Mi rel leh sawichhiat hi !!!

By: Thangmawia

San Chaung

Yangon

“Thlanmuala mu tawh te ai hian a chhuk a chhova vak thei, tawngkam thlum leh sur tak tak min hlantute hi an lo hlauhawm zawk daih a ni tih thuruk pawh chu mi sawi hriat vang ni lovin, keima nun ngeiin kum sawm chhung hian ka fiah chiang hle a ni.”
L. Keivoma

A chunga tawngkam hi L. Keivoma’n “LALNUNNEMI” thawnthu-ah a changtupa (a character) hmanga a sawi chhuah a ni a, ngaihtuah neuh neuh tur a tam hlein ka hria. L. Keivoma chu kan hre theuh va, lehkha ziakmi a ni a, Mizo literic zingah a thawhhlawk ber pawl a ni hial awm e. Thu tha tak tak a ziak a, a thuziakah zofate zirtur thuril tak tak a phum teuh thin. “BAWKTLANG THAWNTHU” -a a thuziak then khatah phei chuan eng vanga chung thawnthute chu ziak nge a nih a, chhiartute engnge a chah duh tih pawh a thai lang nghe nghe.

Mizote hian thlanmual leh mitthi thlarau hi kan hlau thin hle a. Zanah thlanmualah kan kal ngai meuh lova, upate pawhin thim hnuah thlanmual pal tlanga in lam pan emaw, khualzin emaw an duh ngai lo. Engvangah nge? A chhan tam tak a awm ngei ang. Pi pute atangin zanah mitthi thla (mi then khatte thla) chu hrang thinah kan ngai a. A bikin thlanmualah mitthi thlarau emaw ramhuai emaw chu inlar turah kan ngai bawk. Hengte avang hian thlanmual hi kan hlau thin. Tin, chung ramhuai leh thlarau hmuh chu a hmutu chungah chhiatna eng emaw thleng turah kan ngai bawk thin.

L. Keivoma chuan chung thlanmuala mu tawhte (thla) ai chuan la dama te hi an hlauh awm zawk a ti a. A bik takin mi rel hmang, tawngkam thlum leh sur tak tak hmanga dawt puarpawleng sawi thiamte hi an hlauhawm zawk daih a ti a ni. “LALNUNNEMI” thawnthu-ah hian thudik hre chiang hauh lova hmuh leh hriat apiang a hluarzawng leh a chhezawnga sawi that lohzia a hmuh theih a. Tin, itsikna (la damte rilru/thlarau sual) avang leh khawtlang mipuite kam tam avangin mi thenkhat chunga chhiatna a thlen theihzia a tarlang chiang hle bawk. In hmangaih tak nula leh tlangvalte inkara itsiktute hem thlak chu chaw tak khuka khuk puiin vangtlang kam tam zet (kam tam thlarau) chuan tlangau ang maiin a au chhuahpui a. Chuchuan chu nula leh tlangvalte hmangaihna par vul lai chu thliakin, pawisak nei hauh lovin a rap hrual a, engtikah mah vul leh thei tawh lo turin a siam a ni. A va han pawi teh lul em!!

“LANNUNNEMI” thawnthu hian Mizote khawtlang mizia a tarlang chiang hle a. Kan hnam kan la puitlin tawk loh vang a ni ang, Mizo mipui zinga a tam zawk hi chuan mi rel leh sawichhiat kan la ching hle a. Kan kam tam a, mi chhungkua buaina thuruk phei chu zep a hnekin (thian tha-a inchhalte pawhin) sawinuam kan ti hle thin. “Tuma hnenah sawi suh aw, nang i nia ka hrilh mai mai che …,” tiin thurukte kan puang thin. Heng mi rel leh sawichhiat hian mite chhiatna a thlen thei tih kan hre lo nge, kan hria a mahse sawi nuam kan ti ve hrim hrim? Dik tak chuan mi rel hian engmah thatna leh hlawkna a nei lo. Hlawkna chu sawi loh, kan va rela ten amah kan rel tih a hriat phei chuan boruak tha lo tak, inhuatna hial a thleng thei a. Chubakah thenawmte kan rel hian kan hriat loh hlanin khawtlang hruaitute hnenah emaw sawrkarah emaw an thil tih dik loh (an thil tih sual palh emaw, a fel tawk lohna) kan lo hek reng thin a lo ni. Tin, mi ka rel fo chuan, mi hian min hmu tha lo duh khawp a; ka hriat loh hlanin midang hnenah min lo rel ve fo thin. Mi rel that loh zia hre rengin Lal Isua chuan, “Sawi sel suh u, sawi sela in awm loh nan. In sawisel ang bawkin an sawisel ang che u; in tehna ngai bawkin an tehsak leh ang che u,” a lo ti a ni (Mat 1:7).

