Mother Teresa-i nun aṭanga kan zir tûrte

By: Joseph Saia (Australia) 

Mi tam takin ‘Pathian pencil’ an tih mai Mother Teresa-i hi kum zabi 20-na chhûnga mite ngaihsân leh ngainat hlawh ber a ni a. A nun hi tlâwm tak ni mah se, a ropuiin a zahawm a, a nun aṭang hian zir chhuah tûr leh entawn tûr tam tak kan nei a ni. Mother Teresa-in a nun aṭanga zir tûr leh entawn tûr zirlaibu min hnutchhiah zawng zawng hi kan dam chhûng pawha zir zawh theih a ni dâwn lo va, sawi sên leh ziah sên pawh a ni bawk hêk lo vang. A nun aṭanga kan zir tûr leh entawn tûr tlêm han târ lang ila.  

Mother Teresa-i hian Pathian a hmangaihna leh chung lam kohna a dawn chu thu mai ni lo, ama nun ngeia lantîr a tum tlat avângin a hun leh nun pum pui chu mi rethei leh chanhaite tân a hlân a. Pathian duh dân leh he leia ringtute awm dân tûr dik tak chu a nun tlâwm tak hmangin he khawvêlah hian ziakin a lo awm ta a ni. Mother Teresa-in hmangaihna chungchâng a sawi zînga rilru khawih êm êm chu, “Khawvêla mi rethei berte chu hmangaihtu leh khawngaihtu nei ve lo anga inngaite leh mal ngawih ngawih nia inhre tlatte hi an ni,” tih hi a ni. 

Mother Teresa-i chu hmeichhe zakzum, âwm nêm leh derdêp tak ni ṭhîn mah se, Pathian a hmangaihna avângin rinna kawnga mi huaisen tâwpthang leh amah Pathian tâna paukhauh tlat mi a lo ni ta a. Culcutta khaw daifêma mi rethei baibâwk leh chhuanchhamte hui khâwmin hmangaih tak leh duat takin a enkawl a. Mi retheite hmêlah khân Lal Isua hmêl a hmu tlat a. Hêng mi retheite a dâwmkânna leh a enkawlna hi nakina a lallukhum timawitu tûr a ni tih a hriat avângin an zun leh êk te pawh kut lawngin a hai bawrh bawrh zêl a. Chu vâng chuan he khawvêla beiseina êng de sêt nei tawh lote pawhin a nun tlâwm takah khân beiseina thar an chhar a, fahrah leh hnuchhamte pawhin inhnangfâkna leh nu tak belha belh tlâk nu an hmu a. Mihring vun rawng, rinna leh sakhuana thlîr miah lo va, mi a hmanngaih theihna hi entawn tûr min hnutchhiah zînga langsâr leh pawimawi tak a ni. 

  Mother Teresa-i nun aṭanga kan zir chhuah tûr pawimawh tak awm leh chu ‘Thil ho tê anga kan ngaihte pawh hi hmangaihna nên kan ti ṭhîn tûr a ni. Kan zain thil ropui tak kan ti vek thei lo a ni mahna! Hmangaihna nên erawh chuan thil tê tak tê chu kan tithei vek a ni. I tih theih loh thil ka tih theih a awm a, ka tih theih loh thil i tih theih a awm bawk a, kan zaa kan thawh ho chuan thil ropui tak kan tithei a ni,’ tih hi a ni. Mi nawlpuiina ‘Ho mai mai’ nia kan ngaihte leh tê thama kan ngaihte hian hlutna leh ṭangkaina an nei vek a, ngaihthaha hnualsuat ngawt chi an ni lo. Mother Teresa-i pawh hian Culcutta khaw daifêma tu ma ngaihsak loh riangvai chanhaite leh tuin ka ui ka ar an tih loh, retheihna avânga tlu hlum mai tûrte leh thisâwn mai mai tûrte chu mihring an nihna angin a hmangaihin a lainat a, an tân theihtâwp chhuahin rawng a bâwlsak a. Hetianga a tih theihna hi mi pângngaiin kan tih theih loh, mi bîk, vântlang chunglam zia a ni a, a makin a ropui a, hei vâng tak hian ‘Riangvai leh chanhaite Nu’ tia koh hi a phu hilah hliah a ni. 

