1973 Oil Crisis a thlen chhan

By Joseph Saia: (Australia)

Kum 1973 khân Israel leh Arab ram ṭangrual an indo va. Chu indona chu Judate Ni Thianghlima thleng a nih avângin Yom Kippur indona an ti a, Ramadan indona emaw, October indona emaw tiin an ko bawk. He indonaah hian US leh khawthlang ram tam takin Israel ram an thlâwp avângin Arab ram hruaitute chu an lungawi lo va, an titau va. Israel ram an thlawpna duhlohna lantîrin Arab khawmualpuia tuialhthei leh hriak (gas leh oil) pe chhuak ṭhîn ram (Organization of Arab Petroleum Exporting Countries)-te chuan United States bâkah Europe ram tam tak United Kingdom, Netherlands, Canada leh Japan ramahte an petrol leh khawnvartui an hralh duh ta bâr lo va. 

OPEC ramten hetianga khawthlang ramte an hrêk beh tâk avâng hian khawnvârtui leh gas man chu a bin 5 laiin a lo sâng chho ta a. Khawvârtui man a san chho rual hian Europe ram pum puiah khawnvârtui in daih lohna pawh a sâng chho zêl a. Khawnvârtui tel lo chuan sumdâwnna leh thil siamchhuahna lamah eng mah a tih theih lo va. Chu chuan ram tam tak a nghawng avângin khawvêl pumah khawnvârtui thlakchhamna (Oil Crisis) a lo thleng ta a ni. 

Oil Crisis thlipuiin khawvêl pum a nghawng avângin kum 1977, April ni 18 khân President Carter-a chuan TV kal tlangin US khua leh tuite hnênah thlamuanna thuchah a sawi a. Chutih rualin khawnvârtui remchêm taka hmang tûrin leh solar hmanga siam, kâwlphetha hmang uar sauh sauh tûrin mipuite chu a fuih bawk a ni. Khawnvârtui harsatna lak aṭanga US ram a tal chhuah theihna tûrin President Carter-a chuan kum 1977, August ni 4 khân Department of Department of Energy Organization Act of 1977 bill chu hming ziakin a nemnghet ta a. He bill a siam hi President a nih chhûnga a thiltih ropui ber leh chhinchhiah tlâk ber a tling hial a ni. 

Print this post