Kohhran Hmasaa Ringtu Huaisente

Buatsaihtu: Joseph Lian Sai Lova 

Published by: Synod Literature & Publication Board 

Aizawl. Mizoram 

              He lehkhabu SL&PB chhuahah hian “Rinna Pate” tih thin mi 10 te chanchin ziah a ni a. An pian leh mûrna leh chhûngkaw chanchin te, lehkha an zir chhoh dân te, rinna kawnga mi dangte hruaitu an lo nih tâk dân te târ lan a ni a. Thurin dik lo an dodâl dân, Pathian an rin tlat avânga dodâlna leh tihduhdahna an tuar dân te ngaihnawm taka ziah chhuah a ni.

A man Rs. 100.

 (By: Rev. Dr. C. Chawnghmingliana, Editor, Synod Literature & Publication Board) 

                 He lehkhabu hi Malaysia, Kuala Lumpur khawpuia ka ziah a ni a, ka kutchhuak hmasa ber a ni nghe nghe. Tlângzarhna a ni lo bawk a, ziak ṭeuh tawh lo mai ila, Ziaktu Thuhma erawh ka han târ lang hram ang e. 

               Kohhran hmasate chanchin hi Kristiante tâna thil pawimawh tak leh hriat ngei ngei ṭûl a ni a. Kohhran hmasa hun laia thil thlengte kan hriat loh chuan tûn huna kohhran hlutna pawh hi kan hre chiang dâwn lo tihna a ni. Kohhran hmasate hun lai khân ringtuten Isua chu Pathian dik tak a nihzia rorêltute leh vântlâng hmaah huaisen tak takin an sawi ṭhîn a. Chumi avâng chuan tihduhdah leh hremte pawh an tuar nasa hle a, an rinna avânga martar-a thi tate pawh sawi tûr an awm nual a ni.

               Kohhran hmasaa ringtute khân tihduhdahna leh hremna an tuar chauh pawh ni lovin, zirtîrna dik lo chuan kohhranho a chawk buai nasa hle a. Kohhranho zîngah pawh inhnialna leh inhmuhthiam lohna lian tak a lo chhuak a, kohhranah inṭhenna hial a thlen phah a ni.

           Chutianga harsatna chi hrang hrang leh buaina thlipuiin kohhranho a nuai mêk lai chuan kohhran tâna pasalṭha, mi rinawm leh huaisen tak takte Pathianin a lo dah leh zêl a. Chûng mite chuan engkim chân huamin rinna dik chu an humhalh a. Chutiang mi chu tam tak sawi tûr awm mah se, an zînga mi huaisen bîkte leh langsâr zual deuhte chauh he lehkhabuah hian kan târ lang dâwn a ni.

            He lehkhabu hi kohhran hmasa hun laia ringtu huaisente leh rinnaa pasalṭhate chanchin ziahna bu a ni a. Kohhran ṭhan zêl dân leh hmasawn zêl dân ziahna bu a nih loh avângin sawi hmaih leh ziah tel loh tam tak a awm ang tih ka ring. Tin, he lehkhabuah hian kohhran pate zinga mi langsar, ziah tel tûra ngaih ziah lan loh leh telh loh an awm nual a, chhiartute tân a khîngbâi viau ang tih pawh ka ring.

          He lehkhabu hi Malaysia rama hna thawka ka awm laia ka ziah a ni a. Ka ziah dawn hian lehkhabu râwn tûr ka neih loh avângin ka buai ru hle a. Tichuan, lehkhabu hawh tur nei âwma ka rinte hnênah ka kal a. Lehkhabu hawh tur an neih leh neih lohte ka zawt a. Ka duh leh mamawh ang lehkhabu hawh tur ka hmuh zawh tâk loh avângin Internet Website lamah te ka han zawng vêl a. Internet Website lamah pawh ka duh ang Mizo lehkhabu download tûr ka hmuh mai loh avângin a tâwpah chuan Sâp ṭâwnga ziak ka hmuh hmuhte chu ka khawn khâwm ta ringawt a. Tichuan, ka thiam ang tawkin ka han lehling ve a, chu chu he lehkhabu lo chhuak dân bul chu a lo ni ta ber mai a ni.

            Chu vâng chuan he lehkhabua awm mi mal chanchinte hi Sâp ṭawnga ziak, internet page hrang hrang aṭanga lâk chhuah, Mizo ṭawnga lehlin an ni deuh ber a. A tam zawk chu Wikipedia page-a mi ka lehlinte an ni. A famkim lo leh dikhlel deuh a lo awm a nih pawhin chhiartute hriatthiamna ka han ngên nghal duh bawk. 

              He lehkhabu tê tak tê hi kohhran chanchin pumpui ziahna ni lo mah sela, heta kan târ lan mi mal chanchin ṭhenkhat aṭang hian Kohhran hmasate chanchin leh an hun laia thil thleng tam tak kan hre thei a. He lehkhabu aṭanga chhiartuten hlawkna pakhat tal kan chhar chhuak a nih chuan chu chu a ziaktu lâwmna a ni ang. 

     

Print this post