Mother Teresa-i ang bawk hian kan khawtlângah hlen chhuah tûr mawhphurhna a tê a lian kan nei theuh va, chûng zawng zawng chu kan hlen chhuak vek thei lo a ni mai thei; mahse,  kan kova innghat mawhphurhna chu kan theih chin chin hlen chhuah kan tum ang a, kan zam mai tûr a ni lo. Pathian pawhin kan theih loh leh phak bak chu eng mah min phut ngai lo tih hriain thil ṭha leh dik nia kan hria chian chu huaisen takin kan dinchhuahpui ngam tûr a ni. 

Vawikhat pawh miin, “Eng vângin nge hetiang êm êma Pathian tâna hna i thawh ni?” tiin an zâwt a. Mother Teresa-i chuan, “Ê, kei chu, Lalpa kuta pencil tê tak tê mai chauh ka ni e. Keia hnathawh chu tuifinriat tui zînga tui mal farkhat ang lek chuah hi alâwm! Amaherawhchu, thawk lo ila chuan tuifinriata tui hi farkhatin a kiam dâwn tlat si a, chu vâng chuan thawk lo thei ka ni lo,” tiin a chhâng a. Hmangaih leh rinawmna chungchâng a sawi apiangin, Mi dang hmangaih thei tûrin mi chungchuang leh mi bîk nih a ṭûl kher lo va, mi dang hmangaih tum hi phuritah kan ngai mai tûr a ni bawk hek lo. Tlêm tê chunga i rinawm phawt chuan chu thil tlêm têah chuan i chakna a awm a ni tih hre reng ang che.” tih thu hi a sawi chamchi a ni. Mother Teresa-i thusawi hi khawvêla lem ziak thiam leh lung ker thiam (sculptor) bera an ngaih Michelangelo-a’n, “Thil tê thama kan ngaihte hian thil an tifamkim a, thil a famkim tawh chuan tê tham tak an ni tawh kher lo,” tia a sawi nên pawh hian a inzul zui hle a ni. 

A tâwp ber atân chuan Mother Teresa-i hian mahni hma a sial lo va, ropuina leh hmingthangna zawngin a buai ngai lo va, a mihringpuite hnên aṭangin chawimawina leh fakna a beisei ve ngai hêk lo tih hi a ni. Khatia BBC palaiin interview a siam hnu khân Mother Teresa-i rawngbâwlna chu khawvêl hriat a lo ni ta a. Khawvêl hmun hrang hranga mi ropuite leh amah ngaisângtute hnên aṭangin ṭanpuina sum ṭhahnem tak a dawng a. Mother Teresa-in The Missionaries of Charity kal tlanga a sum dawn zawng zawng hi eng zât chiah nge a ni tih hriat a ni lo va, mi ṭhenkhat chuan Mother Teresa-i a thih khân The Missioneries of Charity chuan India rama bank-ah US$ maktaduai 40 a nei a, New York khawpui Bronx bank-ah US$ maktaduai 50 a nei bawk niin an sawi a, ṭhenkhat erawh chuan chu aia tam a neih an ring a, Mother Teresa-i pawisa neih zât chiah hi Vatican pawhin chiang takin a târ lang duh lem lo a ni. 

Mother Teresa-in The Missionaries of Charity kal tlanga a sum hmuh zawng zawng leh Nobel Peace Prize a dawn ṭuma a sum hmuh zawng zawngte chu Culcutta-a mi rethei, riangvai leh chanhaite chhawmdâwl nân a hmang fai vek a, a chhûngte leh a mimal tân eng mah a khawl khâwm lo. A rawngbâwl chhûng zawng khân mahni hlawkna melh rân chungin rawng a bâwl ve ngai lo va, khawvêl ropuina leh chawimawina a khel ve ngai lo va, hmingthan leh chungnun tumin tu mah a nêk buai ve ngai hek lo. A rawngbawlpui leh thawhpui chungah lansarh loh hlauvin a phi buai ve ngai lo va, a hnuaia thawkte chungah pawh inlek leh lal hrawt a tum ve ngai hek lo. Heti taka mahni hma sial lo leh rilru thianghlim tak nêna rawng a bâwl avâng hian a nunin mite rilru a hnehin an nunah beiseina nasa tak a siamsak a, a bula awm kha nuam an tiin thlamuanthlâk an ti hliah hliah mai a ni. 

Print this post