PL Thlenga (Rawngbâwltute pualin)

Kum tam tak liam ta khân kum upa ve tawh tak missionary Pastor Henry Morrison-te nupa chu Africa ramah kum tam tak rawng an bâwl hnuin châwl tawh tûrin New York khawpui lamah an kîr dâwn a. An ṭhatlai hun zawng zawng Africa-ah Pathian rawngbâwl nân an hmang zo va. Tûnah chuan an hrisêlna te a ṭha vak tawh lo va, chu mai bâkah pension lâwmman tak ngial pawh an nei lo va. An rilru a hnualin hlawhchham intihna leh beidawn rûknain an khat a.

Tichuan, New York lam pan tuma lawnga chuan an tum lai chuan, an lawng chuanna tûrah chuan US President Theodore Roosevelt-a chu a sapêl rammutna aṭangin a lo kîr ve chiah a, an lawng chuanna tûrah chuan a chuang ve dâwn a ni tih an hre ta a. Lawng chawlhnaah chuan President hâw tur thlah chuan Band party hovin rimawi leh tawtawrâwt chi hrang hrang, ropui taka an hamrîk leh an tum chu mipuite chuan an thlîr ṭhup mai a. Ropui takin president chu an thlah liam ta a ni. Missionary Henry Morrison, nupa tar ve tawh tak te chuan thlahtu pawh an nei ve lo va, tu mah reng rengin an ngaihsak loh avâng chuan missionary nupate chu an rilru a na hle a. A bîkin an pa zâwk rilru chu a hrehawm hle a.

BURMA RAMA BAPTISMA CHANG HMASA BER U NAW-A

By: Tluanga Chhakchhuak

            Burma rama Chanchin Ṭha hriltu hmasa ber hi Baptist missionary Adoniram Judson-a tiin an târ lang fo ṭhîn a. Amaherawhchu, 1806 kum daih tawh khân India rama awm hmun khuar nghet missionary William Carey-a khân Burma rama missionary hmahruai ni tûrin  J. Charter-a chu a tir liam daih tawh thung a ni. William Carrey-a fapa Felix Carey-a pawh chu a tir ve leh nghal a, Kumpinu hnuaia East India Company sorkar leh Burmese king Bodaw Phaya-te inkârah palai hna hial a lo thawk tawh ṭhîn.

            Chutia William Carey-a leh a ṭhian pathumten Mizoram Ex. CM Pu Lalthanhawla D.D degree a dawnna, India rama Serampore hmun aṭanga rawng an bâwl laiin, 1812 kum June thla laihawl vêlah Adoniram Judson-a te nupa chu Culcutta an rawn lut chho ta a. India ramah missionary thawh tum mah se, chûng hun laiin Britain leh American sorkarte hi an tualthu a chhiat lai a ni a. India rama British sorkarna chelhtu East India Company-in missionary dangte ang bawkin harsatna an lo siamsak avângin Judson-a te nupa chu Culcutta chhuahsan tûra thupêk an nih avangin Burma ram lam an pan ta zâwk a ni.

St. Augustine-a chanchin

By: Joseph Saia (Australia) 

“We speak to God when we pray. God speaks to us when we read the Bible. Pray as though everything depended on God. Work as though everything depended on you.”  (St. Augustine)

Pope Boniface VIII (1230-1303) chuan kum 1298 khân Kristian mi ropuite hriat reng nân tiin ‘Doctor of the Church’ tih chawimawina ropui tak a buatsaih ṭan a. He chawimawina ropui tak hi vawiin thlengin kohhranten an inhlân chhâwng zêl a. Tîrhkoh Paula aṭanga chhiarin Kristian mi ropui sawmthum te hnêna hlan a ni tawh a. Khawthlang kohhranho zîngah pawh Kristiante chawimawina sâng ber a la ni fo. Augustine-a pawh hi Kristian hmasate hun laia chawimawina sâng ber ‘Doctor of the Early Church’ dawngte zînga mi ropui tak a ni a. Amah hi Kohhran hmasa Pate zînga thusawi thiam leh bishop hmingthang bera ngaih a ni bawk. 

Latin ṭawnga a hming chu ‘Aurelius Augutinus’ a ni a. Africa hmâr lama Hippo khaw bishop a nih avângin Augustine of Hippo tia koh a ni bawk. Pathian thu thiam (Theologian), mi fing (philosopher) leh lehkha ziaktu hmingthang tak mai a ni a. A lehkha ziahte chuan khawtlâng leh kohhran nasa takin a tihmasâwn a, khawthlang finna (philosophy) tam tak pawh a thuziaka innghatte an ni. A kutchhuak pahnih ‘Pathian Khawpui’ ‘The City of God’ leh ‘Inpuanna’ ‘Confessions’ tihte phei chu vawiin thlengin kohhran leh khawtlâng nun siam ṭhat nân a la ṭangkai hle a ni.

