Tawng hi min phuarkhawmtu a ni

 By: The Zozam Times's Editor

Chief Minister Pu Lalthanhawla chuan “Zo hnahthakte min phuarkhawmtu chu Lusei tawng hi a ni” a ti a. Hei hi ngaihtuahna thui tak mi neihtir thei leh thil pawimawh tak a ni.

Lusei tawng han tih hian, tuna kan hman mek, Mizotawng kan tih mai hi a ni a. Duhlian tawng tite pawhin an sawi bawk thin a. A enga pawh hi ni se Mizo tawng hi tuna Mizoram mipui min phuarkhawmtu leh min tipumkhattu pawimawh tak tih loh rual a ni lo.

Mizote hi vanneihna ropui tak kan nei a. Hnam khat ram pakhatah rorelna pakhat neiin kan cheng khawm a, chu maibakah tawng pakhat hmangin kan inbe tawn thei a, Mizoram chhim leh hmar tawp amite pawh tawng kan inhre tawn deuh vek a. Hei hian in unauna leh inpumkhatna a siam kan ti lo thei lo vang. Khawiah pawh tawng inhriat tawn loh na na na hi chuan a innel tak theih loh a, inkawm ngeih te, inpawh tawnte inpumkhatte a har lo thei lo. Mizovin inbiak pawh tawnna tawng pakhat kan nei hi lawm nachang kan hriat pawh a pawimawh hle.

Tuna kan tawng Mizotawng kan tih hi a lo pian chhuah dan emaw, a to dul tih lamte hi chu a zir mite zir turah dah ila, keini chuan kan neih sa hi tun aia changtlung leh zau leh zualin eng tin nge kan hman ang tihte hi kan ngaihtuah tur pawimawh tak a ni. Mizo hnam hrang hrangte hian tawng hrang hrangte pawh kan nei a. Heng tawng hrang hrang kan neihte pawh hi Mizotawng huang chhung a mi a ni tih kan hriat a, kan inngaihpawimawhsak tawn thiamte pawh a ngai a. Tuna kan hman mek, Mizo tawng uar kan tum lutuk avanga Mizo hnam peng hrang hrang tawngte kan tihhlum kher pawh a tul hek lo. A hmang thei chuan hmang zel tho sela, mahse inlakhran duh phah nan leh kan tawngpui Mizotawng thiam duh loh phah nan chuan hmang lo ila. Eng chi pawh ni ila, Keimahni chi bik tawng kan hmang a nih pawhin Mizotawng hi kan thiam tel ngei ngei turah ngai ila, chu chuan mizote hi nghet takin min phuar khawm tlat dawn a ni.

He tih laiin a hmang thang leh hmang nal tawhte pawhin tlema a thluk dang deuha tawngte pawh kan pawm thiam a ngai a. Awmna hmun a zirin tawng thluk dante a in ang lo va, chu bakah lo tih than loh a nih avanga lei liin a hawl fuh hleih theih lohte pawh a awm a, hengte pawh hi innuih mai lo leh, Mizo tawng thiam lova in chhuah mai lovin, kan pawm tlan thiam a pawimawh hle a ni. Kan tawng kan chawisan thiam a, kan dah pawimawh thiam hi keimahni kan inhumhalhna pawimawh tak pakhat a ni a. Mahni tawng thiam lo nihte hi in tihtheihna chi a ni miah lo. Kan thiamna a san a, kan vah thui zawh poh leh kan tawng hi kan ngaipawimawh tulh tulh zawk tur a ni.

More

Print this post