Itsikna avanga mi sawichhiat (dawt sawi) hian mi dangte nun a ti chingpen thei a. Midangte an nih tur ni thei lo leh an chanawm hliah hliah pawh chang thei lovin a siam thei a, mi thenkhat phei chu inbengkang thei tawh lo khawp hialin a sawisa thei a ni. Entir nan, khaw pakhatah hian hmeichhe tleirawl hmel tha tak leh nungchang tha tak pakhat hi a awm a. A pianna chhungkuain a lo zir ve bawk nen, mi mit a lain, mi sawi pawh a hlawh hle. “He tleirawl hi zawng a nulat hunah chaitu a va ngah dawn em!! Pasal tha tak a la hmu ngei ngei ang,” tia tlangsawi a ni hial thin. Mahse, amah itsiktu a thian then khatte chuan arukin a hming tihchhiat dan tur rigawt an lo zawng a; kutkem neia sawi a lo ni ta a. Chu dawt thu leng chu mite ngaihven zawng tak a lo ni a. Chu dawt hlawm vantlang mipuiin thu tak ang maia an han bawl meuh chuan, chu hmeichhe tleirawl rilru lama la puitling chiah lo leh la kimki ve tak chuan a tuar ta mauh lo! School kai tak ngial pawh a hreh ta a. Chu chuan a zirlai a ngawng a, mahni inrintawkna (self-confidience) a tlakcham phah hial a ni. Chutianga kum a han vei a, pasal a han neih chuan a tleirawl laia mite rin ang kha a ni ta hauh lo. Kutkem nei anga hming chhe ngai a nih avangin tlangval fel tak tak ten an sit tlat a. Chuvangin a pasal hmuh chhun pawh tlangval satliah, fel hranpa em em lo a ni. Chu nula chuan sawichhiatna avangin a nih tur ang a ni thei ta lova, a chan tur awm hliah hliah pawh a chan bawk a ni. A va han runthlak tak em!! Hei vang hian Ethics (nun dan tha zirna) lama mi thiamte chuan mite chhiatna nasa thlen khawpa dawt sawi emaw, mi rel emaw chu tual that tlukah an ngai hial a ni. “A lang a pauvin mite tinain, mi nunna an la lo. Mahse an tawngkamin mite beiseina leh chanpual a ti chingpen a; nung reng siin mite engmah ti thei tawh lo, mitthi dinhmunah an dintir a ni,” an ti hial a. Tawngkam khat pawimawhzia an hriat chian em avangin mithiam-te pawhin, “Tawngkam khat hian mi nunna a la thei a, hamthatna a thlen thei bawk,” an lo ti reng a ni.

Dik tak chuan heng mi rel leh sawichhiat hi rilru atanga lo piang chhuak a ni a. Kan rilru Satana’n bu a khuarna thin hi englai pawha kan vawn thianghlim a ngai tak zet a ni. Lal Isua’n mihring rilru puthmang pawimawhzia a hre chiang hle a, chhungril atanga lo chhuak chuan mite a tibawlhhlawh thin a ti hial a ni (Mk 7:23). Mi rel chungchangah Thufing ziaktu chuan, “Pathian ngaihsak lo mi chuan a kain a thenawmte a tiboral a … mi kamtam tei ruai mi chuan thurukte a tilang a, mi rilru rinawm nei mi chuan thil a thup thin,” a lo ti bawk (Thuf. 11:9-13). Tin, Tirhkoh Paula pawhin, “Thu tha lo reng in kaan chhuak suh se, a tulzia ang zeal siam tha turin thu tha apiang chhuakzawk rawh se, a ngaithlatute tan khawngaihna a lo nih theih nan,” tiin thahnem ngai takin Ephesia khuaa ringtute a lo zirtir ve bawk (Eph 4:29). L. Keivoma ziah ang deuh hian mahni rilru put hmang siam tha duh hauh lo, ham thatna leh mite chhiatna zawnga tawngkam thlum leh sur tak tak te, kha tak tak te thiam taka hlan theitu te chu mi hlauhawm, mite chhiatna thlentu an ni a, thlanmuala mu tawhte ai hian an lo hlauhawm zawk daih a ni.

More

Print this post