Athanasius-a chanchin (A.D. 295-373)

By: Joseph Saia (Australia)

“You cannot put straight in others what is warped in yourself.” (Athanasius)

Athanasius-a hi kum zabi palina laia Alexandria khaw bishop a ni a, Kristian thurin humhalhtu mi huaisen tak a ni bawk. Kohhran hmasa hun laia zirtîrna dik lo kalpuitu Arius-a leh a hnungzuite chuan kohhran an chawk buai nasa hle a. Chutih lai chuan bishop Athanasius-a hian Arius-a zirtîrna chu nasa takin a dodâl a, a hun laia zirtîrna dik lo dodâl nasa ber pâwl a ni hial âwm e. Amah hi Pathian thu thiam tak a nih avângin mi ṭhenkhat chuan Athanasius Ropuia tiin an ko va, Athanasius the Confessor tih pawhin an ko bawk. Alexandria khuaah kum 45 zet bishop hna a thawk a, chumi chhûng chuan Rom lal dang dangten ṭum nga zet khua aṭangin an hnawt chhuak a. Mahse, Pathian thu dik tak chu nghet taka a vawn tlat avângin rorêltute hmaah pawh a zâm ve mai mai ngai lo a ni. A.D. 325 khân Nicaea Inkhâwmpuiah Arius-a hnungzuite nên thurin chungchângah nasa takin an inhnial a, a tâwpah chuan Arius-a leh a hnung zuite chu a tlâwm zâwkah an ṭang a, Athanasius-a hming pawh a lâr phah hle a ni. 

Alexandria khaw bishop Alexander-a chu A.D. 328-ah a thi a. Chumi hnu chuan Athanasius-a chu Alexandria khaw bishop atân ruat a ni zui a. Hetih hun lai hian Arius-a zirtîrna thlâwp tlattu Nicomedia khaw bishop Eusebius-a chuan Rom lalber Constatine-a te, Constatius II-a te, Julian-a te leh Valens-a te chu lamṭang atân a hmin vek tawh a. Athanasius-a chuan Arius-a zirtîrna chu zirtîrna dik lo leh Bible zirtîrna nêna inmil lo tiin huai takin a hnâwl zêl a. Arius-a zirtîrna thlâwptu Rom lalte leh rorêltute pawh huai tak taka a beih ṭhîn avângin tum nga zet a awmna khua aṭanga hnawh chhuak a tâwk a, chuta ṭang chuan‘Khawvêlin a do Athanasius-a’ tiin hming an phuah ta hial a ni. 

Thlarau mi Pu Chawngkhupa ( Mizo PDF Version)

Thlarau mi Pu Chawngkhupa chanchin hi mi tam takin an lo ziak tawh ṭhîn a, chûng zînga famkim leh changtlung deuh ber chu Padma Shri R.K. Lalhluna ziak hi a ni. 

He lehkhabu hi lehkhabu hlu leh ro tling a ni a, a mamawhte tân awlsam zawka an chhiar a, ro hlu anga an vawn tlat theih nân PDF format-in ka rawn chhawp chhuak a, a hnuaia Link-ah hian a download theih e. 

Thlarau mi Pu Chawngkhupa

By: RK Lalhluna (Padma Shri Awardee)

Lunglawn 

2nd Edition 1985

Published by the Gilbert & Raymond Publication

Electri Veng, Aizawl

Mizoram

Download Here >>> Thlarau mi Pu Chawngkhupa

Ṭawngṭai mi George Muller-a

By: Joseph Saia (Australia)

Muller-a hian secretary pawh nei lovin kum tam tak rawng a bâwl a. Mi hrang hrang hnênah kum tin chhânna lehkha 3,000 a ziah bâkah Bethesda Chapel-ah pastor hna a thawk bawk a, Scriptural Knowledge Institution thil tum zawng zawngte tihlawhtling tûrin taima takin hna a thawk ṭhîn. Muller-a’n a dam chhûnga mi mal leh pâwlho hrang hrang aṭanga a pawisa dawn zât chu Pound maktaduai sâwm leh panga a ni a, chumi hmang chuan zirna sikul 117 a din a, hnuchham naupang 2,000 chuang a enkawl bâkah thawktu mi 112 a ruai bawk a ni. Muller-a hian a dam chhûngin zirlai mi 123,000 a chher chhuak hman a, khawvêl hmun hrang hrangah missionary 189 a tirh chhuah bâkah ṭawng chi hrang hrang hmangin Bible 285,407 leh Pathian thu ziak vaibelchhe 11 chuang a sem chhuak bawk a ni.

