The Rich Man & The Cobbler

By: Josephsaia

Khaw pakhatah hian mi hausa tak a awm a, a building ropui tak kawtah chuan pheikhawk thui mi rethei tak a awm bawk a. Pheikhawk thui pa chu mi rethei tak a nih avangin zing atanga Ni thlak thlengin a hna chu taima takin a thawk a, hah hle thin mah se a hlim em em mai a, nitin hian a zai a, a faifuk hlerh hlerh thin a. A thenawmte leh veng hnaiten an hmuhin mak an ti a, a nun an awt em em mai a, a pheikhawk thuinaah chuan naupang puilting leh pitar pitarte pawh rawn kalin a thil siamte en in leh a hlasakte ngaithla turin an rawn kal thin a, a hmingah “Pu Hlima” an phuahsak nghe nghe a.

Pu Hlima pheikhawk thuina hmuna lo kalte chuan, “Pu Hlim, engmah nei der si lo, engtin nge maw nitin mai hlim taka hna i thawh a, i zai reng theih bik ni?” tiin an zawt a, mahse Pu Hlima chuan nui chungin, “Zaite chu a nuam alawm zai ve rawh u!” tiin awlsam deuh chuan a chhang mai zel a, faifuk hlerh hlerh chuan a hlate chu a han sa leh a.

Pu Hlima kawta awm mi hausa erawh chuan building ropui leh mawi tak a nei a, thawhhnaw tha tha a inbel a, a duh tinreng a lei thei a, amaherawhchu mi rethei leh chanhaite erawh vawikhat mah a la tanpui ngai hauh lo. Mi hausa pa chuan engkim mai nei mah se la, rilru leh ngaihtuahna tam tak a sen thin avangin a hlim thei ngai reng reng lova, zanah pawh tui taken a mu thei ngai lo. Zan khua maiin a neih rosumte chu a han sungtuah a, hma lam huna a awm dan turte a ngaihtuahna chuan a rilru a tibuai a, zan khat te mah hi tui takin a mu thei lo a ni ber mai. Zing lam thlenga a mut theih loh chang phei chuan Pu Hlima zing tho zaite chu a hre thin a, a rilruin, “Muttuina hi chenga lei theih ni se ka va ti teh lul em!” tiin a ngaihtuah fo thin.

Nikhat chu hetiang hian a ngaihtuah ta a. He ka thenawm rethei tak hi pheikhawk thuia nitin ei zawng a nih avangin a nupui fanauten ei leh bar, silh leh fen thlachham lova an neih ve theih nan ka han tanpui ve teh ang tiin a ngaihtuah a. Tichuan Pu Hlima lo leng tur chuan mi a tir ta a.

Pu Hlima chu a lo kal a, mi hausa pa chuan, Pu Hlim, I pheikhawk thuina atang hian kumkhatah cheng engzatte nge I khawl ve theih?” tiin a zawt a. Pu Hlima chuan lu hiat pahin, “Ah....ka pu, chutiang zawng pawh chuan ka lo chhut ngai ve hauh lo mai a, ka hlawh ve te chu a bei tham em a, ka hmuh rual rualin a zo nghal zel a ni ber mai, mahse nitin hlim taka ka thawk thei hi ka lawm a ni,” tiin a chhang a.

Mi hausa pa chuan, “Anih leh nikhatah engzat nge I hmuh theih thin ni?” tiin a zawt leh a. Pu Hlima chuan, “Ah…ka pu, nitina ka hlawh zat chu a inang vek ngai lo. A chang chuan a tam ve a, a chang chuan engmah hlawh loh changte pawh a awm thin. A bik takin sawrkar hnathawh nite hian hnathawh tur ka nei ngai lova, heng nite hi tlem deuh se, ka tan chuan chhungkaw chawm nana sum zawn hi a har teh mai asin, ka pu!” tiin a chang leh a.

Mi hausa pa chuan, “Sum zawn a harsa I ti si a, I hlim thei em em mai hi mak ka ti a, hlim taka I awm anga awm ve hi ka chak thin a, tun aia I hlim leh zual theih nan hei te hi la ve rawh!” tih pah chuan a kutah dollar 500 chu a humtir ta lawih mai a. “Kal ta la, tichuan heng cheng hi rem hre takin I va hmang dawn nia, he cheng hian ni tak tak a chawk zangkai dawn che nia” a ti a.

Pu Hlima chuan hetiang zat zata cheng tam neih hi a inring ngai lova, vawikhat mah a la nei ngai hek lo. Heng zat cheng hi chuan ka dam chhung a daih ngei ang tiin a ngaihtuah a, tichuan cheng chu a in ah a hawn a, tichuan a inchhunga a thulkhung bawmah chuan a thukru ta a.

Zan a lo thleng a, a sum tam tak neih chu a han suangtuah vel a, duhthute a han sam vel a, amaherawhchu rukru an awn kal ang a, zanah min rawn suam mai ang tih hlauhnain a khat a, a in sir vela ui thawm ri vel leh a inchhunga zawhte thawm tak ngial pawh rukru thawm emaw a ti zo vek a, a muhil thei reng reng lo. A tuk zing khawvar hnuah pawh tun hmaa hlim taka a lo sak thin hla te pawh a sa thei tawh lova, a faikuk ri re re te pawh hriat tur a awm tawh meuh lo. Zinga a hla sak leh a faikuk mai mai nghaithla tura lo kalte pawh a lo lawm thei tawh lova, a thil neihte chu an hria ang a, eng emaw an dil ang tih hlauhnain a khat a, a hlimna chu a lo kiam deuh deuh bawk a.

Chutianga hlimna reng a neih theih tawh loh avang chuan Pu Hlima chu a beidawng hle mai a, engvanga hlim thei ta lo nge ka ni tih a inngaihtuah ta a. A tawpah chuan, “Min tihlim lo bertu chu he ka cheng neih hi a ni e,” tih a hmuchhuak ta a. Chuveleh mi hausa pa hnenah chuan a cheng dawnte chu kengin, “Ka pu, I cheng min pek avangin ka lawm e. Amaherawhchu he I cheng hian ka hlimna leh muttuina zawng zawng min rukbo sak vek a, chuvang chuan I cheng min pek zawng zawng hi min pawmsak leh la, ka hlimna thin ka hla leh ka faifukte kha min pelet leh ang che. Thil pawi tak ka lo ti a, ka inchhir tak zet a ni,” a va ti a.
 

Mi hausa pa chuan Pu Hlima thusawi chu ngun takin a lo ngaithla a, “Unau pa, I hlimna tur ka siam emaw ka lo ti a, mahse I lungngaihna ka lo siam zawk a ni maw!! Ka sum neih ka pek hnu che atang khan vawin thleng hian tui takin ka lo mu thei a, mahse I hlimna chu I hawn leh dawn nia,” tiin a lo chhang a, tichuan Pu Hlima pawh chu a inlamah a tlang haw nghal a, chumi ni atang chuan hlim takin a zai a, a faifuk leh hlerh hlerh thei ta a.    

Print this post