KHAWI LAMAH NGE I ṬAN VE DÂWN LE?

 By: Kyaw Hla

    Tûn ṭum revolution hi Burmese unaute chuan Dharma leh Adharma (sual leh ṭha) indona a ni an ti a. Chumi avângin theihtâwp chhuahin sual sipai an do a; a zung aṭanga phawia nuai bo an tum a; an nun an thap bawk. Keini tlângmite zîngah pawh theihtâwp chhuaha do kan awm bawk. Mahse, a tam zâwk hi tui lai rapa dingin kan la awm mai mai em ni aw tih mai tûr kan la ni. Sipai thil tih chu sual a ni tih kan hria a; mahse, mi dang do atân kan khek em ni aw tih mai tûr a la ni tlat mai. 

    Mahni dinna pawh tichiang ngam lo, a chak zawk zawk lama ṭang tûr ang hrima râl aṭanga uipui tui lian thlîr mai duh tâwk leh social network tak ngial aṭang pawha mahni theih ang anga aw pawh chhuah tum lo kan la kat nuk bawk. Sual do hun laia lo ngawih mai mai hi Kristianna nên a inmil lo tak zet a; aw chhuah huna ngawih mai mai hi sual ṭawmpuina kawng chi khat a ni tih kan hriat a ṭha. 

    Tin, kan ṭhalai huaisen tak takte thurâwn ṭha pêk tum hauh si lova an hma lâkna sawisêl leh an tlin lohna hai langa a dem zâwnga ṭawng chhuak leh thu ziak kan awm leh zêl a; kan ṭhalai huaisen tak takte fuihna thu ziahte pawh "fuih pawrhna" ang zâwnga diriam ta leh kan pasalṭhate pawh "fak" dawl lo ang zâwnga chhuah ta mai kan awm bawk. 

    Tûn ṭum revolution hi mahni awm hmun aṭanga kan lo dawnsawn dân leh kan lo chhan lêt ve dânin eng ang mi nge ka (n) nih a hril chiang hle. Revolution hnehna dâr kan khawn hunah chuan ṭhalaite leh mipuiten tu nge mi huaisen, tu nge ram leh hnam hmangaihtu dik tak tih leh tu nge ngaihsan tûr dik tak tih an hre chiang tawh ang a; tûn hmaa kan loh ngaihsan ṭhîn, ngaihsan tlâk lohte chu an pil vang vang tawh ang (tûnah pawh an pil mêk a, kan ram mi lârte aṭangin a hriat hle); chûng mite chuan kohhran leh khawtlângah dinhmun ṭha an chang leh tawh ngai lo vang. He sual leh ṭha, dik leh dik lo indona-ah hian ṭha leh dik-in hnehna a chang ngei dâwn a ni. 

    Nang teh, khawi lamah nge i ṭan ve dâwn le? Sual sipai lamah nge mipui lamah? Tûn hi i ṭanna lam i tihchian hun a ni. Tui lai rapa din hun a ni lo. I ṭan lam chu ngawi mai mai lovin ṭawngka leh thil tihin lan chhuahtîr ve teh khai!

Print this post