Hudson Taylor-a chanchin tawi

By: Joseph Saia (Australia) 

James Hudson Taylor-a hi China rama missionary hmingthang leh rawngbâwltu ropui a ni a. Amah hi British Protestant Christian missionary niin ‘China Inland Mission (CIM)’ dintu a ni bawk. China ramah kum 51 chhûng mission hna a thawk a. Chumi chhûng chuan zirna sikul 125 lai a din hman a. Chuta ṭanga piangthar ringawt pawh mi 125,000 chuang an tling a ni. China ram hmun hrang hrangah Mission Station 300 chuang a din a, chûngte chu missionary 849 leh Chinese tualchhûng mi (local helper) 700-ten tûn thleng hian an la enkawl chhunzawm zêl a ni. 

Brighton Beach, England-a China Inland Mission a din tirh chuan Taylor-a’n bank-ah pound 50 chiah a dah a, chu chu a rawngbâwlna bûl ṭanna chu a ni mai. Mihring lam aṭanga ngaihtuah chuan thil tih chi niin a lang lo. Amaherawhchu, awm lo ata awmtîr theitu Pathian chu a ring ngam tlat a, Pathian chuan mualphovin a awmtîr dâwn lo tih thlarau mitin a hmu chiang a. Tihtak meuhva Pathian hnêna a ṭawngṭai hnu chuan kum khat chhûng lekin bank-a a pawisa dah chu Pound 2,000 chuang a tling ta mai a. Kum 1866-ah chuan China Inland Mission hnuaia volunteer missionary 24 ten China ram an thleng a, a hnuah mi 70 chuang an thlen belh a, a hnuah 102, a tâwpah chuan missionary 800 chuang zet an nei thei ta a ni. 

A thih hnuah pawh China Inland Mission chuan rawngbâwlna zau takin a kalpui zêl a, CIM chu ram pâwna Protestant mission lian ber pâwl a la ni chho zêl a ni. Ṭawngṭai leh Pathian rinchhan tak meuhva rawng a bâwlna chuan mi tam tak rilru a hnehin mi dang tâna nun hlâna rawngbâwl duh mi tam tak a hring chhuak a. Olympic Gold Medal pawh lo dawng tawh, Scottish missionary Eric Liddell-a chuan Chanchin Ṭha avângin China ramah a lu a phûm a, America rama missionary Jim Elliiot-a pawhin Ecuador rama hnam mâwlte tân a nunna a hlân bawk. Irish missionary Amy Carmichael-i chuan India ramah kum 55 zet rawngbâwlin Chanchin Ṭha a vahvaihpui a, kum 83 mi a nih thlengin Tamil Nadu (Chennai)-ah rawngbâwlin a hun a hmang a. British evangelist Audrey Wetherell Johnson-a chuan kum 1959-ah khân China ramah Bible Study Fellowship a din a, tûn thleng hian chu rawngbâwlna chu chhunzawm zêl a la ni. 

Print this post