YMA chuan Mizoram chhunga Burmese/Chin Census a siam

Young Mizo Association (YMA) chuan Mizoram chhunga Burmese/Chin awmzat hriatchian tumin cencus a siam a, Mizoram pumpuia YMA branch 772 atangin census an siam mek a ni. He census hi June thla atanga tan a ni a, report an dawn hmasat ber tum chuan Burma/Chin mi 6,000 vel awm nia hriat a ni.

Census branch 173-te chuan an branch theuhva Burma mi awm zat an chhiarchhuak tawh a, chumi atanga report an pek dan chuan Mizoram chhuga Burma/Chin awm zat chu mi 6375 chiah an ni. Heng zingah hian Chin hmeichia 4808 an ni a, mi pa 1567 an ni bawk. He census report-ah hian YMA branch 559 atanga report dawn a la ni lova, a rang thei ang bera report a nih tur thu YMA hruaitute chuan an sawi bawk.

Tun tum census atanga Chin mi tamna ber nia an report vengte chu Air field, Bethlehem Vengtlang, Bawngkawn, Chaltlang, Chhinga Veng, Dawrpui Vengthar, Electric Veng, Ramhlun Venglai, Ramthar Veng, Rangvamual, Vaivakawn, Zemabawk, leh Zuangtui- te an ni.

He census siam chungchang leh siam chhan hriat ni lo mah se mi tam tak rin dan chuan tunhnai Mizoram chhunga Chin mite dinhmun Human Rights Watch Based in USA-a report a thlen vang niin an ring.

YMA branch hrang hrang atanga census report pek fel pek a la ni loh avangin Mizoram chhuanga Chin/Burmese awm zat chiang taka hriat a la ni lova, mi thentakte sawi dan chuan mi 70,000 chung awm niin an sawi a, thenkhat phei chuan mi 100,0000 chung awm niin an sawi thung. Engpawhnise YMA brach hrang hrang atanga census report fel tak pek a nih hnuin Mizoram chhunga Burmese/Chin awm zat chu hriattheih a ni hmel.

Print this post