Bishop Ambrose-a chanchin (B.C. 340-397)

By: Joseph Saia (Australia)

“If you demand my person, I am ready to submit: carry me to prison or to death, I will not resist; but I will never betray the church of Christ. I will not call upon the people to succour me; I will die at the foot of the altar rather than desert it. The tumult of the people I will not encourage: but God alone can appease it.” (St. Ambrose’s word, standing before the judgement of Emperor Valentinian II)

Kum zabi palinaah khân Kristiante zîngah zirtîrna dik lo tam tak a lo chhuak a. Chûng zirtîrna dik lo lak aṭanga Chanchin Tha humhalh leh vên him chu a hun laia Kristiante mawhphurhna lian bera ngaih a ni. Kum zabi palina tâwp lam khân Kristian hruaitu ropui Bishop Ambrose-a chuan Chanchin Ṭha humhalh hna nasa takin a thawk a, Kristian hmasate zîngah chuan rinna dik humhalhtu (Defender of Faith) tiin an ko ṭhîn. Pathiana kan felna (Rigteousness) tih ṭawngkam pawh a hmang uar ber zînga mi a ni a, mi tam tak chuan ‘Felna Pa’ tiin an ko hial a ni. Original Doctor of the Church pali zînga chhiar tel a ni a. Amah hi Pathian thu duh fir tak ni mah se, kum 34 a tlin hma zawng kha chuan baptisma pawh a chang lo va, rawngbâwltu nihna pawh a la chelh hek lo.

Vân bank-a ro khâwltu C.T. Studd-a (1860-1931)

By: Joseph Saia (Australia)

“If Jesus Christ is God and died for me, then no sacrifice can be too great for me to make for Him.” (C.T. Studd) 

C. T. Studd-a hi a hun lai chuan England rama cricket khêl thiam bera an sawi, mi lâr leh hmingthang tak a ni a, mi hausa tak chhûngkua aṭanga piang leh sei lian a ni. Kum 1880 chho aṭang khân criket khêl thiam ber tiin khawvêl chuan a ngaisâng êm êm mai a; mahse, kum 1873 chhova evangelist ropui D.L. Moody-a leh a thawhpui Sankey-a ten Kumpinu awp thliarkâr hrang hranga kum thum chhûng atâna an duan lawk, Chanchin Ṭha hrilh beihpui an thlâk lai khân Mr. W-a an tih thuhriltu (evangelist) pakhat Pathian thusawi aṭangin a piang thar ta hlauh mai a. Hannah Whitall Smith-i ziah 'The Christian’s Secret of a Happy Life (Ringtu Nun Hlimna Thurûk) tih lehkhabu a chhiar hnu phei chuan a nun pum Pathian tân a hlân ta hial a ni. 

George Muller-a chanchin tawi

By: Joseph Saia

George Muller-a

(1805-1898)

“Faith ends where worry begins and worry ends where faith begins.” (George Muller) 

‘Ṭawngṭai mi leh fahrahte pa’ tia an koh George Muller-a hi missionary ropui tak anih bâkah England-a hnuchham leh fahrah enkawlna hmasa ber Ashley Downs Orphanages dintu a ni a. Amah anga hnuchham naupang enkawlna kawnga thawh hlâwk hi khawvêlah an tam lo hle ang. A hnathawh dân mak dangdai bîk êm êmna chu hnuchham naupang enkawlna atân mi angin mi mal leh pâwlho hnênah kut a dawh ve ngai lo va, ṭanpuina pawh a dîl ve ngai miah lo hi a ni. Ṭawngṭaina hi a hmanraw neih ṭhat ber a ni a, engkim mai hi ṭawngṭaina hmangin Pathian hnênah a dîl a, a hnuchham enkawl naupang sanghnih zet chu tûk khat lek pawh chhuanchhamin a awmtîr ngai lo. 

