Ka Zinna Kawng Chhukchho

Kum 1999 June thla tantir kha a ni a, Kalay Phaiah pawh ruahtui a tam ve tawh hle a, leilet paho pawh an chakkhai dap vela an tul lai tak a ni. Yangon-a kan sikul thar hawn tur a nih avangin a rang thei ang bera Yangon lam chhuk a tul a, Kalay- Mandalay Bus Express ticket vel ka tihfel hnu chuan Bus Station-ah thianten min thlah a, bus a chhuah hma chuan ka chuanpui turte thlirkual pahin Mizo nula pakhat tal an tel dah lo maw tihin ka mit ka han lenkual vel a, Mizo nula an nih leh nih loh ka hriatchian loh nula nalh tak tak pathumte chu ka mitin a tawk ta chaih mai a, eng mi nge an nih a, eng ti tura chhuk ve nge an ni tih chu ka hriat chak ber a ni.

Kawngtluana ka ei tur hmawmsawmte ka lei hnu chuan thiante nen, "Mangtha aw, dam takin le," tiin kan inthlah fel ta a. Bus chhung ka lut chuan ka thawmhnawte ka han rem fel a, chutia ka buai nak nak lai chuan ka hriat chak em em nula pathumte pawh chu an rawn lut ve nghal a, beisei ang ngei maiin ka hma zawn tak mai seat-ah chuan an thhuho ta a,ka rilru te te in, "In va han nalh hlawm tak ve aw," ka ti reuh reuh va, ka hriat loh chhungin ka thinphu pawh normal aiin a lo rang deuh hman niin ka hria. Kan kalchhuah hma chuan,"Lalpa tluang taka Yangon ka thlentheih nan kawngtlaunin min hruai ang che," tiin rilru tawngtaina ka hmang ta a. Kalaymyo kan chhuahsan hma atangin ka thutpui nula pathumte chuan ka rilru an luahkhat tlat a, an tawngkam chhuak leh awm dante chu rilruin a chang khiau mai a, han biak chawt mai chu ka chak hle na a, hmel hriat loh nula han biak mai la chu thil mawi niin ka hri si lo, hun remchang a awm em ang chu tiin ka inhnem ta a.

India-Myanmar Fellowship Road siam hma a nih avangin kawng a la tha lo hle a, Kalaymyo kan chhuahsan fel hnu lawk chuan vanduaithlak takin Chikung khua thlang lawka dum thuk tak maiah chuan kan motor a tang ta a, rei tak an buaipui hnu pawha a chhuah lawk theih loh avangin motor dang tam tak pawh a zam phah a, passenger-ho pawh a chhuk a chhovin kan phe mer mer mai a ni. Chaw leh tui zuar an awm loh avangin a rang thei ang bera Kalaywah chhuk tur chuan rem kan ruat ta a. Kalaywah atanga Pin Ta Run rawn zawhchho lawng pakhat remchang a awm hlauh mai a, chu lawng chu kan chuangthla ta a. June thla ruahtui mai chuan Chindwin Luipui a tikhat zo rih lova, tui luang pawh a la chak tha hle a ni. Pin Ta Run phei chu tlangsang tak tak atanga tui rawn inhlawmkhawm an nih avangin a chak leh zual a, hmun thenkhatah phei chuan tuizangkhauh te, tuilivir te leh tuisuar kan tih ang te hi a awm nual a, accident awm em lovin hlau leh khur chung chuan Kalaywah chu kan zuk thlengthla ta hram a.

Kalaywah-a fuankhawm passenger-ho zawng zawng chu hotel tinah kan darh nuai mai a, a then Chindwin ral lehlama Kawl nula nalh tak mai awmna Beer dawr ti tawkte leh kei chu Sabuhti awmna Taung Za Lat ngei ngei te tawkte pawh kan awm nual a, kei erawh chu zawn ruk leh vei ruk nei tlat ka nih avangin riah hmun tur pawh thlang lawk thei lo chuan ka rilru a insual nasa hle a, a tawpah chuan beiseina sang tak nen riah man tlawm zawkah chuan ka sipai mal mut ta a. Zing khua a lo var chu kan motor pawh a lo chhuak fel tawh mai ni lovin Chindwin Luipui ral lehlamah lawngpuiin a lo phur kai fel diam tawh a, zing chaw kan ei fel hnu chuan passenger-ho zawng zawng kan lawn leh a, Maha Miang kawng chhukchho tak maiah chaun kan tlanthla leh ta a. Dar kar thum vel tluang taka kan tlan hnu chuan kawng tinal tawk chiahin ruah a rawn tla ser ser a, kawng chhuk lamah phei chuan nui hmel hmuh tur pawh kan awm tawh lo niin ka hria. Awihchho kan han lawn chiah chu kan motor a slip nghal a, a tan nasat pauh leh a tawlh nasa ting mai si a, conductor-ho ten motor tyre-a thirkhaidiat an veh vek chung pawhin awmzia reng a nei lo. Chaw lo tui lova kawng laka han riah chu thil ni thei a nih loh avangin a theih ang anga khua pakhat tal ban tur chuan mel 2 zet chu ruahsur karah kan kal diah diah a, ka hriat chak em em nula pathumte pawh chuan an slipper-te phelhin an pen ve hlawk hlawk a.

