Hudson Taylor-a chanchin tawi

By: Joseph Saia (Australia) 

James Hudson Taylor-a hi China rama missionary hmingthang leh rawngbâwltu ropui a ni a. Amah hi British Protestant Christian missionary niin ‘China Inland Mission (CIM)’ dintu a ni bawk. China ramah kum 51 chhûng mission hna a thawk a. Chumi chhûng chuan zirna sikul 125 lai a din hman a. Chuta ṭanga piangthar ringawt pawh mi 125,000 chuang an tling a ni. China ram hmun hrang hrangah Mission Station 300 chuang a din a, chûngte chu missionary 849 leh Chinese tualchhûng mi (local helper) 700-ten tûn thleng hian an la enkawl chhunzawm zêl a ni. 

Brighton Beach, England-a China Inland Mission a din tirh chuan Taylor-a’n bank-ah pound 50 chiah a dah a, chu chu a rawngbâwlna bûl ṭanna chu a ni mai. Mihring lam aṭanga ngaihtuah chuan thil tih chi niin a lang lo. Amaherawhchu, awm lo ata awmtîr theitu Pathian chu a ring ngam tlat a, Pathian chuan mualphovin a awmtîr dâwn lo tih thlarau mitin a hmu chiang a. Tihtak meuhva Pathian hnêna a ṭawngṭai hnu chuan kum khat chhûng lekin bank-a a pawisa dah chu Pound 2,000 chuang a tling ta mai a. Kum 1866-ah chuan China Inland Mission hnuaia volunteer missionary 24 ten China ram an thleng a, a hnuah mi 70 chuang an thlen belh a, a hnuah 102, a tâwpah chuan missionary 800 chuang zet an nei thei ta a ni. 

A thih hnuah pawh China Inland Mission chuan rawngbâwlna zau takin a kalpui zêl a, CIM chu ram pâwna Protestant mission lian ber pâwl a la ni chho zêl a ni. Ṭawngṭai leh Pathian rinchhan tak meuhva rawng a bâwlna chuan mi tam tak rilru a hnehin mi dang tâna nun hlâna rawngbâwl duh mi tam tak a hring chhuak a. Olympic Gold Medal pawh lo dawng tawh, Scottish missionary Eric Liddell-a chuan Chanchin Ṭha avângin China ramah a lu a phûm a, America rama missionary Jim Elliiot-a pawhin Ecuador rama hnam mâwlte tân a nunna a hlân bawk. Irish missionary Amy Carmichael-i chuan India ramah kum 55 zet rawngbâwlin Chanchin Ṭha a vahvaihpui a, kum 83 mi a nih thlengin Tamil Nadu (Chennai)-ah rawngbâwlin a hun a hmang a. British evangelist Audrey Wetherell Johnson-a chuan kum 1959-ah khân China ramah Bible Study Fellowship a din a, tûn thleng hian chu rawngbâwlna chu chhunzawm zêl a la ni. 

Lâwmna tûr hlir a lo ni si

Phuahtu: Upa K. Lalthanzâma

1. Ka Lalpa hnung zui tûr hian channa emaw ka ti ṭhîn,
Mite ngaiha hlawhchhamna lo thlenin;
Aw ka tân a hnungzui hi channa emaw ka lo ti,
Mahse, hlawkna a lo ni si

Cho: Ṭahna reng a awm tawh lo,
Lungngaih, mangan, buaina pawh;
Amah nên kan inpâwl chuan,
Dam chhûng ka tawh apiang hi;
Lâwmna tûr hlir a lo ni si.

2. Harsat, mangan, buainate’n ka kawng min chim buai laiin,
Mite ngaiha beidawnna lo thlenin;
Hrehawm tuarin chau ila, kut ruat pawhin awm ila,
Hlawhchham rêng rêng a awm lo ve.

3. Kalvari tlâng chungah chuan a tlansate kan lêng za,
A hmangaihna far chauh pawh kan chanin;
Chatuan nun daih a ni si, khawvêl zawng eng pawh ni se,
Lâwmna tûr hlir a lo ni si.

Napoleon Bonaparte-a chanchin

By: Joseph Saia (Australia)

Khawvêl general ropui leh huaisen an sawi zînga sulhnu ngah leh sawi hlawh ber chu France general huaisen Napoleon-a hi a ni âwm e. ‘A ke vei lam a perin Europe khawmualpui a nghawr nghîng thei a, a ding lam a per erawh chaun khawvêl pum a nghawr nghîng a ni’ tia an sawi Napoleon Bonarparte-a hi pa huaisen tâwpthang leh râl rêl thiam hmingthang a ni a. A hun laiin Europe ram tam tak a hneh a; Austria leh a sa ngâwi zâwnpui ram tam tak a hneh bawk a. Ottoman lalram chhûnga Aigupta chu hneh lâkin Palestine ram thlengin a lalram a zauh hman a, a hmaah chuan lal ropui thiltithei leh sawrkâr lian tak takte pawh an hnûngtawlh duai duai mai a ni. 

Pa fing leh fel, rem hre tak, mahni inthunun thei, a awmna hmun azira nun dân leh awm dân thiam tak mi a nih avângin kum sawm leh pariat chhûng zet French mipuite chungah lal a hrawt a. Chumi chhûng chuan Europe lal tam tak a ke bulah kûnin a rawng an bâwl a, an ramri te pawh a duh duh danin a kham kualsak vêl mai mai a ni. Amah hi pa tê tak tê, feet 5 leh inche 4 leka sâng, cher leh sa pan lam deuh a ni a, a pa têt avângin ‘Little Corporal’ tiin hming lem an phuahsak hial a ni.  

KRISMAS NÎ ROPUI

Inner Light
Millennium Christmas Choir


1.    Krismas ni lâwmawm kan thleng leh ta,
       Ngui leh lungngaih tah mittuite bansanin,
       Bethlehem khaw arsi êng chu thlir ve in,
       Berampute lai khumah an zal laiin,
       Hriat loh chhîngkhual vân mi thianghlim rawn kal chuan,
       Mi tin tân a Chanchin Ṭha chu rawn thlenin,

Cho:    Aw nang Bethlehem Judai ram a mi,
            Judai khawpuite zîngah I tê ber tawp lo,
            I chhung aṭangin awptu a chhuak ta,
           A mi Israel-te hruaitu chu.

2.    Vân mipui fak hla aw mawi thângkhawk ri chuan,
       Leilung hi a nghawr a khat thinlai ril’an,
       Remna Lal Fa lal Krista lo pian nî chuan,
       Chung thângvân si-âr te paw’n chibai an bûk,
       Kan thinlung kawngkhâr a hnên lamah hawnin,
       Chibai bûk tûrin I kal ang u tûnah.

3.    Nangni vâng Angel Seraf thianghlimte u,
       Ran in tlâwma Lal thar lo piang chawimawiin,
       Chung thângvânah pawh in âwi ve dâwn lawm ni?
       Hei ang renga kan tân a Lal lo piang hi,
      An piang leh tawh lawng nge he lei chinah hian,
      Kan vânnei êm e, he hun kan tawng leh hi.