Pathian chungah chauh rinna nghata rawngbâwl mi a ni a, mi lian leh mi thil tithei deuhte chungah a innghat ve ngai lo. Hetiang taka Pathiana innghat ngam mi a nih avâng hian Pathianin a mamawh tinrêng a hria a, ṭhian ṭha leh rawngbâwlpui tûr mi ṭha tak tak a pe zêl mai a ni. Muller-a hian Pathian chauh rinchhanin England khawpui Bristol-ah acre 13 (ṭin 13 hmun vêl) zeta zau huan a lei a, chutah chuan hnuchham châwmna in lian tak tak panga a sa a. Chûng in lian leh ropui tak tak chu tûn thleng hian Ashley Downs Orphanage tia khawvêl hriat a la ni reng a ni. 

Muslim-ho zînga Chanchin Ṭha meichher chhitu Henry Martyn-a

 By: Joseph Saia (Australia) 

“The spirit of Christ is the spirit of missions. The nearer we get to Him, the more intensely missionary we become.” (Henry Martyn)

Khawvêl missionary ropui zînga mi tam zâwkten kan hriat lâr lem loh; mahse, a rawngbâwl hun kum ruk chhûnga a tih tûr tizo vek hman missionary ropui tak chu Henry Martyn-a hi a ni âwm e. Martyn-a hi mi thiam, rawngbâwlna kawnga mi inpe zo leh ṭhahnemngai tak a ni a. Kum 24 mi a nihin India ramah a kal a. British East India Company hnuaiah Chaplain hna thawkin kum ruk chhûng Chanchin Ṭha hril rawngbâwl hna a thawk a. Chumi chhûng chuan Urdu, Hindi, Bengali, Persian leh Arabic ṭawng hmangin Bible a letling a. India ram leh khawvêl hmun hrang hranga Muslim-ho hnêna a rawngbâwlna avângin mi ṭhenkhat chuan Muslim zînga Chanchin Ṭha hril kawnga sulsutu leh kawng sâttu (First Modern Missionary to the Muslim) tiin an ko hial a ni. 

Burma ram pioneer missionary

Adoniram Judson-a 

(1788-1850)

“The motto of every missionary, whether preacher, printer, or school-master ought to be ‘Devoted for Life’” (Adoniram Judson)

By: Joseph Saia (Australia) 

             Burma rama Chanchin Ṭha hriltu ropui leh sulsutu, pioneer missionary hmingthang Adoniram Judson-a hi America rama Congregational kohhran member niin North America aṭanga Burma rama Protestant missionary ni tûra an tirh hmasak ber a ni. Kum 25 mi a nihin a nupui Ann-i nên Burma ramah an lût chho va. Baptist Mission enkawlna hnuaiah kum 38 chhûng zet Pathian tân rinawm takin Burma ramah rawng an bâwl a. A ṭhianpa Luther Rice-a nêna an rawngbâwlna aṭangin America rama Baptist Association chuan missionary tam tak a tirh chhuah phah nghe nghe a ni. 

Kum 1812, February ni 5 khân Judson-a chuan Sunday sikul zirtîrtu, kum 21 mi Ann Hasseltine (Nancy-i) chu nupuiah a nei a. A tûkah Judson-a chu rawngbâwl tûra nemngheh (ordained) nghâl a ni. An inneih aṭanga a ni 13-na, February ni 19, kum 1812-ah Salem lawng chawlh hmun aṭangin India ram Culcutta khawpui panin an chhuak a. Kum 1812 June thla laihawl vêlah Adoniram Judson-a te nupa chu Culcutta an rawn lût chho ta a. Hetih hun lai hian ‘Serampore Trio’ an tih William Carey-a te, John Marshman-a leh William Ward-a ten India ram, Serampore hmunah rawngbâwlna ngelnghet tak an nei tawh a. British East India Company chuan ram dang mi, rawngbâwl tûra lo kalte chu nasa taka a khuahkhirh tlat avângin Adoniram Judson-a te nupa chu India ram aṭang chuan Burma ramah an lût chho ta a ni. 

Hudson Taylor-a chanchin tawi

By: Joseph Saia (Australia) 

James Hudson Taylor-a hi China rama missionary hmingthang leh rawngbâwltu ropui a ni a. Amah hi British Protestant Christian missionary niin ‘China Inland Mission (CIM)’ dintu a ni bawk. China ramah kum 51 chhûng mission hna a thawk a. Chumi chhûng chuan zirna sikul 125 lai a din hman a. Chuta ṭanga piangthar ringawt pawh mi 125,000 chuang an tling a ni. China ram hmun hrang hrangah Mission Station 300 chuang a din a, chûngte chu missionary 849 leh Chinese tualchhûng mi (local helper) 700-ten tûn thleng hian an la enkawl chhunzawm zêl a ni. 

