Entawn Tlâk Mi Ropuite (Ka lehkhabu)

 By: Joseph Saia

        Mi ropui, mi hlawhtling leh mi ding chhuak kan tihte hian an nunah nih duh emaw, tih duh emaw lian tak an nei ṭheuh va. Chu an nih duh leh tih duhte chu ni thei tûr leh tithei tûrin theihtâwpin an bei ṭhîn a ni. Chûng mite chuan nihna leh ze chi hrang hrang an nei ṭheuh va, tehna pakhat aṭang chauhva kan teh chuan kan teh dik hauh lo vang. Nihna leh ze hrang hrang nei ṭheuh mah se, tum thuhmun (common interest) an nei tlat bawk a, chu chu ‘tlâwm duh ngai hauh lo nun’ an ti thei âwm e.

Vântlâng nun siam ṭhatna kawnga hmalatute (Social Activists) pawh hian an rilrua an vei leh hlawhtling tûra an duhte (dreams) tihhlawhtlin ngei an tum avângin eng ang harsatna pawh hmachhawn sela pal tlang an inhuam tlat a ni. Nelson Mandelaa chuan Africa mi hangte zalênna atân kum 27 chhûng zet lung in thimah a hun a hmang a. Tûna Burma rama State Counsellor leh Foreign Minister ni mêk Aung Sân Suu Kyî-i pawh hian sipai thuneihna lak aṭanga Burma mipuite hruai chhuah a tum avângin kum 20 chhûng zet pawn chhuak thei lova hren beh a ni bawk a ni. Eleanor Roosevelt-i pawh naupang tualchai rual a nih laiin a nu leh paten an thihsan a. Zirna sâng pawh rap ve thei lovin fahrah takin a hun a hmang chho va. Mahse, a tâwpah chuan US First Lady hmingthang berah a ṭang a. US First Lady lo ni tawhte zîngah pawh amah anga khawvêl ram fang zau leh US mipuite tâna hna thawk nasa hi an la awm ngai lo a ni.

Eng pawh ni se, mi ropui kan tihte rêng rêng hian awlsam tak leh harsatna tâwk lovin chawimawina nopui an dawm ngai lo tih hi he lehkhabuin a târ lan tum ber chu a ni. Mi hlawhtling leh mi ropui kan tihte hian harsatna tam tak kârah pawh chhel takin an thawk fan fan a, an hlawhchhama an chauh der pawhin an beidawng ve mai mai ngai lo a ni.

Mi ropuite kalkawng chu a thui a, a bumboh va, a hrehawm a; mahse, chu kawng zawh chhuah chu an dam chhûnga an tum ber leh an hlimna ber a ni tlat si a ni. Mi ṭhenkhatin an zin kawng zawh chhuakin thâng an chhuah a, hlawhtlinna rah sengin hringnun an hmang a; mahse, ṭhenkhat erawh chu thang chhuah ve hman lovin an thiamna leh neih zawng zawngte hnut chhiahin khawvêl an chhuahsan ṭhîn a ni.

He lehkhabua mi mal chanchin ka târ lante hi vântlâng nun siam ṭhatna kawnga hmalatute (Human Right & Social Activists) an ni deuh ber a, a bu a chhah dâwn lutuk avângin mi tam tak

ka telh loh an awm nual a ni. 

He lehkhabu hi ka inneih champhaphâk kum 10-na hriatrengna atâna ka buatsaih a ni a, min duhsaka min fuih phurtute chungah ka lâwm hle. A bîk takin Pu T. Zorampela (Zodi) chungah ka lâwm êm êm a. Ani kha lehkhabu chhuah tûra min duhsaktu leh min fuih phurtu a ni a, ani khân fuihna leh thurâwn ṭha tak tak min pe lo se la chuan he lehkhabu hi ka sual chhuak kherin ka ring lo. Chuti taka min duhsaktu a nih avâng chuan a chungah lâwm thu sawi sên loh ka ba a. A lehkhabu a lo chhuah hmaa mual min liamsan erawh a runthlâk ka ti hle mai a, ka uiin ka sûn tak meuh meuh a ni.

He lehkhabu buatsaih nân hian ka duh anga hun ka pêk theih loh avângin ṭhian ṭhaten a endik leh chûlmam lamah theih tâwp min chhuahpui a, an chungah ka lâwm hle. A bîk takin Pu Familia Fanai Lalmansânga (Lunglei, Mizoram), chungah ka lâwm hle. Ani hi thuziak thiam leh literature lama thawh hlâwk tak a ni a. Ka beiseina leh tumte min hriatthiampuia a endik leh chûlmam lama tlâwmngaih min chhuahsaka a publish thlenga min buaipuitu a nih avângin a chungah ka lâwm hle a ni. Ani bâkah Pu Biakliana, SDA Pastor (Kuala Lumpur, Malaysia) leh Pi Mah Shwe-i (Australia)-te chungah lâwmthu ka sawi a, a bu-kâwm (cover) mawi taka min design saktu Mahemi hnênah pawh lâwmthu sawi sên loh ka ba a, an min duhsakna leh an hun hlu tak sênga min puihna hi ka rul sêng lo a ni.

A tâwp ber atân ka nupui Vânlalsâwmi chungah pawh lâwmthu ka sawi mawlh mawlh duh. Ani hian ka lehkha ziah min tuipui mai ni lovin ka ṭûl leh mamawh ang ang rilru sei takin engkim min buatsaihsak a, he lehkhabu ka ziah zawh theih nân hian min pui nasa hle a ni.

Print this post