THUTIAM HLEN LO BURMA SIPAITE NÊNA TAHAN INDONA

By: Tluanga Chhakchhuak

When you go home ,Tell them of us and say. We gave our today for your tomorrow.

Martar-te Tahan Civil Army

Nimin 6.4.2021 chawhma lamah khân Tahan ralven buka awm Tahan Civil Defence Army-te chu rawn hmuin hman ni deuhva kan nauten an lo man Traffic Police 4-te chu Tahan Civil mi an mante nên tâng inthleng tawn tûrin an rawn kal a, an duh ang ngeiin an mi mante chu an chhuah ve ta tih kan hriat theuh tawh kha.

Tin, Sual sipai dawhehho chuan rem taka khawtlanga khawsak ho an duh thu leh Gen. Z ten tanhmun atâna an lo siam tanhmun buara ip chhûnga leichhunkhah ( Sand filled bags) daidanna hmun 2 chu thiat tûrin an ngên bawk a, Mipui lam Civil Defence Hruaituten hei hi rem ti loin an tanhmun simna hmun theuh a tharum thawh loin sipai in rorelna pawng lak duh loh lantirna chu kan chhu zawm ang tiin an chhang a,sipai hote pawh in a tuk dâr 10 am thlengin a tute ve ve pawh chetlakna nei lo tûrin  thu an hnut chhiah ta a ni.

Chutia ni 7th April zînga in biakna nei leh tûra an tih avângin ngaihtha tak a an awm laiin zîng vartian khawfing chah hma in dâr 5:15 am khân sipai firfiak mahni thutiam pawh vawnghim zo lo ten a ruk thei ang bera rawn veh den denin bomb silai mu RPG hmangin a rawn ralsai ta chiam mai a, 30 mm Motar laipuite pawh an hmang a, Puakrang silaite nên kil tin aṭangin an rawn sai ta chiam a ni.

Ral ram battle field-ah chauh an hman ṭhîn Motar leh RPG hmanga an bomb takah chuan ka pawh chhawn lovin a hmuna Sentari duty mipui sipai 3 chu ka pawh chhawn lovin an boral nghâl a. Kut leh ke tan ngai khawpa hliampui tuar pawh an awm tih hriat a ni.

Zîng vartiana sawpzi zuara inpho ṭhîn hmeichhe pakhat bazar kal tûr chu kawng lakah sipaite silai mu lengin a keah a kap fuh a. Chuti rualin a hnunga JCB chuan an tan hmun chim then tawh chu a lo nawr chhe ve nghâl a ni.

A bul hnai vêla awmte chuan Mizo tlâwmngaina dik takin thi leh hliamte chu senghawi tumin tan an lo khawh ve a. Mahse, security force mihring rilru pangngai pu tawh lote chuan an hmazawn an hmuh phe zeuh a piang chu an kap zui zêl si a, chetlak a harsa hle. Harsa chung chungin thi leh hliam te chu Hmunlai lamah la chhoin an dah mêk laiin sipaiten nang ching lehin hliamtuar leh a bawihsawmtute thlengin an man leh si a.

Kâr hmasa lam pawh khân Tahan (Kalaymyo) chhim lam khawtchhuah khuaten mipui civil Defense Army leh Burma sipaiho an lo inkap tawh a, Zopa sapel nâna hman thin laiphir leh Awlan silai musep hmang ringawt pawhin khawchhung lût thei lo tûrin an lo dang thei a. Sipai eng emaw zât chu kan Gen Z-te kut tuarin an thi a ni. Mipui sipaite pawh ram tân an nunna an hlân ve tho mai.

Sipai lam thi leh hliam hi a chiah chiah sawi theih mai a harna chhan chu Sipai thizat hi an zêp tlat ṭhîn a ni. Burma Sipai lubawk an thihin hmanhmawh takin hmun remchang lai apiangah mi hmuh tam hmain an phum nghâl zêl ṭhîn a. Amaherawhchu, an sipai officer a thih chuan an nupui leh an chhûngte dârkâr chanve vêl an hmuhtir a, an vui nghâl zêl tih hriat a ni.

Mipui nunna chu sawi loh an sipai nunna takngial pawh an hlutsak lem lo va, Lalna thlahlel êm êm in thuneihna chaka tuihal Commander in Chief Gen. Min Aung Hlaing-a leh a hote rosum leh hausakna chauh thlîr a, engpawh ka ti hreh lo, ka ti ngam a nia titu hian thil tha lo tak mai mipuite nunna a lak zêl avângin Satana pawh in êm êm a, a ti hial ta ve ang.

Vawiin 7th April 2021, zîng vartiana Tahan khuaa sual sipaite laka zalênna humhim duh vanga nunna chan ta (kutbula tun maia thi ta nên) Martar 12 te chu Zoram khawvêla Zofate zawng zawngin zahna chibai kan buk che u a, an kalsan tâk an chhûngte kan tawrhpui tak zet a ni.

(Till the end of the World.)

Print this post