Brighton Beach, England-a China Inland Mission a din tirh chuan Taylor-a’n bank-ah pound 50 chiah a dah a, chu chu a rawngbâwlna bûl ṭanna chu a ni mai. Mihring lam aṭanga ngaihtuah chuan thil tih chi niin a lang lo. Amaherawhchu, awm lo ata awmtîr theitu Pathian chu a ring ngam tlat a, Pathian chuan mualphovin a awmtîr dâwn lo tih thlarau mitin a hmu chiang a. Tihtak meuhva Pathian hnêna a ṭawngṭai hnu chuan kum khat chhûng lekin bank-a a pawisa dah chu Pound 2,000 chuang a tling ta mai a. Kum 1866-ah chuan China Inland Mission hnuaia volunteer missionary 24 ten China ram an thleng a, a hnuah mi 70 chuang an thlen belh a, a hnuah 102, a tâwpah chuan missionary 800 chuang zet an nei thei ta a ni. 

A thih hnuah pawh China Inland Mission chuan rawngbâwlna zau takin a kalpui zêl a, CIM chu ram pâwna Protestant mission lian ber pâwl a la ni chho zêl a ni. Ṭawngṭai leh Pathian rinchhan tak meuhva rawng a bâwlna chuan mi tam tak rilru a hnehin mi dang tâna nun hlâna rawngbâwl duh mi tam tak a hring chhuak a. Olympic Gold Medal pawh lo dawng tawh, Scottish missionary Eric Liddell-a chuan Chanchin Ṭha avângin China ramah a lu a phûm a, America rama missionary Jim Elliiot-a pawhin Ecuador rama hnam mâwlte tân a nunna a hlân bawk. Irish missionary Amy Carmichael-i chuan India ramah kum 55 zet rawngbâwlin Chanchin Ṭha a vahvaihpui a, kum 83 mi a nih thlengin Tamil Nadu (Chennai)-ah rawngbâwlin a hun a hmang a. British evangelist Audrey Wetherell Johnson-a chuan kum 1959-ah khân China ramah Bible Study Fellowship a din a, tûn thleng hian chu rawngbâwlna chu chhunzawm zêl a la ni. 

I PATHIAN TÂWK TÛRIN INPEIH RAWH

                                                       (Amosa 4:12)

By: Joseph Saia

            Kum 1741, July 8 zânah khawvêla Pathian thu sawi thiam tak Jonathan Edward-a chuan Amosa 9:2-3 denchhenin, “Pathian thinurna kuta sual fate” (Sinners in the Hands of an Angry God) tih thupui hmangin Massachusetts State, Northampton khuaa Church of Christ biak inah thu a sawi a. Pathian thinurna hlauhawmzia leh Pathian rorêlna hmaah mi tin kan la ding vek dâwn tih a sawite chu mipui lo kal khâwmte chuan ngun takin an ngaithla a. Ṭhenkhat phei chuan hremhmunah an tawlh liam nghâl mai dâwn emaw tiin an thutthleng vawnbân chu nghet takin an vuan ang fer fur hlawm a. 

           

                

       A thusawi tâwp lamah chuan, “Unau duhtakte u, ni khat khatah Pathian thinurna chu a lo thleng ngei dâwn a, chu chu tu mahin kan pumpelh dâwn hauh lo a ni. Kan zîngah Krista la nei lo kan awm em? Kan awm chuan Pathian thinurna lâk atânga inthlirfihlim dân ngaihtuah tûrin ka fuih duh a che u,” tiin a thusawi chu a titâwp a. Thlarau Thianghlim hnathawh avângin a hnu lawkah Northampton, Massachusetts-ah thlarau harhna nasa tak a lo thleng a, mi tam takin an sualte an sim a, Pathian tâwk tûrin a inbuatsaih ta vek mai a ni. Chuta ṭang chuan harhna chu hetih hun laia New England tia an koh Maine, Vermont, New Hampshire, Massachusetts, Connecticut and Rhode Island-ah te a thleng zêl a. Hei hi America rama harhna ropui ‘Great Awakening’ bul inṭanna chu a lo ni ta reng mai a ni an ti.

