Chin mi zinga actress lar tak leh hmel tha tak Tet Mon Myint-i chuan Video an lak/siam tumin a hmaiah hliam a tawk tih thu chu Thitsa Journal chuan a tarlang a.
Hetianga hliam a tawh chan chu indona hmuna silai muleng vel kara a tlan vang nia hriat a ni a, indona hmuna video an siam/lak lai takin silaimu perin a hmai a fuh palh hlauh mai a, sipai pakhat pawh meiin a kang tiin sipai thawk mek an director Tin Than Oo-a chuan a sawi.
Tun tuma Thet Mon Mint-i te lak video hi Burma sipai sawkar propaganda thehdarhna lam a ni a, a flim hmingah pawh “A Yon Oo Hma Phu Dih Kya” tih a ni. Mizo tawng erawh chuan “Tuk Tin Par” ti ila a sual hran lovang. Mi thenkhat chuan Policy film tih te leh thurin thehdarhna flim tih te in an ko va. Heng film lama tel tam berte chuan academy lawmman an dawng fo thin a, hetianga film siam hi academy lawmman dawng thei tura thil pawimawh tak pakhat a ni ve reng a ni.
November thla atang chuan sipai sawrkarin television hmangin mipuite duh chi tur film tha tak tak a thehdarh tan tawh ang a, film star-ah pawh mi lar bikte a hmang dawn a ni. Heng film-te hi Kawlram mipuiten an en vek theih nan man tlawm takin an buatsaih ang a, film star lar zawng zawng telna film pakhat pawh television program-ah a thlawnin an telh bawk dawn a ni.
Heng film-a an lantir tum ber tur chu Kawlram histawri-a ral an lo beih dan chi hrang hrang te, Kawlram sipai sawrkarin mipui tana thil tha a tih te leh Kawlram sipai sawrkarin mipui a humhalh ziate an ni ang a, a thlawna mipui a chawr dan te, mi tam tak a ruka a thah te leh mipui thil a thlawna a hmansak leh a laksakte erawh a tel lo chiang ang.
No comments:
Post a Comment
I ngaih dân han thawh ve rawh le....