George Muller-a chanchin tawi

By: Joseph Saia

George Muller-a

(1805-1898)

“Faith ends where worry begins and worry ends where faith begins.” (George Muller) 

‘Ṭawngṭai mi leh fahrahte pa’ tia an koh George Muller-a hi missionary ropui tak anih bâkah England-a hnuchham leh fahrah enkawlna hmasa ber Ashley Downs Orphanages dintu a ni a. Amah anga hnuchham naupang enkawlna kawnga thawh hlâwk hi khawvêlah an tam lo hle ang. A hnathawh dân mak dangdai bîk êm êmna chu hnuchham naupang enkawlna atân mi angin mi mal leh pâwlho hnênah kut a dawh ve ngai lo va, ṭanpuina pawh a dîl ve ngai miah lo hi a ni. Ṭawngṭaina hi a hmanraw neih ṭhat ber a ni a, engkim mai hi ṭawngṭaina hmangin Pathian hnênah a dîl a, a hnuchham enkawl naupang sanghnih zet chu tûk khat lek pawh chhuanchhamin a awmtîr ngai lo. 

Pathian chungah chauh rinna nghata rawngbâwl mi a ni a, mi lian leh mi thil tithei deuhte chungah a innghat ve ngai lo. Hetiang taka Pathiana innghat ngam mi a nih avâng hian Pathianin a mamawh tinrêng a hria a, ṭhian ṭha leh rawngbâwlpui tûr mi ṭha tak tak a pe zêl mai a ni. Muller-a hian Pathian chauh rinchhanin England khawpui Bristol-ah acre 13 (ṭin 13 hmun vêl) zeta zau huan a lei a, chutah chuan hnuchham châwmna in lian tak tak panga a sa a. Chûng in lian leh ropui tak tak chu tûn thleng hian Ashley Downs Orphanage tia khawvêl hriat a la ni reng a ni. 

Muller-a hian hnuchham naupang châwmna in a sak dâwn hian pawisa shilling hnih (Cent 5) chiah a nei a; mahse, a mamawh leh duh chu a mihringpuite hnênah thlen lovin Pathian hnênah chauh a thlen a, building sakna tûr atâna a mamawh zât Pound 115,000 chu Pathianin a hun takah a pe mai a ni. Miten, “Engtin nge i ṭawngṭai bîk?” tia an zawh pawhin, “Ka nun pum pui hi ṭawngṭaina a ni ber mai. Ka mut pawhin ka ṭawngtai a, ka thawh pawhin ka ṭawngṭai a, kawnga ka kal lai pawhin ka ṭawngṭai a. Lalpa chuan ka mamawh leh duh tinrêng min pe mai a ni. Ka ṭawngṭaina tlâwm tak hi vawi sîng aia tam chhânna ka hmu tawh a, a ṭhen phei chu chawp leh chilha ka hmuhte an ni nghe nghe. Thil ṭha a nih dâwn a, Pathian ropuina tûr a nih dâwn phawt chuan ṭawngṭaina hmangin Pathian hnênah ka thlen a, a hnên aṭanga chhânna ka hmuh hma loh chu beidawng lovin ka dîl ngâr ngâr zêl mai a ni,” tiin a chhâng ṭhîn a ni. 

Print this post