Chutia kan kal lai tak chuan ka rilruah, "Khualzinna ram khawvelah hian chatuan khawpui kan pan laiin," tih hla hi a rawn lang hlawl mai a, kal pah chuan ka rilruin ka sa phei zel a. Vanneihthlak takin in sawm vel awmna khua pakhat chu ka thlang ta a, hotel leh riahbuk awmna khua a nih loh avangin, "Kan chaw in ei chuan puan leh riah hmun kan buatsaihsak thei ang che u," an lo ti zel a, duhthlangthei kan nih tak loh avangin nula pathumte nen chuan kan thlengho ta a. Ruahsur kara lo kal kan nih avangin kan thawmhnaw huh te chu kan han thlak a, in neitu nu chaw chhum nghah pah chuan, good time kan nei ta a," Khawia awm nge in nih a, engti tura chhuk venge in nih? In tawng hman hi vawikhat mah ka la hre ngai lova, eng tawg nge ni?" tiin hawihhawm takin ka hriat duhte chu ka zawk a, "Tahan a awm kan ni a, Lumbawng mi kan ni. Thailand ram Chiang Mai-a Baibul sikul kal kan ni a, Mai Su lam pam tura kal kan ni. Naktuk tlai lam dar hniha Mandalay Airport atanga thlawk tur kan ni a, ticket pawh booking sa diam tawh a ni. Kan khelh loh phei chuan cheng tam tak kan seng thlawn dawn a ni,"tiin an kal dan turte leh an hmanhmawh thu te chu kimchang takin min hrilh a. Chutia kan ti ti melh melh lai chuan in tek nu pawhin chaw ei a lo hman fel der mai a, vawksa tui tak nen chuan kan ei ta a. Nula nalh tak takte nena chaw han ei chu nuam ka ti hle mai a, ka emotion erawh a normal chiah lo ni berin ka hria.

Chaw kan kham fel hnu chuan pawn lamah coffee ruai kan kilho leh nghal a, hun remchang dang kan nei leh tawh dawn lo tih ka hriat avangin kan khualzina kawng chhukchhova kan thiltawnte chu ti ti nuamah tihian ka sawi ta a:- Kalaymyo Bus Station kan chhuahsan hma atang khan mimal taka hriat che u ka chak hle a, sumdawng mi nge in nih college naupang tih hriat ka chak hle che u a ni. In chezia leh in chei vel dan ka hmuh atangin mi naran mai in ni lo tih a chiang a, mahse ruahsur kara kan kal laia in ke no tak maiin dum a han daipil thawk thawk mai ka hmuh kha chuan ka rilru te te in, " An duhthlan chu a ni bik hauh lovang le," ka lo ti a, ka rilru hre phei ula chuan in nui nasa hle in ka ring. Naktukah tluang taka Mandalay kan thlen chuan nangni thlawhna in chuang ang a, vawina chawn var no lang khawpa in dum dai hi chu in ngai lo mai thei a ni. Mahse thlawhna in chuan hnua in theihnghilh loh atana ka duh pakhat chu, 'He nihnih chhunga kan thiltawnte hi kan nitin nun atana entirna tha tak mai a ni. He kan khuazinna khawvelah hian a changin lungngaihna leh beidawnnate tawkin chuau leh rumin kan awm thin a, mahse hengte hi kan mikhualte mai an ni a, kumkhuain kan hnenah an awm reng dawn lo. Zingkhua a lo var ang a, an mahni hmunah an kirleh mai dawn.. Harsatna leh mangannate hi ruahsur hmaa chhumpui leh khuavar hmaa thim chhah tak ang mai chuah an ni. Keini pawh hetiang hian beidawng leh hrehawmin kan awm reng dawn lo. Naktukah nangni thlawhna in chuang ang a, keipawh rail ka chuang dawn a ni. Famkim lohna kahwvela cheng kan nih avangin kan duh a famkim thei ngai dawn lo. Lungaihna leh mangannate hi kan duh emaw duh lo emaw kan tawn turte an ni a, a thlir dan leh hmachhawn dan kan thiam a tul tak zet a ni.Chuvangchuan Pathian Thu inzirna hmunah pawh harsatna in tawk zel ang.Mahse he lei ram hi kan ram a ni lova, kan khualzina ram mai a ni tih in hmuhfiah hun apiangah engkim hi tawrhna leh channaah in ruat thiam ang a, in nunah hlimna leh lawmna par mawi tak a lo parchuak dawn a ni," tia ka sawi zawh chuan sana ka han en a, dar 11 lai a lo ni ta der mai a, mut zai ka rel ta a.

Zing khua a lo var chuan kan motor pawh kan riahna khuaah a lo thleng fel diam tawh a, zing thingpui kan in zawh chuan Mandalay chu kan panthla ta a, harsatna dang engmah awm tawh lo chuan Mandalay chu zing dar 12 velah kan thleng ta a. Bungrua leh thawmhnaw vel kan tihfel hnu chuan an zinga upa deuh ber chuan Sap tawngin, "Thank you very much, brother Joseph. See you and God bless you," min ti a, kei pawh chuan," Welcome, I miss you all.Hope to see you again. And keep in mind a brief story of our journey, it's our life story. And don't forget this: Life's not all what you want, but all you have.," tia inthlahna thu tawi ka sawi zawh chuan,"See you, Bye Bye," tiin kan in thlirliam vawng vawng ta a.

Print this post