Kan inneih dan hi

By: Alex Dinga

Tahan D

Tunlai khawvel kan hman mek hi thalai khawvel a ni tawh a. Chu chuan culture uarna thlarau a rawn keng nghal pang a. Sakhuana thlengin a nghawng chho tial tial a ni. Chutiang anga hun inher kan hmachhawn mekah hian society- a kan hman chhunzawm theih tawh lo tur thlak ngai emaw, siamthat ngai emaw, belh ngai te a awm em tiin rilru hian a dap lo thei lova. Tam tak sawi tur a awm ngei ang. Tun tumah Kan inneih dan hi tlemin han thlur leh ila. Mal leh mual lam ni rih lovin, a lawm dan leh inchei dan te a ni rih zawk ang. Titi levela

ziak a ni.

Mizo society pawh a changkang tial tial a, hranghlui te pawh a lu lu-in an khet hmi tial tial a (Zo kawltawng/ an in update ve zel a). Inchei pawh kan uar sawtin inchei dan pawh kan thiam sawt viau tawh a. Tlema upa lam deuh pawh an in update peih zel chuan en an nuam chho zel a. Inchei hi ler tihna a ni lova, in zirtir kan ngai zawk. Tun chu zofate pawh computer chhuak thar ang maiin kan ni sang reng tawh a, thlirtu mit a hahdam hle. Awle, Upa te leh khawtlang hruaitu ten tihdan thar min kawhhmuh chho zel thei hi a lawmawm em em a ni. A dik reng emaw chu, kum 10 vel chauh kal ta atang khan Chhaktiang Zofate zingah (Tahan leh a chhehvel) hnampuan hmanga inneih ni-a inchei hi kan uar tan chauh niin a lang. Anih loh vek pawn a la rei lo viau mai thei. Mizo innei thlalak han ena, Mizo thuam nena inchei han hmuh te hian a dan a dang bik a. A hma chuan western costume kan hmang tlangpui a. Tunah pawh kan la hmang tho nan, kan la kawp ve ve tan tawh a. Mizo thuama incheia innei hi kan uarna rei rih lo viau mahse khaw tam takah chuan kan la khawr hmel hle niin alang a. A hmanrua mawi tak leh tha tawk kan la neih loh vangin min la hip vak rih lo pawh a ni mahna nge, kan hriat loh hlanin an lo uar viau tawh zawk? 

Tuna kan puanchei te leh hnam kawr te hi a that lo tihna lam ni lovin tunah rih chuan hmeichhia thuam (Mo puan) atan Puanchei a ni tlangpui a, hei bak style dang kan neih belh rih lo a ang a. Creative taka idea thar Mizo culture ni tur, designer thiam deuh ten hma han la thei se tha ang em aw tih tein ka ngaihtuah ve thin a. Mahse hetah hian mimal ngaihdan leh tha duh dan mai chuan a harsa deuh mai thei. Design chi hrang hrang a chhuah phawt hi a tul hmasa ngei ang. Tin, Mipa thuam tur chi Hnam kawrchung design mawi tak, necktie mawi tak, (ngotekherh ngawt veng lo deuhin), Mizo inneih dana thangthar ten kan chin zel tur, zahpuiawm lo tak, Mizo hnam incheina tih fiah tak si a tarlang thei, kan culture base ni si-a Idea siam thiam te nei ila, tichuan rei lo te ah chuan mi tam takin kan la zir thei mai lawng maw, tih te min ngaihtuahtir thin a, Nge tuna kan thuam pangngai hi a la tha tawk viau zawk?

Mo lawm dan hi fel zawka kan tih theih nan kan society hian a zawng zel a. A hau tak lo zawng te, a samkhai zawng te kan inziritir zelin min kawhhmuh zel a. Tun hmaa kawtdunga stage show neih ang chi kha a reh ta zel niin a lang a, a nuam viau nan. Tunah chuan Hall ah kan hmang tlangpui tawh a. A tha-in a samkhai a, a felfai khawpin alang. Mizo thalai ten kan bansan tur erawh a awm teuh ang. Mo hruai zana lo rui tih ang vel te, Lawi ar chuhsak tih ang reng, khum hnuaia ri reng reng tur ni awm taka bawngthi lo khai a tih vel, lo tlaivar pui chiam tih ang reng, innei te mu thei lo tura siam tih vel hi bansan hmaks chi a ni lawm ni? Mo hruai zan pawh rei tak hunserh hmang lo se, honeymoon hman te hi uar ve ta ila, (tunah rih chuan khaw tam taka chaw eia kan insawm te hi kan honeymoon chu a la nih rih ve mai, kan remchan dan inang lo mahse a remchang thei tan a nachang kan hriat a pawimawhin a rinawm. Kan hmun leh ram dinhmun ten a zir a ngai a. A zir em em chiah loh pawn nu leh pa, chhungten hriatthiampui a, hun fal pek thiam a pawimawh ngawtin a rinawm) He hun hlimawm hi hman mai ni lovin chen tur chi niin a lang. Zah tur niin a lang lo (ka la neih loh vangin ka sawi huai par par asin, mahse a tha tlat si a)

Damchhung hawlh tlang thei hringnun hun pawimawh ber te zinga mi inneih hun hi thiantha, khawtlang chhung leh khat ten zei taka hriatthiampuiin i lawmpui zel ang u. Tihdan tha, sawiho fo tur inkawhhmuh zel ang u. Klom e.

More

Print this post