            Zâwlnei Amosa pawh hian Israel chhûngte chunga Pathian thinurna leh rorêlna lo thleng tûr chu chiang takin a hria a, chu vâng chuan Israel mipuite hnênah, “Chuvângin, Aw Israel, i chungah hetiang hi ka ti ang: i chungah hei hi ka tih dâwn avângin, aw Israel, i Pathian tâwk tûrin inpeih rawh.” (Amosa 4:12) tih thu hi huai takin a puang ve ta a ni. Kan thupui a fiah deuh zâwk nân Thuthlung Hlui huna Israel chanchin tlêm târ lang hmasa ila a ṭha ang.

Khawvêl Mamawh Chhânna (Mizo PDF)

Ziaktu: Rev. F. Sângvêla
Second Edition 2010
Published by:
The Publication Board,
Baptist Church of Mizoram

Download Here >>>>Khawvêl Mamawh Chhânna (PDF)

Thlarau Thianghlim

Mizo Sunday School Union (MSSU)
Puitling Sunday School Zirlai 2016
Thupui: Thlarau Thianghlim
Buatsaihtu: Rev. Dr. Rev. Thlanghmingthanga
B.Th,. B.D., M.Th., D.Th.
Published By: Synod Literature & Publication Board

Download Here>>> Thlarau Thianghlim (Mizo Lehkhabu PDF)

CT Studd-a Chanchin (Mizo Version PDF)

“Isua hi Pathian a nih a, ka tan a thi a nih si chuan engkawng mahin ka rul seng dawn lo,” titu CT Studd-a hi England rama mi hausak tak chhungkua atanga seilian a ni a. Criket khel thiam leh infiamna lama mi hmingthang tak ni mahse Chanchin Tha avangin khawvel hmin thanna leh ropuina zawng zawng kalsanin China, India leh Africa-ah Pathian rawng a bawl a, a chanchin hian mi tam tak nun a tidanglam nasa hle a ni.

Mizoram Prebyterian Kohhran chuan kum 2016 Khawvel Sunday School Ni-a naupang lam zir atan ‘CT Studd-a chanchin’ thlangin a ziaktu atan Pu Lalhruaitluanga Ralte a ruat a. A ziaktu hian chipchiar leh ngaihnawm taka a rawn ziak avangin a chungah lawmthu kan sawi. He lehkhabu hlu tak tak hi Mizoram Presbyterian Kohhran chuan mi tam zawkte chhiar theih atan PDF Form-in a rawn chhawp chhuak a, kohhran leh member-te chungah pawh lawmthu kan sawi bawk.

Download Here>>>>> CT Studd-a Chanchin

Catacomb Martarte (Mizo Version PDF)

'Catacomb Martarte' tih bu, Upa Chawngzika buatsaih hi a ngaihnawm mai ni lovin a bengvarthlak bakah tunlai huna ringtute fuih theitu lehkhabu tha tak a ni. 

Download duhte tan >>>> Catacomb Martarte-By: Upa Chawngzika

Burma Presbyterian Kohhran Chanchin

Burma Presbyterian kohhran chanchin, Rev. Dr. L.R. Bawla, M. Th. kutchhuak hlu tak chhiar i duh chuan a hnuaia Link-ah hian download hmasa la, ngun takin i chhiar dawn nia...

Hetah hian download rawh le>>>>>> Burma Presbyterian Kohhran Chanchin

Kohhran Thurin (2015 Puitling SS Zirlai Bu)

Kum 2015 Mizoram Presbyterian Kohhran buatsaih, Puitling Sunday School zirlai bu chu PDF-a chhiar theih turin an rawn dah a, kohhran hruaitute leh member zawng zawngte chungah kan lawm hle. He lehkhabuah hian Kohhran chanchin leh thurin kim chang tak tarlan a ni a, a buatsaihtu Rev. C. Lalsangliana B.D., M.Th. kutchhuak hlu tak hi download la, ngun takin i lo zir ve dawn nia.

Hetah hian Download rawh le>>>>> Puitling SS Zirlai- 2015- Kohhran Thurin

Kohhran hmasa chanchin (A.D. 1- A.D. 500)

By: Rev. Lalchhuanliana 

Kohhran hmasa chanchin kim chang leh ngaihnawm tak chhiar i duh chuan Rev. Lalchhuanliana ziak hi chhiar ngei ang che. He lehkhabuah hian Kristian hmasate hun laia Kohhran Pate chanchin leh Kristiante tuarna tam tak tarlan a ni a, chhiar a nuamin hriat tur pawh a tam hle. A.D. 1 atanga A.D 500 inkara Kristiante chanchin hian tunlai Kristiante hi min cho nasa hle a ni.

Download duhte tan >>>>> Kohhran hmasa chanchin (A.D. 1- A.D. 500)